ނޭޕާލްގައި މިހާރު ކުރިއަށްދާ ސައުތު އޭޝިޔަން ގޭމްސްގެ 100މީޓަރު ދުވުމުން ދިވެހިރާއްޖޭގެ ހަސަން ސާއިދު، ރަން މެޑަލް ހާސިލްކޮށްފިއެވެ.

މިއީ މި ގޭމްސްގެ ދިގު ތާރީޚުގައިވެސް ދިވެހިރާއްޖެއަށް ލިބުނު ފުރަތަމަ ރަން މެޑަލްކަން ފާހަގަކޮށްލެވެއެވެ.

ސާއިދަށް ރަން މެޑަލް ލިބިފައިވަނީ 10.49 ސިކުންތުން ރޭސް ނިންމައިގެންނެވެ. ފައިނަލް ހީޓުގައި ސާއިދާ ވާދަކޮށް ދެވަނައަށްދިޔަ ލަންކާގެ ހިމާޝާ އީޝާން ރޭސް ނިންމީ 10.50 ސިކުންތުންނެވެ.

މި ދުވުމުގެ ހީޓްގައި ސާއިދަށް ތިންވަނަ ލިބުނަސް އޭނާ ވަނީ ގިނަ އަދަދެއްގެ ބަޔަކު ހައިރާންކޮށްލުމަށްފަހު، ގަދަ ހިތްވަރާއި އެކު 0.1 ސިކުންތުގެ ތަފާތަކުން މުޅި ގައުމު ފަޚުރުވެރިކޮށްލާފައެވެ. 

ދެކުނު އޭޝިޔާގެ އެންމެ ބާރު ދުވުންތެރިޔާގެ ގޮތުގައި ސާއިދު ރަސްމީ ސިފައެއްގައި ހޮވިފައިވާއިރު، އެކަމަށް މަރުހަބާ ކިޔައި ޔޫތު އެންޑް ސްޕޯޓްސް މިނިސްޓަރ އަހުމަދު މަޚުލޫފްވެސް ވަނީ ޓްވީޓް ކުރައްވާފައެވެ. މަޚުލޫފް ވިދާޅުވީ ސައުތު އޭޝިޔަން ގޭމްސްއިން ފުރަތަމަ ރަންމެޑަލް ހާސިލްކޮށްގެން ދިވެހިރާއްޖެ ފަޚުރުވެރިކޮށްދީފައިވާ ކަމަށެވެ.