"ވޮއިސް"ގެ ޗީފް އެގްޒެކެޓިވް އޮފިސަރގެ މަގާމަށް މީޑިޔާގެ ދާއިރާގައި ގިނަ ދުވަސްތަކެއް ވަންދެން މަސައްކަތްކޮށްފައިވާ ރ. އިނގުރައިދޫ/ކީސްވިލާ މުހައްމަދު ސައުޒަމް (ސައިޒަން) އައްޔަންކޮށްފިއެވެ.

ސައިޒަން މި މަގާމަށް އައްޔަންކުރުމަށް ނިންމާާފައިވަނީ މި ނޫހުގެ ޑިރެކްޓަރުންގެ ބޯޑުގެ ބައްދަލުވުމަކުންނެވެ.

އުމުރުން 16އަހަރުގައި ނޫސްވެރިކަމުގެ ދާއިރާއަށް ވެންނެވި ސައިޒަން ވަނީ ގިނަ އަދަދެއްގެ ޓީވީ އަދި ނޫސް މަޖައްލާތައް ހިންގުމާއި ލިޔުމުގައި ހަރަކާތްތެރިވެފައެވެ. އަދި ސައިޒަން އަކީ މާކެޓިންގ އަދި ޕަބްލިކް ރިލޭޝަންސް ކޮންސަލްޓެންޓެއްގެ ގޮތުގައި ހަރަކާތްތެރިވާ ފަރާތެއްކަންވެސް ފާހަގަކޮށްލެވެއެވެ.

ސައިޒަން މީގެ ކުރިން ވަނީ ސަންގުޓީވީގެ ހެޑް އޮފް ކޯޕަރޭޓް އެފެއާޒްގެ ގޮތުގައި އަދި ޗެނަލް 13ގެ ޗީފް އޮޕަރޭޓިންގ އޮފިސަރގެ ވަޒީފާ އަދާކުރައްވާފައެވެ.

ދާދިފަހުން ސައިޒަން ވަނީ އިނގިރޭސިވިލާާތުގެ ލަންޑަން މެޓްރޮޕޮލިޓަން ޔުނިވަރސިޓީން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާސް ޑިގްރީ ހާސިލްކުރައްވާފައެވެ.

ވޮއިސް ނޫހަކީ 17 ޑިސެންބަރ 2018 ގައި މިނިސްޓްރީ އޮފް ހޯމް އެފެއާޒްގައި ރެޖިސްޓަރ ކުރެވިގެން ނެރޭ އޮންލައިން ނޫހެކެވެ. މިވަގުތު ވޮއިސް ދިވެހި، އިނގިރޭސި އަދި ބަންގްލަދޭޝް އެޑިޝަންއާއެކު ރާއްޖޭގައި ފުރަތަމަ ފަހަރަށް 3 ބަހުން ނެރޭ ނޫހަށް ވޮއިސް މިވަނީ ވެފައެވެ.

ވޮއިސް ނޫހުގެ ޑިރެކްޓަރުންނާއި ހިއްސާ ދާރުންގެ ގޮތުގައި ހިމެނިވަޑައިގަންނަވަނީ މުހައްމަދު ސައުޒަމް ރ. އިނގުރައިދޫ، ޝަފްރާޒް އަހްމަދު ހުސައިން ސ. ހިތަދޫ، މުހައްމަދު އަމީން ބ. އޭދަފުށި އަދި މުހައްމަދު ޝާރިފް ދ. ކުޑަހުވަދޫއެވެ.

ވޮއިސްގެ ޗީފް އެޑިޓަރަކީ ޝަފްރާޒް އަހްމަދު ހުސައިންއެވެ.