"ވޮއިސް" ރަސްމީކޮށް ހިންގަން ފެށުނުތާ ދެ އަހަރު ފުރުމުގެ މުނާސަބަތުގައި މިނޫހުގެ ޓީމްގެ ފަރާތުން ކިޔުންތެެރިންނަށް ޚާއްސަ ހަދިޔާއެއް ދިނުމަށް ނިންމައިފިއެވެ.

އެގޮތުން ވޮއިސްގެ ދެވަނަ އަހަރީ ދުވަހުގެ މުނާސަބަތުގައި މިއަދު މެންދުރުފަހު 14:00 އިން ފެށިގެން 15:00 އާ ހަމައަށް ހުޅުމާލޭގައި ހުންނަ ޕިއްޒާ ކިޗަނުން ހިލޭ ކޮފީ ލިބިވަޑައިގަންނަވާނެއެވެ. ޕިއްޒާ ކިޗަން ހުންނާނީ ހުޅުމާލޭގެ ހިތިގަސް މަގުގެ 6ވަނަ ގޯޅީގައެވެ.

މިފަދައިން ކިޔުންތެެރިންނަށް ޚާއްސަ ހަދިޔާއެއް ދޭން ވޮއިސްގެ ޓީމުން ނިންމީ ފާއިތުވެދިޔަ ދެ އަހަރުގައި މި ނޫހުން ކަޑައްތުކުރި އެކި މަރުހަލާތަކުގައި ކިޔުންތެރިންގެ ފަރާތުން ދީފައިވާ އެއްބާރުލުމަށް ޝުކުރު އަދާކުރުމުގެ ގޮތުންނެވެ.

މި ފާއިތުވެގެންދިޔަ ދެ އަހަރު ދުވަހުގެ ތެރޭގައި ވޮއިސްއިން އެންމެ ބޮޑަށް އަމާޒުކޮށްފައިވާނީ ރާއްޖެއާ ދުނިޔޭގެ މުހިންމު ކަންކަމުގެ ޚަބަރުތައް ވަކި ފަރާތަކަށް ނުޖެހި ހަމަހަމަކަމާ އެކު ގެނެސްދީ، އަޑުނެތް ފަރާތްތަކުގެ އަޑަކަށް ވެގެންދިއުމަށެވެ. މި އަމާޒުގައި މި ކުޑަ ޓީމުން ކުރަމުންދާ މަސައްކަތަށް ކިޔުންތެރިންނާއި އެހެނިހެން ހެޔޮއެދޭ ފަރާތްތަކުން ދެމުންގެންދާ އެއްބާރުލުމަށް ފަށްފަށުން ޝުކުރު އަދާކުރަމެވެ. 

މިއަދު ވޮއިސްއަކީ ތިންބަހަކުން ދިވެހިރާއްޖޭގެ ޚަބަރުތައް ގެނެސްދޭ ހަމައެކަނި ނޫސްކަން އުފަލާ އެކު ފާހަގަކުރަމެވެ. އެގޮތުން ޚަބަރާއި މައުލޫމާތު ލިބުމުން އެއްވެސް ފަރާތެއް ބާކީނުކުރުމުގެ ވިސްނުމުގެ ދަށުން ދިވެހިރާއްޖޭގައި މަސައްކަތްކުރާ އަދި ދިރިއުޅޭ ބަންގްލަދޭޝްގެ ފަރާތްތަކަށް އަމާޒުކޮށްގެން މިއަހަރުގެ ތެރޭގައި ވާނީ ވޮއިސް ބެންގާލީ އެޑިޝަން ލޯންޗްކޮށްފައެވެ.

މީގެ އިތުރުން ދިވެހި އަދި އިނގިރޭސިބަހުންވެސް ވޮއިސްގެ ޚަބަރުތައް ކިޔާލުމުގެ ފުރުސަތު އާންމުންނަށް ލިބޭނެއެވެ. އަދި ރ.އަތޮޅުގެ ޚަބަރުތަކަށް ޚާއްސަކޮށްގެން "ވޮއިސް އޮފް ރ"ގެ ނަމުގައި ޚާއްސަ އެޑިޝަނެއް އުފައްދައި، މި ނޫހުން ދަނީ ހިންގަމުންނެވެ.

ވޮއިސްއަށް ދެ އަހަރު ފުރި ތިންވަނަ އަހަރެއް ފެށިފައިވާއިރު، މި ނޫހުން ކިޔުންތެެރިންނަށް ޔަގީންކަން ދޭ ކަމަކީ ފެންވަރު ރަނގަޅު އަދި ތާޒާ ޚަބަރުތައް އާންމުންނަށް ފޯރުކޮށްދޭނެކަމެވެ. ވަކި ފަރާތަކަށް ނުޖެހި، ހުރިހާ ފަރާތްތަކެއްގެ އަޑަކަށް ވޮއިސް ވެގެންދާނެކަމެވެ. މިނިވަން ނޫސްވެރިކަން ދިރުވައި، ފެންވަރު ރަނގަޅު ކޮންޓެންޓް ގެނެސްދޭނެކަމެވެ.

އަޅުގަނޑުމެންގެ މި ފޮނި ދަތުރުގައި މިހާތަނަށް ބައިވެރިވެލެެއްވީތީ އަދިވެސް އެއްފަހަރު ޝުކުރު ދަންނަވަމެވެ. ދަތުރުގެ ބާކީއޮތް ބައިގައިވެސް ބައިވެރިވެ ވަޑައިގަތުމަށް ދައުވަތު އަރުވަމެވެ!