މާފުށީ ޖަލުގައި ބަންދުކޮށްފައި ހުރި ފިރިމީހާއަށް މަސްތުވާތަކެތި ގެންގޮސްދިން އަނބިމީހާގެ މައްސަލަ ބަލަން އަމުރުކޮށްފިއެވެ.

މިމައްސަލައިގައި ހިމެނޭ ނޫރާ މޫސާ ނަމަކަށް ކިޔާ އަންހެން މީހާގެ މައްޗަށް ދައުލަތުން ދައުވާ އުފުލީ 2018 ވަނަ އަހަރުގެ ޖުލައި މަހުގެ ތެރޭގައި މާފުށީ ޖަލުގައި އޮތް ފިރިމީހާއާ ބައްދަލު ކުރަން ޖަލަށް ދިޔައިރު ކޮންޑަމްއެއްގެ މަސްތުވާތަކެތި ޖަލަށް އެތެރެކުރަން އުޅުމުގެ މައްސަލައިގައެވެ. 

އަންހެން މީހާ ބަލައި ފާސްކުރުމުގައި ގާނޫނާއި ޚިލާފުވެފައިވާތީ ކޯޓުގައި އެ މައްސަލަ އަންހެން މީހާގެ މައްޗަށް ސާބިތެއް ނުވިއެވެ. ގާނޫނުގައިވާ ގޮތުން އަންހެނުން ބަލައި ފާސްކުރަން ޖެހޭނީ އަންހެން އޮފިސަރެއް މެދުވެރިކޮށެވެ. މި މައްސަލައިގައި އަންހެން މީހާ ބަލާ ފާސްކުރީ ފިހިރެން އޮފިސަރެކެވެ. 

ކްރިމިނަލް ކޯޓުން އަންހެން މީހާގެ މައްޗަށް ކުށް ސާބިތު ނުވާކަމަށް ކަނޑައެޅުމުން ދައުލަތުންވަނީ އެ ފަހުން އެ މައްސަލަ ހައިކޯޓުގައި އިސްތިއުނާފުކޮށްފައެވެ. 

ހައިކޯޓުން އެ މައްސަލަ ބެލި ތިން ފަނޑިޔާރުންގެ އިއްތިފާގުން ވަނީ އަންހެން މީހާ ބަލާ ފާސްކުރުމުގައި ކަރެކްޝަނުން އަމަލުކޮށްފައިވަނީ ރަނގަޅަށްކަން ބަޔާންކޮށްފައެވެ. 

އެ މައްސަލައާއި ގުޅޭގޮތުން ހައިކޯޓުން ނެރުނު ހުކުމުގައި ބުނެފައިވަނީ އަންހެން ފުލުހަކު ނެތް ހާލަތެއްގައި ޑިއުޓީ އިންޗާޗް އަންގާ ކޮންމެ އަންހެނަކަށް ވެސް އަންހެނަކު ފާސްކުރެވިދާނެ ކަމަށް ފުލުހުންގެ ބާރުތައް ބަޔާންކޮށްފައިިވާ ގަވައިދުގައި އެބައޮތް ކަމަށެވެ. އަދި ޖަލަށް ވަންނަ މީހުން ފާސްކުރުމުގެ ބާރު ކަރެކްޝަނަލް ސާވިސްގެ އޮފިސަރުންނަށް ވެސް ލިބިފައިވާކަމަށެވެ. 

ހައިކޯޓުގެ ނިންމުމުގައި ބުނެފައިވަނީ ނޫރާ މޫސާ ބަލައި ފާސްކުރިއިރު މާފުށީ ޕޮލިސް ސްޓޭޝާންގައި އަންހެން ފުލުހަކު ނެތުމުން ކަރެކްޝަނަލް ސާވިސްގެ އޮފިސަރުން މެދުވެރިކޮށް ނޫރާ މޫސާ ބަލައި ފާސްކޮށްފައި ވަނީ ފުލުހުންނަށް ލިބިދީފައިވާ އެންމެހައި ގާނޫނީ ބާރުތައް ބޭނުންކުރުމާއި ބެހޭ ގަވައިދާއި އެއްގޮތައް ކަމަށެވެ.

އެއާއެކު ހައިކޯޓުން ނިންމީ އެ މައްސަލައަކީ މައުލޫއީގޮތުން ބަލަންޖެހޭ މައްސަލައަކަށް ވާތީ، އެ މައްސަލަ އަނބުރާ ކްރިމިނަލް ކޯޓަށް ފޮނުވުމަށެވެ. ހައިކޯޓުން ވަނީ އެ މައްސަލަ އަލުން ބެލުމަށް ކްރިމިނަލް ކޯޓަށް އަންގާފައެވެ.