ނިމިގެންދިޔަ އަަހަރަކީ ހުރިހާ ގޮތަކުންވެސް ދިވެހިރާއްެޖެއަށް ތަފާތު އަހަރެކެވެ. ބޮޑެތި ބަދަލުތަކަކާއި ކުރިމަތިލައި، ބޮޑެތި ކަންތައްތަކެއް ހިނގި އަހަރެކެވެ. މިދިޔަ އަހަރަކީ ވޮއިސް ހިންގަން ފެށުނުތާާ އެއް އަހަރު ފުރުނު އަހަރުކަމަށް ވީހިނދު، އަހަރުގެ މުހިންމު ޚަބަރުތަކާއި ހާދިސާތައް މި ނޫހުން ވާނީ ގެނެސްދީފައެވެ.

މި ހިސާބުން މި ބަލާލަނީ 2019ވަނަ އަހަރުގެ ވޮއިސްގެ ކިޔުންތެރިންނަށް އެންމެ ކަމުދިޔަ ފަސް ލިޔުމަށެވެ. އެންމެ ގަދަ ފަސް އަޑަށެވެ. މި ލިޔުންތައް ހޮވުމުގައި ބަލާފައިވާނީ ވެބްސައިޓްގެ ސިސްޓަމުން އެންމެ ގިނަ އަދަދަކަށް ކިޔާފައިވާ ކަމަށް ދައްކާ ލިޔުންތަކަށެވެ.

5.ޒަހަމުތަކާއެކު މިފަހަރު އެއްލައިލީ ކާނިވާ ސަރަހައްދަށް

މިދިޔަ އަހަރުގެ ތެރޭގައި ވޮއިސްގެ ކިޔުންތެރިން ފަސްވަނައަށް އެންމެ ގިނައިން ކިޔާފައިވާ ލިޔުމަކީ "ޒަހަމުތަކާއެކު މިފަހަރު އެއްލައިލީ ކާނިވާ ސަރަހައްދަށް"، މި ނަމުގައި އިނާޒް މޫސާ ޝާއިއުކުރި ޚަބަރެވެ. މި ޚަަބަރުގައި ހިމެނިފައިވަނީ ކާނިވާ ސަރަހައްދުން މީހެއްގެ އަތުން ފޭރުމަށްޓަކައި އޭނާއަށް ތޫނު އެއްޗަކުން ހަމަލާދިން ވާހަކައެވެ. މި ހާދިސާގައި ޒުވާން ފިރިހެނަކަށް އަނިޔާާ ލިބުނުއިރު، މި މައްސަލައިގައި އަދި މިހާތަނަށް މީހަކު ހައްޔަރުކުރިކަން އެނގިފައެއް ނުވެއެވެ.

4."ކޮންމެ ރެއަކު 12 ޖެހުމުން ޖަލު ގޮޅިން ނެރެ ތަޅާއަނިޔާކުރި"

މިދިޔަ އަހަރު މި ވެބްސައިޓުން ހަތަރުވަނައަށް އެންމެ ގިނައިން ކިޔާފައިވާ ލިޔުމަކީ "ކޮންމެ ރެއަކު 12 ޖެހުމުން ޖަލު ގޮޅިން ނެރެ ތަޅާއަނިޔާކުރި"، މި ނަމުގައި މުއައްލިމް އިބްރާހިމް ޝާއިއުކުރި ރިޕޯޓެކެވެ. މި ރިޕޯޓްގައި ވަނީ ނަފްސާނީ ބަލި ހުންނަ މީހަކު ފުލުހުންގެ ބެލުމުގެ ދަށުގައި ހުއްޓާ އަނިޔާާކުރިކަމަށް އޭނައާއި ހަވާލާދީ އާއިލާއިން ކުރި ތުހުމަތެއްގެ ވާހަކައެވެ. މަސްތުވާތަކެތީގެ މައްސަލައެއްގައި ބަަންދުކުރެވުނު މި މީހާއަށް ޖަލުގައި ހުންނަ އިރު ބަޔަކު އަނިޔާކުރި މައްސަލަ ފުލުހުންނާއި އެޗްއާރްސީއެމްއިންވެސް ބެލިއެވެ.

3.އެމްޑީޕީގެ މަޖިލިސް ތިން މެންބަރަކާއި މިނިވަން މެންބަރަކު އިދިކޮޅަށް!

އިިިދިކޮޅު ޕްރޮގްރެސިވް ކޯލިޝަންގެ ޕާލިމެންޓްރީ ގްރޫޕަށް އިތުރު ހަތަރު މެންބަރަކު ގުޅޭނެކަމަށްބުނެ ޕީއެންސީގެ ޕީޖީ ލީޑަރު މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ދެއްވި އިންޓަރވިއުގެ މި ޚަބަރަކީ މިދިޔަ އަހަރު ތިންވަނައަށް އެންމެ ގިނަ އަދަދަކަށް ކިޔުންތެރިން ކިޔާފައިވާ ޚަބަރެވެ. އިނާޒް މޫސާ ލިޔުނު މި ޚަބަރުގައި މެންބަރު އާދަމް ޝަރީފް ވިދާޅުވީ ކުރިޔަށް އޮތް ދެ ދުވަސްތެރޭގައި އެމްޑީޕީގެ ތިން މެންބަރަކާއި މިނިވަން މެންބަރު އިދިކޮޅާއި ގުޅިވަޑައިގަންނަވާނެކަމަށެވެ. ނަަމަވެސް މީގެ ތިން ހަފްތާ ކުރިން އެ ވިދާޅުވި ކަންތައްތައް މިހާާތަަނަށް ހަގީގަތަކަށް ވެފައެއް ނުވެއެވެ.

2.ތިން ކޮޓަރީގެ އެޕާޓްމަންޓެއް މަހަކު ހަހާސް ރުފިޔާއަށް ހަމަޖައްސައި ދޭނަން: ރައީސް ޞާލިހް

މިދިޔަ އަހަރު ވޮއިސްގެ ކިޔުންތެރިން ތިންވަނައަށް އެންމެ ގިނައިން ކިޔާފައިވަނީ "ތިން ކޮޓަރީގެ އެޕާޓްމަންޓެއް މަހަކު ހަހާސް ރުފިޔާއަށް ހަމަޖައްސައި ދޭނަން: ރައީސް ޞާލިހް"، މި ނަމުގައި ޝަފްރާާޒް އަހުމަދު ހުސެއިން ލިޔެފައިވާ ޚަބަރެވެ. ރާއްޖެޓީވީގެ ފަށާއިރު ޕްރޮގްރާމްގައި ވާހަކަފުޅު ދައްކަވަމުން ރައީސް ޞާލިހު ވިދާޅުވީ އެމަނިކުފާނުގެ ސަރުކާރުން ސޯޝަލް ހައުސިންގެ ދަށުން ދޫކުރާ އެޕާޓްމަންޓްތަކުގެ ކުލި އުޅޭނީ 5000ރ. އާއި 6،000ރ. އާއި ދެމެދުގައި ކަމަށެވެ.

1.އިސްމަފުޅު އޮތް މަހުގެ އާދަޔާ ޚިލާފު ވާހަކަތަކެއް!

ނިމިދިޔަ 2019ވަނަ އަހަރު ވޮއިސްގެ އެންމެ ގަދަ އަޑު ނުވަތަ އެންމެ ގިނައަދަދަކަށް ކިޔާފައިވާ ލިޔުމަކީ "އިސްމަފުޅު އޮތް މަހުގެ އާދަޔާ ޚިލާފު ވާހަކަތަކެއް!"، މި ނަމުގައި މުއައްލިމް އިބްރާހިމް ލިޔެފައިވާ ޚަބަރެވެ. ވަދުއެޅުމަށް ދިޔަ ނ.މަނަދޫގެ ޑިންގީއަކުން ބޭނި މަހެއްގައި މާާތްﷲ ގެ އިސްމަފުޅު ލިޔެވިފައި އޮތުމުން، އެ މަސް ބޭނި ފަރާތާއި އެކު އިންޓަރވިއުއެއް ކުރުމަށްފަހު ލިޔުނު މި ޚަބަރުގައި ވަނީ އެ ހާާދިސާގެ ތަފްސީލްތައް ގެނެސްދީފައެވެ.

މީގެ އިތުރުންވެސް މިދިޔަ އަހަރުގައި ހިނގި މުހިންމު ގިނަ ހާދިސާތަކެއްގެ ތާޒާ ޚަަބަރުތައް، މައްސަލައިގެ އެކި ފަރާތްތަކުގެ ނަޒަރުގައި ވޮއިސްއިން ވާނީ ގެނެސްދީފައެވެ. އެގޮތުން ހެންވޭރުގައި ހިނގި ބޮޑު އަލިފާނުގެ ހާދިސާާއާއި، ކުރީގެ ރައީސް އަބްދުﷲ ޔާމީންގެ މައްޗަށް ދައުވާކުރެވުނު މަނީ ލޯންޑްރިންގގެ މައްސަލަ ހިމެނެއެވެ. އަދި މީގެ އިތުރުން ވޮއިސްގެ ނިއުސްޓީމުން ވާނީ އެކި މުނާސަބަތުތަކާާއި ގުޅިގެންނާއި، މުހިންމު އިގްތިސާދީ އަދި އިޖްތިމާއީ ރިޕޯޓްތައް ގެނެސްދީފައެވެ.

ނިމިދިޔަ އަހަރަކީ ވޮއިސްގެ އިނގިރޭސި އެޑިޝަނާއި ރ.އަތޮޅުގެ ޚަބަރުތައް ގެނެސްދިނުމަށް ޚާއްސަކޮށްގެން "ވޮއިސް އޮފް ރ"ގެ ނަމުގައި ޚާއްސަ އެޑިޝަނެއް ފެށުނު އަހަރެވެ. މި ހުރިހާ ކާމިޔާބީއެއްގެ ފަހަތުގައި ވަނީ ކިޔުންތެރިންގެ ލޯތްބާއި ބިނާކުރަނިވި ފާޑުކިޔުމެވެ. މި ފެށުނު 2020ވަނަ އަހަރުގައިވެސް ވޮއިސްއިން ކިޔުންތެެރިންނަށް ތަފާތު ދައްކާނަމެވެ. ތާާޒާ އަދި ތަފާތު ޚަބަރުތަކާާއި ރިޕޯޓްތައް ފޯރުކޮށްދޭނަމެވެ. އިންތިޒާރު ކުރައްވާށެވެ!