އިންޑިއާގެ މަދްޔަޕްރަދޭޝްގެ ޚަޖުރާހޯގައި ހުންނަ އެއާޕޯޓަކީ މިވަގުތު އެއްވެސް ކޮމާޝަލް ފްލައިޓެއް ދަތުރުނުކުރާ އެއާޕޯޓެއް ނަމަވެސް، އެ ގައުމުގެ އެންމެ ހިދުމަތް ރަނގަޅު އެއާޕޯޓުގެ ލަގަބު އެ އެއާޕޯޓަށް ލިބިއްޖެއެވެ.

އެއާޕޯޓްސް އޮތޯރިޓީ އޮފް އިންޑިއާ (އޭއޭއައި) އިން އެންމެ ފަހުން ނެރުނު ކަސްޓަމާ ސެޓިސްފެކްޝަން އިންޑެކްސް (ސީއެސްއައި) ގައި މި އެއާޕޯޓް ވަނީ އެއްވަނަ ހޯދާފައެވެ.

ޖުލައި އަދި އޮގަސްޓް މަހު އެއްވެސް ފްލައިޓެއް މި އެއާޕޯޓަށް ދަތުރުނުކުރާއިރު، މި ނަތީޖާއާއެކު އިންޑިއާގެ އޭވިއޭޝަން ސިނާއަތުގެ ގިނަ ބައެއްގެ މެދުގައި ވަނީ ސުވާލުތަކެއް އުފެދިފައެވެ. ކުރިން މި އެއާޕޯޓުން ދިއްލީ އަދި ވަރަނާސީއަށް ދަތުރުތައް ކުރި ނަމަވެސް، މިހާރު އެ ދަތުރުތައް ވަނީ މެދުކަނޑާލާފައެވެ.

އެއާޕޯޓުގެ ޑިރެކްޓަރު ސަންތޯޝް ސިންގް މީޑިއާތަކަށް މައުލޫމާތު ދެއްވަމުން ވިދާޅުވީ، ޖުލައި 1 އިން ފެށިގެން އެއްވެސް ފްލައިޓެއް މި އެއާޕޯޓުން އޮޕަރޭޓެއް ނުކުރާ ކަމަށެވެ. ނަމަވެސް، އަންނަ އޮކްޓޯބަރު މަހު އަލުން ދިއްލީ އަދި ވަރަނާސީގެ ދަތުރުތައް ފެށޭނެ ކަމަށް އޭނާ އުންމީދު ކުރައްވައެވެ. 1960 ގެ އަހަރުތަކުގެ ފަހުކޮޅު އިމާރާތްކޮށް ނިންމި މި އެއާޕޯޓުގައި ފުރަތަމަ ފްލައިޓެއް ޖެއްސީ 1978 ވަނަ އަހަރެވެ.

މި އެއާޕޯޓަށް އެއްވަނަ ލިބުނު ސާވޭއަކީ މިނިވަން އެޖެންސީތަކުން ކޮންމެ ހަ މަހަކުން އެއްފަހަރު ކުރިއަށްގެންދާ ސާވޭއެކެވެ. މި ސާވޭގައި ފަސިންޖަރުން ވަނީ 33 ދާއިރާއަކުން އެއާޕޯޓުގެ ހިދުމަތްތައް ވަޒަންކޮށްފައެވެ. މީގެ ތެރޭގައި އެއާޕޯޓުގެ ސާފުތާހިރުކަން، މުވައްޒަފުންގެ އަހުލާގު، ވައިފައިގެ ހިދުމަތް، ޕާކިން އަދި ކާބޯތަކެތީގެ ހިދުމަތް ހިމެނެއެވެ.

މި ނަތީޖާއާ ގުޅިގެން ބައެއް އާންމުން ސޯޝަލް މީޑިއާގައި ޖޯކު ޖެހި ނަމަވެސް، އެ ސަރަހައްދުގެ ބައެއް ރައްޔިތުން ތިބީ މި ޝަރަފާ މެދު ވަރަށް ބޮޑަށް ފަހުރުވެރިވެފައެވެ. ޚަޖުރާހޯގެ ރައްޔިތެއް ކަމަށްވާ މަނީ ރާމް ބުނި ގޮތުގައި، އެއާޕޯޓުގެ ޓާމިނަލް ވަރަށް ރަނގަޅަށް ބަލަހައްޓާފައިވާ ކަމަށާއި، މުވައްޒަފުންގެ މުއާމަލާތްތައް ހުންނަނީ ވަރަށް ރަނގަޅު ފެންވަރެއްގައެވެ.

އޭވިއޭޝަން ދާއިރާގެ ބައެއް ފަރާތްތަކުން ބުނާ ގޮތުގައި، މަދުން ފްލައިޓް ޖައްސާ އެއާޕޯޓުތަކުގައި ފަސިންޖަރުންނަށް ދެވޭ ސަމާލުކަން އިތުރުވުމަކީ މިފަދަ މަތީ މާކްސްތަކެއް ލިބުމުގެ ސަބަބަކަށް ވެދާނެއެވެ.