މިހާރު އޮތް އުސޫލުގެ ސަބަބުން ގިނަ ބަޔަކު ޖަލަށްލުމަށްފަހު، އެމީހުންގެ ކިބައިން ހަނދާންނެތޭކަމަށް ކުރީގެ ޑެޕިއުޓީ ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޝަމީމް މިހެން ވިދާޅުވީ ދައުލަތުގެ މީޑިޔާ ޕީއެސްއެމްއަށް ދެއްވި ޚާއްސަ ބަސްދީގަތުމެއްގައެވެ.
އެބޭފުޅާ ވިދާޅުވީ ޖިނާއީ އިޖުރާއަތްތަކުގެ ގާނޫނުގައި ބުނާގޮތުގައި މީހެއްގެ މައްޗަށް ޝަރީއަތް ނިމެންދެން ބަންދުގެ މުއްދަތު ޖެހޭނީ ވަކި ސަބަބުތަކަކާއި ގުޅިގެންނެވެ. އޭގެ ތެރޭގައި ތުހުމަތުކުރެވޭ ހެކި ނައްތާލުމާއި، ފިލާފާނެކަމަށް ނުވަތަ ހެކިފޮރުވައި ހެކިންނަށް ނުފޫޒުފޯރުވާނެކަމަށް ބެލެވުން ފަދަ ކަންކަން ހިމެނެއެވެ. އަދި އެ ގާނޫނުގައި 70 ދުވަހުގެ ތެރޭގައި ޝަރީއަތް ނިންމަންޖެހޭނެކަމަށް ފާހަގަކޮށްފައިވާ ކަމަށް ޝަމީމް ވަނީ ވިދާޅުވެފައެވެ.
ނަމަވެސް ޝަރީއަތް ނިމެންދެން ބަންދުކޮށް ޖަލަށްލެވޭ މީހުންނާމެދު މިގޮތަށް ޢަމަލުކޮށްފައި ނުވާކަމަށާއި މިހާރު އޮތީ ގިނަ މީހުން ޖަލަށްލުމަށްފަހު ހަދާންނެތޭ އުސޫލެއްކަމަށް އެބޭފުޅާ ވަނީ ފާހަގަކުރައްވާފައެވެ.
މި ބަސްދީގަތުމުގައި ޝަމީމް ވަނީ ޝަރުއީ ދާއިރާ ހަރުދަނާކުރުމަށް ސަރުކާރާއި މަޖިލީހުން ކުރާ ކަންކަމަށް ތާއިދުކުރައްވާފައެވެ.
އެގޮތުން ޝަމީމް ވިދާޅުވީ ޝަރުއީ ދާއިރާގެ ތެރޭގައި ހުރި މިފަދަ މައްސަަލަތައް ހައްލުކުރުމަށް ޖޭއެސްސީއާއި، ރައްޔިތުންގެ މަޖިލީހުން ވަރަށްބޮޑެތި މަސައްކަތްތަކެއް ކުރައްވަމުންދާކަމަށާއި، މިމަސައްކަތްތަކުގެ ނަތީޖާ ކުރިއަށް އޮތް މަހެއް ނުވަތަ ދެމަހެއްހައި ދުވަހުގެ ތެރޭގައި ފެންނާނެކަމަށް އުންމީދު ކުރައްވާކަމަށެވެ.
ފޮޓޯ: ވަން އޮންލައިން
Advertisement
This content is created and paid for by advertisers and does not involve Voice Journalists
