ލަންކާގައި ކައްކާ ގޭހާއި ތެލާއި ބޭސް ފަދަ ޒަރޫރީ މުދަލުގެ ދަތިކަން ކުރިމަތިވުމުން އެގައުމުގެ ރައްޔިތުން ސިލްސިލާ މުޒާހަރާތައް ކުރަމުން އަންނަތާ ގިނަ ދުވަސްތަކެއް ވަނީ ވެފައެވެ.

އެގޮތުން މިއަހަރުގެ ކުރީކޮޅު ބޭއްވި މުޒާހަރާތައް ހޫނުވުމުން، މިދިޔަ މެއި މަހު އޭރުގެ ބޮޑުވަޒީރު މަހިންދަ ރާޖަޕަކްސަ ވަނީ މަގާމުން އިސްތިއުފާ ދެއްވައިފައެވެ.

ގޮތަބަޔާ ރާޖަޕަކްސަގެ ވެރިކަމުގައި ސްރީލަންކާ އިގްތިސާދީ ގޮތުން އިނދަޖެހި ރައްޔިތުންނަށް ބޭނުންވާ އަސާސީ ތަކެތިވެސް ނުލިބޭ ހާލަތަށް ދިޔުމުންވެސް، ގޮތަބަޔާއަށް މައްސަލަތައް ހައްލުކޮށްދެވިފައެއް ނުވެއެވެ.

މިހާލަތުން އަރައިގަތުމަށް ސަރުކާރުން ކުރަންފެށި އެއްވެސް ކަމެއް ކާމިޔާބުވެފައިނުވާއިރު، ލަންކާ ބޮޑު އިގްތިސާދީ އަނދަވަޅަކަށް ވެއްޓިގެން ދިޔުމުގެ ޒިންމާ ނަގަން ޖެހޭނީ އެގައުމުގެ ވެރިން ކަމަށް ރައްޔިތުން ދެކެއެވެ.

ލަންކާގެ މަސްރަހު ހޫނުވުމުން، އިސްތިއުފާ ދެއްވާނެ ކަމަށް ވިދާޅުވެ، ރައީސް ގޮތަބަޔާ ފިއްލަވައިގެން ރާއްޖެ ވަޑައިގެންނެވުމުން، އެ ގައުމުގެ ރައްޔިތުން ވަނީ ނުރުހުން ފާޅު ކުރުމަށް ވެރިރަށް މާލޭގެ ކާނިވާ ސަރަހައްދަށް އެއްވެ އަޑު އުފުލާފައެވެ.

މި އެއްވުމުގެ ތެެރެއިން ލަންކާގެ ރައްޔިތުން ގޮވަމުން ދިޔައީ، އެމީހުން ބޭނުމީ ގައުމު އަނބުރާ ހޯދަން ކަމަށެވެ.

ގޮތަބަޔާއަށް ދިވެހި ސަރުކާރުން ހިމާޔަތް ދިނުމުން، އެކަމާ ދެކޮޅަށް އަޑު އުފުލުމަށް ނުކުތް ލަންކާ ޒުވާނަކު "މޯލްޑިވްސް ވޮއިސް"އަށް ބުނީ އެގައުމުގެ ރައްޔިތުން އެދެނީ ގޮތަބަޔާ އެނބުރި ގައުމަށް ގޮސް، އިސްތިއުފާ ދެއްވައި، ސުލްހަވެރިކަމާއެކު ބާރުތައް ހަވާލު ކުރެއްވުމަށް ކަމަށެވެ.

"އޭނާ އަކަށް އަބަދު މިތާ ފިލައެއް ނުހުރެވޭނެ. ސްރީލަންކާއަށް އެނބުރި ދާން ޖެހޭނެ. ދެން އިސްތިއުފާ ދޭން ޖެހޭނީ. އަހަރުމެން އިތުރު ކަމަކަށް ނޭދެން."

އޭނާ ބުނީ ލަންކާ ރައްޔިތުންނަކީ ސުލްހައަށް ލޯބި ކުރާ ބައެއް ކަަމަށާއި، ބޭނުންވަނީ ގައުމު އަލުން އަނބުރާ ހޯދަން ކަަމަށެވެ.

މިއަދު މެންދުރު ފަހު، ކާނިވާ ސަރަހައްދުގައި މުޒާހަރާ ކުރި ލަންކާގެ ރައްޔިތުން ގޮވާލީ ރާއްޖޭގައި ހުންނެވުމަށް ގޮތަބަޔާއަށް ފުރުސަތު ނުދިނުމަށެވެ. އަދި އޭނާ ވަނީ ލަންކާ ބަނގުރޫޓުކޮށްފައި ކަމަށް ވެސް ބައެއް ޕޯސްޓަރުތަކުގައިވެއެވެ.

އެ މުޒާހަރާގައި ބައެއް ދިވެހީން ވެސް ބައިވެރިވެ، ގޮތަބަޔާއަށް ހިމާޔަތް ދިނުމާ ދެކޮޅަށް އަޑު އުފުލިއެވެ.