މީހުންގެ ބޮލުގައި ޒިނޭގެ ތުހުމަތުއަޅުވާ ނުވަތަ ޣަޒުފުކުރާ މީހުންގެ މައްޗަށް އިސްލާމްދީނުގައި ކަނޑައަޅާފައިވާ ހައްގު އަދަބު ދީ، ޣަޒުފުގެ ހުކުމް ތަންފީޒުކުރުމަށް އަބްދުއްލަތީފު (ކަޅުބެ އަބްދުއްލަތީފު) ގޮވާލައިފިއެވެ. 

އޭނާ ޣަޒުފުގެ ހުކުމް ތަންފީޒުކުރުމަށް ގޮވާލާފައިވަނީ އަމިއްލަ ޅެމަކުންނެވެ. އެ ޅެމަށް ގިނަ ބައެއްގެ ސަމާލުކަން ވަނީ ލިބިފައެވެ. 

ކަޅުބެ އަބްދުއްލަތީފަކީ މި ސަރުކާރު ކޯލިޝަންގައި ހިމެނޭ އަދާލަތު ޕާޓީގެ އިލްމުވެރިންގެ މަޖިލީހުގެ ނައިބު ރައީސް ޑރ. އިޔާޒް އަބްދުލް ލަތީފްގެ ބައްޕަ، އަދި ޕްރޮސެކިއުޓާ ޖެނެރަލް، ހުސައިން ޝަމީމްގެ ބޮޑުބޭބެ އެވެ.

Advertisement

ޣަޒުފުގެ ހުކުމް ތަންފީޒުކުރުމަށް ޅެން ބައިތުތަކުން އޭނާ ސަރުކާރަށް ގޮވާލާފައިވަނީ ރައްޔިތުންގެ މަޖިލީހުގެ ރައީސް އަދި ސަރުކާރު ހިންގާ މައި ޕާޓީ އެމްޑީޕީގެ ރައީސް މުހައްމަދު ނަޝީދު، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އިސްތަށިފުޅުގައި ޒިނޭގެ ތުހުމަތު އަޅުވާފައިވާ ދަނޑިވަޅެއްގައެވެ. 

ރައީސް ނަޝީދުގެ ކޮއްކޮ ނާޒިމް ސައްތާރު ބަންގްލަދޭޝްގެ ރައްޔިތެއްކަމަށްވާ އަލަމްގިރި އާއެކު އެއްޖިންސުން ގުޅުންހިންގި މައްސަލައިގައި ހައްޔަރުކުރުމާއި ގުޅިގެން ނަޝީދުވަނީ އެމްޑީޕީގެ ވަޓްސްއަޕް ގުރޫޕުގައި ރައީސް ސޯލިހު އަންހެން ކުއްޖަކާއެކު ޒިނާކުރާތަން ފެނިގެންދާ ފޮޓޯތަކެއް އޭނާއަށް ލިބިވަޑައިގެންފައިވާކަމަށް ވިދާޅުވެފައެވެ.

އެފަހުން ނަޝީދު އެއީ ވިދާޅުނުވާ ވާހަކައެއްކަމަށް ހައްދަވަން މަސައްކަތްޕުޅު ކޮށްފައިވާއިރު، މިހާތަނަށް ނަޝީދުގެ އެ ތުހުމަތުތަކާއި ގުޅިގެން ކަމާގުޅުންހުރި އިދާރާއަކުން އެ މައްސަލަ ބަލާފައެއް ނުވެއެވެ. 

ކަޅުބެ އަބްދުއްލަތީފުގެ ޅެމުގައި ވަނީ ޣަޒުފުގެ ނުބައިކަމާއި، އެކަން ކުރާ މީހުން ހުއްޓުވުމުގެ މުހިންމުކަމުގެ މައްޗަށް އަލިއަޅުވާލާފައެވެ. 

އަދި ގައުމުގެ ވަލީއުލް އަމުރުގެ އިސްތަށިފުޅުގައި ޒިނޭގެ ތުހުމަތުއެޅުވުމަށްފަހު އެއަށް ޖަވާބުދާރީ ނުވެ ނުހުރެވޭނެކަމަށް އޭނާގެ ޅެމުގައި ބުނެފައިވެއެވެ. 

ޅެމުގައި ވަނީ، މާ އިހުއްސުރެ އިސްލާމްދީނުގައި އޮންނަ ހައްދު ނުޖެހޭ ފާސިގަކީ ދިވެހިންގެ އިއްޒަތްތެރިއަކަށް ބެލިދާނެތޯ ސުވާލު އުފައްދާފަ އެވެ. އަދި އެންމެންގެ ތެރޭގައި (ދައުލަތުގެ) އެންމެ އިސްވެރިޔާ އަށް ގަޒުފުކޮށް، އެއީ ނުބުނާ ބަހެއް ކަމަށް ނުހެދޭނެ ކަމަށާއި ހެކި ނެތް ނަމަ ހައްދު ޖަހަން ޖެހޭނެ ކަމަށް ޅެމުގައި ބުނެފައިވެ އެވެ.

ރައީސް ނަޝީދު ރައީސް ސޯލިހުގެ އިސްތަށިފުޅުގައި ޒިނޭގެ ތުހުމަތު އަޅުވާ، އެމަނިކުފާނު ޒިނޭކުރާތަން ފެންނަ "ހަތަރު ގަނޑު ފޮޓޯ" ނަޝީދަށް ލިބިވަޑައިގެންކަމަށް ވިދާޅުވިފަހުން އޭނާ ވަނީ، އެ ފޯޓަށް ލިބިވަޑައިގެން ފޯނު އިގިރޭސި ވިލާތުގައި ހުންނަވަނިކޮށް މީހަކު ޖަހައިގެންކަމަށް ވިދާޅުވެފައެވެ. 

އެ މައްސަލަ އިނގިރޭސި ވިލާތުގެ ފުލުހަށް ރިޕޯޓުކޮށްފައިވެސް ނުވާނެކަމަށް ނަޝީދު ވަނީ ވިދާޅުވެފައެވެ. ނަޝީދު ރައީސް ސޯލިހުއަށް ޒިނޭގެ ތުހުމަތު ކުރެއްވިކަމަށް ހަދާފައިވަނީ ނޫސްތަކުންކަމަށް ނަޝީދުވަނީ އެފަހުން އޭނާ ދެއްވި ޕްރެސްކޮންފަރެނސްއެއްގައި ވިދާޅުވެފައެވެ. 

ނަޝީދުގެ އެ ތުހުމަތުތަކަށް ރައީސް ސޯލިހުވަނީ ރައީސް އޮފީހުގެ ކުރީގެ ތަރުޖަމާނު މަބުރޫކު އަޒީޒު މެދުވެރިކުރައްވާ އިންކާރުކުރައްކާކަން ހާމަކުރައްވާފައެވެ. އަދި އެމަނިކުފާނު އެފަދަ އަމަލެއް ނުކުރައްވާކަމުގެ ޔަގީންކަން ދެއްވާކަމަށް ތަރުޖަމާނު މެދުވެރިކޮށް ރައީސް ސޯލިހު ވަނީ ވިދާޅުވެފައެވެ.