މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން(އެމްއެމްޕީއާރުސީ) މެދުވެރިކޮށް ރާއްޖޭގެ ފަޅުތަކާއި ރަށްތައް ވިއްކައިގެން ހޯދި ފައިސާ ދައުރުކުރަން ބޭނުން ކުރި އެސްއޯއެފް ކުންފުނީގެ އެކައުންޓުތައް ދޫކޮށްލުމަށް ސިވިލް ކޯޓުން އަމުރުކޮށްފިއެވެ.

އެމްއެމްޕީއާރުސީގެ މެދުވެރިކޮށް ރާއްޖޭގެ ފަޅުތަކާއި ރަށްތައް ވިއްކައިގެން ހޯދި ފައިސާ ޖަމާކުރުމާއި، އަދި ޖަމާކުރަމުން ދިޔަ ފައިސާ އެހެން އެކައުންޓުތަކަށް ދައުރުކުރަމުން ދިޔައީވެސް އެސްއޯއެފް ކުންފުނި މެދުވެރިކޮށެވެ.

އެސްއޯއެފްގެ އެކައުންޓް ފްރީޒްކޮށްފައިވަނީ 2020 އަހަރު ސިވިލް ކޯޓުން ނެރުނު އަމުރަކާއި ގުޅިގެންނެވެ.

Advertisement

އެކައުންޓު ފްރީޒު ކުރިއިރު އެ އެކައުންޓުގައި ހުރީ ކިހާ އަދަދެއްގެ ފައިސާކަން ސާފެއް ނޫނެވެ.

އެހެން ނަަމަަވެސް ހަމަ ސިވިލް ކޯޓުން މި މަހުގެ 7 ވަނަ ދުވަހު ނެރުނު އަމުރަކާއި ގުޅިގެން މިހާރު ވަނީ އެސްއޯއެފް އެކައުންޓު ދޫކޮށްލާފައެވެ.

އެމްއެމްޕީއާރުސީގެ ޚިޔާނާތާއި ގުޅުންހުރި މައްސަލަތަކެއް ކޯޓުގައި ހިނގަމުންދަނިކޮށް، އެ ޚިޔާނާތުގެ ފައިސާ ދައުރުކުރަމުން ދިޔަ ކުންފުނީގެ އެ ކައުންޓު ދޫކޮށްލުމަށް ސިވިލް ކޯޓުން އަމުރު ނެރުނީ ކޮން ސަބަބާއި ހުރެކަމެއް ނޭނގެއެވެ.

އެ ޚިޔާނާތުގެ މައްސަލަ ބެލުމަކީ ރައީސް އިބްރާހިމް މުހައްމަދު ސޯލިހުގެ ވައުދުފުޅެކެވެ.

ވެރިކަމަށް ހުވާކުރައްވާތާ ދެ އަހަރުގެ ތެރޭގައި އެ މުޅި މައްސަލަ ބައްލަވާ  އެކަމުގައި ޝާމިލުވާ ހުރިހާ ފަރާތްތަކަށް ފިޔަވަޅު އަޅުއްވާނެކަމަށް ރައީސް ސޯލިހު ވިދާޅުވެފައިވީނަމަވެސް، އެ މައްސަލަ ބަލާ ދައުލަތަށް ލިބުނު ގެއްލުން އިޔާދަކުރުމުގެ މަގްސަދުގައި އުފެއްދި އެސެޓް ރިކަވަރީ ކޮމިޝަންވެސް ވަނީ އެކަށީގެންވާ ނަތީޖާއެއް ނުނެރެވުމުގެ ސަބަބުން އުވާލާފައެވެ.