ކޮވިޑް-19 ގެ ބަލިމަޑުކަމުގެ ސަބަބުން ފެމިލީ ކޯޓުގައި އޮންލައިންކޮށް ކައިވެނި ކޮށްދިން ނަމަވެސް، މިހާރު އެކަން އާންމު ޙާލަތަށް ގެނެސް ކޯޓުގައި އާއި ކޯޓުން ބޭރުގައި ކައިވެނި ކޮށްދޭ ގޮތަށް ހަމަޖައްސައިފިއެވެ.

ފެމިލީ ކޯޓުން ނެރެފައިވާ އިއުލާނެއްގައި ބުނެފައިވަނީ ކޮވިޑް ގެ ބަލިމަޑުކަމުގެ ޙާލަތުގައި އެ ކޯޓުން އޮންލައިންކޮށް ކައިވެނި ކޮށްދިން ނަމަވެސް، މި ފެށުނު ޑިސެމްބަރު މަހުގެ 1 ވަނަ ދުވަހުން ފެށިގެން އޮންލައިންކޮށް ކައިވެނި ކޮށްދިނުން ހުއްޓާލައި، ކޯޓުގައި އާއި ކޯޓުން ބޭރުގައި ކައިވެނި ކޮށްދިނުމަށް ނިންމާފައިވާ ކަމަށެވެ.

ކޯޓުން މި ބަދަލު ގެނެސްފައި ވަނީ، މިހާރު ފެތުރެމުން އަންނަ ކޮވިޑް-19 އާއި ގުޅިގެން ވީޑިއޯ ކޮންފަރެންސް މެދުވެރިކޮށް ނޫނީ ކައިވެނި ނުކޮށްދޭން އެ ކޯޓުން ގެނައި ބަދަލު ނިމުމަކަށް އައިސްފައިވާކަން އިއުލާންކުުރަމުންނެެވެ.

ހަމައެއާއި އެކު، ކޯޓުން ބޭރުގައި ކައިވެނި ކޮށްދިނުމަށް އެދިފައިވާ ފަރާތްތަކަށް ކޯޓުން ބޭރުގައި ކައިވެނި ކޮށްދެވޭނެ އިންތިޒާމުވެސް ހަމަޖެހިގެންދާނެ ކަމަށް ކޯޓުން ވަނީ ހާމަކޮށްފައެވެ.ނަމަވެސް އެގޮތަށް ހުއްދަ ދެވޭނީ ކޯޓުން ކަނޑައަޅާ އުސޫލާއި އެޗްޕީއޭ އިން ނެރެފައިވާ ގައިޑްލައިން އާއި އެއްގޮތްވާ ގޮތުގެ މަތިން ކަމަށް ކޯޓުން ވަނީ ހާމަކޮށްފައެވެ.

އަދި ކޯޓުން ބޭރުގައި ކައިވެނި ކޮށްދޭނީ މީހުން ނޫޅޭ ގްރައުންޑް ފްލޯގައި ހުންނަ އެޕާޓްމެންޓެއްގައި ކަަމަށެވެ. ގްރައުންޑް ފްލޯރ އަށްވުރެ މަތީ ފަންގިފިލާގައި މި އިސްލާހުތަކާއި އެކު ކައިވެނި ނުކުރެވޭނެ އެވެ.

ކޮވިޑް-19 އާއި ގުޅިގެން ވީޑިއޯ ކޮންފަރެންސް މެދުވެރިކޮށް ކައިވެނި ކޮށްދޭނެ ފަށާފައިވަނީ މިދިޔަ މޭ މަހުގައެވެ.