ކުރީ ސަރުކާރުން ކަނޑައެޅި އަގަށްވުރެ ބޮޑު އަގެއްގައި ހިޔާ ފުލެޓުތައް ކުއްޔަށް ދިނުމަށް ސަރުކާރުން ނިންމައިފިއެވެ.
ރައީސް ޔާމީންގެ ވެރިކަމުގައި ނިންމާފައި އޮތީ ހިޔާ މަޝްރޫޢުގެ ދަށުން އަޅާފައިވާ ފުލެޓުތަކުން ކުލީގެ ގޮތުގައި ނަގާނީ 5،500 ރުފިޔާ ކަމަށެވެ.
ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ޕްލޭނިން މިނިސްޓަރު މުޙައްމަދު އަސްލަމް ވިދާޅުވީ ޑައުން ޕޭމެންޓެއް ނުލާ ހިޔާ ފުލެޓުތަކުގެ ކުލީގެ ގޮތުގައި ނަގަން ހަމަޖެހިފައިވަނީ 7500 ރުފިޔާ ކަމަށެވެ. އަދި އެވަރަށް ކުލި ނެގުމުންވެސް ހައުސިން ޑިވެލޮޕްމަންޓް ކޯޕަރޭޝަނަށް ގެއްލުން ވާނެ ކަމަށެވެ.
އަސްލަމް މިއަދު ވިދާޅުވީ 7500 ރުފިޔާ ނެގުމުންވެސް އެޗްޑީސީއަށް ގެއްލުން ވާނެކަމަށެވެ. ނަމަވެސް މީގެ ކުރިން އެޗްޑީސީއިން ރައީސް އޮފީހަށް ފޮނުވި ކަރުދާހެއްގައި ބުނެފައިވާ ގޮތުގައި ކުލީގެ ގޮތުގައި 7367 ރުފިޔާ ނަގާނަމަ 921 މިލިއަން ރުފިޔާގެ ފައިދާއެއް އެޗްޑީސީއަށް ލިބޭނެއެވެ.
ހިޔާ ފުލެޓުތައް ކުރީ ސަރުކާރުން ދޭން ނިންމާފައި އޮތީ ފިނިޝިން އާއިވެސް އެއްކޮށެވެ. ނަމަވެސް މި ސަރުކާރަށް ފިނިޝިންގެ މަސައްކަތަށް ބޭނުންވާ ފައިސާއެއް ހަމައެއް ނުޖެއްސުނެވެ.
Advertisement
This content is created and paid for by advertisers and does not involve Voice Journalists
