ރާއްޖެފަދަ ގައުމެއްގައި ބިޒްނަސް ކިޔަވާ ދަރިވަރުން ގިނަވުމަކީ ހާސްވާން ޖެހޭ ކަމެއް ކަމަށް ގައުމީ ޔުނިވާސިޓީގެ ކުރީގެ ޗާންސެލާ ޑރ. ހަސަން ހަމީދު ވިދާޅުވެއްޖެ އެވެ.
ހަސަން މިހެން ވިދާޅުވީ ދަށު ސާނަވީ އިމްތިހާނު ތަކުގައި، އެކި ތައުލީމީ ގޮފިން (ސްޓްރީމުން) ބައިވެރިވާ ދަރިވަރުންގެ ނިސްބަތް ހޯދުމަށް ހުށަހެޅި އާރުޓީއައި ފޯމުގެ އިޖާބަ ލިބުމުން ސާފުކުރެވުނު ނަތީޖާ ހިއްސާކޮށް ކުރެއްވި ޕޯސްޓެއްގަ އެވެ.
ތައުލީމީ ދާއިރާގެ ބޮޑު ހިދުމަތްތެރިޔާ ވިދާޅުވި ގޮތުގައި ރާއްޖެ ފަދަ ގައުމެއްގައި، 20 އިންސައްތައަށް ވުރެ ބިޒްނަސް ކިޔަވާ ދަރިވަރުން ގިނަވުމަކީ ހާސްވާން ޖެހޭ ކަމެކެވެ. އިނގިރޭސި ވިލާތާއި ސިންގަޕޫރުގައި ވެސް މި ނިސްބަތް ފަސްބައިކުޅަ އެއް ބަޔަށް ވުރެ ދަށްކަން ވަނީ ފާހަގަ ކުރައްވާފަ އެވެ.
އަދި ވިދާޅުވީ ގައުމުގައި އާއްމު ވެފައިވާ ފަސާދައަކީ މާޒީގައި މި އަދަދު 80 އިންސައްތައަށް އެރުމުގެ ނަތީޖާ ކަމަށް ބައެއް މީހުން ބުނާނެ ކަމަށެވެ.
ހަސަން ހަމީދުގެ ޕޯސްޓްގައި ވަނީ މި ނިސްބަތާ މެދު ކަންބޮޑުވެ ވަޑައިގަންނަވަންތޯ އާންމުންނާއި ސުވާލު ކުރައްވާފަ އެވެ.
ދަށު ސާނަވީ އިމްތިހާނު ތަކުގައި ދަރިވަރުން ބައިވެރިވާ ސްޓްރީމްގެ ނިސްބަތަށް ބަލާއިރު ސައިންސް ކިޔަވަނީ 50 އިންސައްތަ ދަރިވަރުންނެވެ. ބިޒްނަސް ކިޔަވަނީ 49 އިންސައްތަ ދަރިވަރުންނެވެ. އަނެއް އިންސައްތަ ދަރިވަރުންނަކީ އާޓްސް ކިޔަވާ ދަރިވަރުންނެވެ.
Advertisement
This content is created and paid for by advertisers and does not involve Voice Journalists
