މިއީ މިމަހުގެ 21 ވަނަދުވަހު ރައްޔިތުންގެ މަޖިލިސް ކުރާގޭ ސަރަހައްދުގައި ހިނގައިދިޔަ ކަމެއްގެ ވާހަކައެވެ. ތޯތޯއެއްނޫނެވެ. އަޅުގަނޑަށް ފެނި ތަޖުރިބާ ކުރަން ޖެހުނުކަމެއްގެ ވާހަކައެވެ.

މަޖިލިސް ކުރާގެ ސަރަހައްދުގައި އެމްޑީޕީ މެންބަރެއް މަޖިލިސް ޕާކިންގ ގޭޓް ސަރަހައްދުގައި ހުއްޓައި، ހާއްސަ އެހީއަށް ބޭނުންވާ މީހަކު މެންބަރު ގާތުން ކާނެ އެއްޗެއް ލިބިދާނެތޯ އެއްސެވިއެވެ. އެމެންބަރު ނެތްކަމަށް ބުނެ އަތްހޫރާލުމަށްފަހު ވަނީ އެތެރެއަށެވެ. އަޅުގަނޑާއި، މަންޒަރު ދުށް ދެމީހަކާއެކު އޭނާ ގާތަށް ގޮސް ވީގޮތް އެހުމުން ކިޔައިދިނެވެ. ވާޒީފާނެތި، އާމްދަނީއެއް ލިބޭނެގޮތް ނެތިފައިހުރި ހާއްސަ އެހީއަށް ބޭނުންވާ މި މީހާ ބޭނުންވީ ބަނޑުހައި ހޫނުކަން ފިލުވާލަން ކާއެއްޗެއްކަމަށާއި، މެންބަރު ނޫނެކޭ އެ ވިދާޅުވީ އެކަމަށް އެދުމުން ކަމަށް ބުންޏެވެ. މަގުމަތީގައި ހަރަކާތްތެރިވި އާދައިގެ ދެ ރައްޔިތުން ވެގެން އޭނާ ބޭނުންވާ ތަކެތި ގަނެދިނެވެ.

މިއީ ކޮވިޑް-19 އާއި ގުޅިގެން ރާއްޖެއަށް ދިމާވެފައިވާ އިޤްތިސާދީ ބޮޑު ގޮންޖެހުންތަކާއެކު ދިވެހި އަދި ބިދޭސީންނަށް މިއަދު ކުރިމަތިވެފައިވާ ދަތިކަމެވެ. އަދި މިއީ ރައްޔިތުންގެ ހާދިމުންގޮތުގައި އަމިއްލައަށް މުސާރަ ކަނޑައަޅުއްވައިގެން ތިއްބަވާ އިއްޒަތްތެރި މެންބަރެއްގެ ހާލުވެސްމެއެވެ.

ކޮވިޑް-19 އާއި ގުޅިގެން މަޖިލިސްގެ މުސާރަ 35-20 ޕަސަންޓުގެ އަދަދަކަށް ވަނީ ކުޑަކޮށްފައެވެ. އެގޮތުން މިހާރު ޖުމްލަ މުސާރައިގެ ގޮތުގައި 82،500 ރުފިޔާ ލިބިވަޑައިގަންނަވާ މަޖިލިސް މެމްބަރުންގެ އަސާސީ މުސާރައިން އިން 30 ޕަސެންޓް އުނިކުރުމުން ދެން ލިބިވަޑައިގަންނަވާނީ، 69،750 ރުފިޔާއެވެ. މިއީ ރައިސުލްޖުމްހޫރިއްޔާއާއި ރައީސުލުޖުމްހޫރިއްޔާގެ ނައިބު، ރައްޔިތުންގެ މަޖިލީހުގެ ރައީސް އަދި އުއްތަމަ ފަނޑިޔާރަށް ދެން ލިބިވަޑައިގަންނަވާ މުސާރައަށްވުރެ ބޮޑު އަދަދެކެވެ.

ނަމަވެސް ހާލުގައި ޖެހިފައިވާ ރައްޔިތަކަށް އެހީވުމަށް އިއްޒަތްތެރި މެންބަރު މިވަނީ ނުކުޅެދިފައެވެ. މިއީ ބަލަން ހުންނަން އުދަގޫވި މަންޒަރެކެވެ. އަޑު އަހަންވެސް ފަސޭހަވި ވާހަކަތަކެއް ނޫނެވެ.

މެންބަރުގެ ޖީބުން ހަރަދުކުރުން އެއީހައްލެއްނޫނެވެ.ނަމަވެސް މިފަދަ ކަންކަމަށް ހައްލު ހޯދައިދިނުމަކީ މެންބަރުންގެ ޒިނަމާއެކެވެ. ދެވަނަ ބާރުގެ ޒިންމާއެކެވެ. މެންބަރުން ސަރުކާރަށް ފާޑުކިޔުމުގެ ބަދަލުގައި ރައްޔިތުންނަށް ހެޔޮގޮތް ހޯދައިދިނުމަށް މަސައްކަތްކުރަންޖެހެއެވެ.

މަޖިލިސް ތަޅުމުގައި ކެމޭރާތަކުގެ ކުރިމަތީގައި ރައްޔިތުންގެ ހައްޤުގައި ވަކާލާތުކުރެއްވުމަށްފަހު، ރައްޔިތުންނާއި ކުރިމަތިލައްވާތޮތް މުޅީންވެސް ތަފާތެވެ.

ޖެންޑާ މިނިސްޓްރީގެ ހިސާބުތަކުން، ކޮވިޑް-19 އާއި ގުޅިގެން ގިނަ އަދަދެއްގެ ބަޔަކު ކުލި ނުދެއްކުމުގެ ސަބަބުން ގެދޮރުން ވަނީ ނިކުންނަންޖެހިފައެވެ. ގިނަ ބަޔަކަށް މިހާރުވެސް ސަރުކާރުން ބޯހިޔާވަހިކަމާއި ކާބޯތަކެތި ފޯރުކޮށްދެމުން ދާކަމަށް ބުނާއިރު، މިފަދަ އެތައް ބަޔަކު މިއަދު މަގުމަތީގައި ސަލާންޖަހަމުން ދެއެވެ. އެދެނޭ ފައިސާއަކަށް ނޫނެވެ. ކާނޭއެއްޗަކަށެވެ. ދިވެހިންނާއި ބިދޭސީންނެވެ. އިންސާނުންނެވެ.

މިވާހަކަ ދައްކާލަންޖެހޭ ވަރަށް މުހިންމު އެއްސަބަބުވެއެވެ. މަޖިލިސް އިންތިހާބުތަކާއި ދިމާކޮށް ރައްޔިތުންގެ ގާތަށްގޮސް ހާލުބަލައި، ބޭނުންވާ ތަކެއްޗާއި ހަރުމުދާވެސް ދެއެވެ. އަބަދުމެ ހަރުގެ ތަކުން ހިލޭ ކެއުންވެސް ލިބެން ހުރެއެވެ. މެންބަރުން އިސްވެ މަސައްކަތް ކުރައްވާފައިވަނީ ވެލްފެއާ ފަންޑެއްގޮތުގައެވެ. އެހެންކަމުން މެންބަރު ކަމަށް ހޮވުމުން މިކަމުން ރެކެވޭނެތޮތެއް އޮންނާނެކަމަކަށްވެސް ނުބެލެވެއެވެ.

މިއަދު މިހާލަތަށް އިޔާއަތްކޮށް ކުރެވޭ ސުވާލަކީ "އިންސާނިއްޔަތު" އިސްކުރަން ޖެހޭ މިހާލަތުގައި އިންސާނިއްޔަތު ކޮބައިތޯއެވެ. ރައްޔިތުންނަށް ހެޔޮގޮތް ހޯދައި، ރައްޔިތުންގެ ހައްޤުގައި މަސައްކަތް ކުރަން ޖެހޭ މެންބަރެއްގެ ހާލަކީމިއީއެވެ. މަޖިލީހުން ރައްޔިތުންގެ ހައްޤުގައި ކޮވިޑް-19 އަށް ބެލުމެއްނެތި މަޖިލިސް ހުޅުވައިގެން ކުރައްވަނީ ރައްޔިތުންގެ މަސައްކަތަ ކަމުގައި ވިދާޅުވިނަމަވެސް، ރައްޔިތުންގެ ގެ ހަޤީގީ މައްސަލަތައް މަޖިލިސް ގޭޓުން ބޭރުވުމުން ނުހަނު ސާފުކޮށް މެންބަރުންނަށް މިހިރީ ފެންނާށެވެ.