ޑިއެގޯ ގާސިއާ ނުވަތަ ފޯޅަވައްސަކީ މޮރިޝަަސްގެ ބައެއްގެ ގޮތުގައި ކަނޑައެޅުމުގެ މައްސަލައިގައި އދ.ގެ އާންމު މަޖިލީހުގައި ރާއްޖެއިން އެކަމާއި ދެކޮޅަށް ވޯޓުދިނުމުން، ކޮންޓިނެންޓަލް ޝެލްފްގެ މައްސަލައިގައި މޮރިޝަސްއިން ދިވެހިރާއްޖެއާއި އެކު މަޝްވަރާ ކުރަން ފަށައިފިކަމަށް ފޮރިން މިނިސްޓަރ އަބްދުﷲ ޝާހިދު ހާމަކުރައްވައިފިއެވެ.
އެމަނިކުފާނު މިކަން ހާމަކުރެއްވީ އެމްޑީޕީގެ ޒުވާނުންގެ ކޮންގްރެސްގައި ރޭ އޮތް ޕެނަލް ޑިސްކަޝަންއެއްގައި ދިވެހިރާއްޖޭގެ ޚާރިޖީ ސިޔާސަތާއި ގުޅޭގޮތުން ވާހަކަފުޅު ދައްކަވަމުންނެވެ.
މިނިސްޓަރ ޝާހިދު ވިދާޅުވީ އދ.ގެ އާންމު މަޖިލީހުގައި ނެގުނު އެ ވޯޓުގައި ފޯޅަވައްސަކީ މޮރިޝަސްގެ މިލްކެއް ނޫންކަމަށް ބުނެ ވޯޓުލީ މަދު ގައުމުތަކުގެ ތެރޭގައި ދިވެހިރާއްޖެ ހިމެނުނީ ފޯޅަވައްސާއި ދިވެހިރާއްޖޭގެ ސަރަަހައްދީ އިމުގެ މައްސަލަ ޖެހިފައި އޮވެ، އެ މައްސަލަ ހައްލުކުރުމަށް އދ.އަށް ހުށައަޅާފައި އޮތުމުން ކަމަށެވެ. އެބޭފުޅާ ވިދާޅުވިގޮތުގައި މޮރިޝަސްއަށް ފޯޅަަވަހި ލިބިއްޖެނަމަ ދިވެހިރާއްޖޭގެ ކޮންޓިނެންޓަލް ޝެލްފްގެ ބައެއްގެ މިލްކުވެރިކަން ދިވެހިންނަށް ގެއްލުމުގެ ފުރުސަތު އެބައޮތެވެ.
ޝާހިދު ވިދާޅުވީ ރާއްޖެއިން އދ.ގައި އެގޮތަށް ވޯޓުދިނުމުގެ ސަބަބުން ކޮންޓިނެންޓަލް ޝެލްފްގެ މައްސަލައިގައި ދިވެހިރާއްޖެއާއި މޮރިޝަަސްއިން މިހާރު މަޝްވަރާތައް ފަށާފައިވާކަމަށެވެ. ނަމަވެސް ކޮންޓިނެންޓަލް ޝެލްފްގެ މައްސަލައަށް ހައްލެއް ނާންނަހާ ހިނދަކު، ފޯޅަވަހީގެ މައްސަލައިގައި ދިވެހިރާއްޖެއިން ވޯޓުލީ ގޮތް ބަދަލު ނުވާނެކަމަށް މިނިސްޓަރ ވަނީ ފާހަގަކުރައްވާފައެވެ.
2010 ވަނަ އަަހަރު ދިވެހިރާއްޖޭގެ ކޮންޓިނެންޓަލް ޝެލްފް ބޮޑުކުރުމަށް އދ.އަށް ހުށައެޅި މައްސަލައަށް މޮރިޝަސްއިން ވަނީ ދެކޮޅު ހަދާފައެވެ.
އޭރު އެ ގައުމުން ބުނެފައިވަނީ ރާއްޖެއިން އިތުުރުކުރަން އެދޭ ކޮންޓިނެންޓަލް ޝެލްފް ސަރަހައްދުގައި ފޯޅަވަހީގެ އީއީޒެޑް ފާހަގަކޮށްފައި ނުވާކަމަށެވެ. އަދި ރާއްޖެއިން ހުށަހެޅި ސަރަހައްދާއި މޮރިޝަސްގެ ކަނޑުގެ ސަރަހައްދާ ފުށުއަރާ ކަަމަށްބުނެ އެ މައްސަލައިގައި މަޝްވަރާ ކުރުމަށްފަހު އެއްބަސްވުމަކަށް އައުމަށް ގޮވާލިއެވެ. އޭރު މި މަޝްވަރާތައް އެއްވެސް ވަރަަކަށް ކުރިއަށްދިޔަކަމުގެ މައުލޫމާތެއް ލިބިފައެއް ނުވެއެވެ.
Advertisement
This content is created and paid for by advertisers and does not involve Voice Journalists
