ހޯމް މިނިސްޓަރު އަދި ސަރުކާރު ކޯލިޝަންގައި ހިމެނޭ އަދާލަތު ޕާޓީގެ ރައީސް އިމްރާނު އަބްދުﷲ އަކީ ދިގު މުއްދަތަކަށް ބަޔަކަށް އަޅުދާސްތުވެފައި ހުންނެވި ބޭފުޅެއްކަމަށް ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް) ގެ ތަރުޖަމާނު ހީނާ ވަލީދު ވިދާޅުވެއްޖެއެވެ. 

ހީނާ މިފަދައިން ވިދާޅުވެފައިވަނީ އިސްލާހީ މަސައްކަތްތަކާއި ގުޅޭގޮތުން އިމްރާނު ކުރެއްވި ޓްވީޓަކަށް ރައްދުދެއްވަމުންނެވެ. 

އިމްރާނުގެ ޓްވީޓުގައި ވިދާޅުވީ އިސްލާހީ މަސައްކަތަކީ ހަމައެކަނި ވާހަކަދެއްކުމަކުން ނުވަތަ ކުރު މުއްދަތެއްގެ މަދު މަސައްކަތަކުން ކުރެވޭނެ ކަމެއް ނޫންކަމަށެވެ. އެއާއި ޚިލާފަށް ހެޔޮ ބަދަލެއް ގެނެވޭނީ ވަކި އަމާޒަކަށް ދިގު މުއްދަތެއް ވަންދެން ފޫހިކަމެއް ވަރުބަލިކަމެއް ނެތި ކުރާ މަސައްކަތުންކަމަށެވެ. 

Advertisement

އިސްލާހީ މަސައްކަތް ކުރާނެ ގޮތުގެ ވާހަކަ އިމްރާނު ވިދާޅުވުމާއި ގުޅިގެން ހީނާ ވަނީ ވަރަށް ބޮޑަށް ފާޑުވިދާޅުވެފައެވެ.

އަދި ހީނާ ވަނީ މޭޑޭގެ މުޒާހަރާގައި އެތައް ބައެއްގެ ކުރިމަތީގައި މި އޮތީ ޝަހީދު ޑރ އަފުރާޝީމުގެ ގަތުލާއި ގުޅުންހުރި ހެކިތަކެއްކަމަށް ވިދާޅުވެ ކަރުދާސްތަކެއް ދައްކާ، އިތުރުފުޅު ހެއްދެވީވެސް އިމްރާނު އެ ވިދާޅުވި އިސްލާހީ މަސައްކަތުގެ ތެރެއިންތޯ އައްސަވާ ސުވާލުކުރައްވާފައެވެ. 

މޭޑޭގެ މުޒާހަރާގައި ވާހަކަދައްކަވަމުން އިމްރާނު ވަނީ ޑރ އަފްރާޝީމު ޝަހީދުކޮށްލުމުގެ ފަހަތުގައި ހުންނެވީ އޭރުގެ ރައީސް އަބްދުﷲ ޔާމީން އަބްދުލްގައްޔޫމުކަމަށް ތުހުމަތުކުރައްވާފައެވެ. އަދި އެކަން ހިނގައިދިޔަގޮތް އިމްރާނަށް ރަނގަޅަށް އެނގިވަޑައިގަންނަވާނެކަމަށާއި، އެކަމާއި ގުޅޭ ހެކިތައް އޭނާގެ އަތްޕުޅުގައި ހުރިކަމަށް ވިދާޅުވެފައެވެ.

އިމްރާނު ވަނީ ޝަހީދު ޑރ. އަފްރާޝީމުގެ ގަތުލާއި ގުޅުންހުރި ހެކިތަކެއްކަމަށް ވިދާޅުވެ ކަރިދާސްތަކެއްވެސް ދައްކާފައެވެ. 

އެކަންކަމަށް އިޝާރާތްކުރައްވާ ހީނާ ވިދާޅުވީ އިސްލާހަކީ އިމްރާނު ކުރައްވާ ހީލަތްތެރި ކަންކަމުން ގެނެވޭނެ އެއްޗެއް ނޫންކަމަށެވެ. އަދި އިމްރާނު ހުންނެވީ ދިގު މުއްދަތަކަށް ބަޔަކަށް އަޅުދާސްތުވެފައިކަމަށް ހީނާ ވިދާޅުވިއެވެ. 

މި ފަހަކަށް އައިސް، ހޯމް މިނިސްޓަރު އިމްރާނު ގެންދަވަނީ ރާއްޖޭގައި ސިޔާސީ މަސައްކަތް ކުރަމުންދާ ގޮތަށް ވަރަށް ބޮޑަށް ފާޑުވިދާޅުވަމުންނެވެ. އެގޮތުން ސިޔާސީ މަސައްކަތް ކުރާ ވައްޓަފާޅިވެސް ބަދަލުކުރަން ޖެހޭކަމަށް އޭނާ ވިދާޅުވެފައިވެއެވެ. 

އިމްރާނު މި މޭރުމުން ވާހަކަދައްކަވަން ފަށާފައިވަނީ 2023 ގެ ރިޔާސީ އިންތިޚާބަށް ސިޔާސީ ޕާޓީތަކުން ތައްޔާރުވާން ފަށާފައިވަނިކޮށެވެ. އިމްރާނު ނިސްބަތްވެ ވަޑައިގެންނަވާ އަދާލަތުންވެސް އެ ޕާޓީގެ ސިޔާސީ ހަރަކާތް ފުޅާކުރުމަށް އަތޮޅުތެރެއަށް ވަނީ ދަތުރުތައް ފަށާފައެވެ. 

އެއާއެކު، އިމްރާނަށް ފާޑުކިޔާ ފަރާތްތައް ބުނަމުންދަނީ އޭނާ މި ފަހަކަށް އައިސް ސިޔާސީ ވާހަކަތައް ދައްކަން ފަށާފައިވަނީ، ކުރިއަށް އޮތް އިންތިޚާބުގައި ކޮންމެވެސް ބަޔަކާއެކު ކޯލިޝަން ހެދުމުގެ ބޭނުމުގައިކަމަށެވެ. އަދި ދެން އަންނަ ވެރިކަމެއްގައި އަދާލަތަށް އޮތް ފުރުސަތުތައް އިތުރުކުރުމަށްކަމަށެވެ.