މިމަހު ފަހުކޮޅުން ފެށިގެން ފްލޯޓިންގ ސިޓީގެ ނަމޫނާ ގެތަކެއް އާއްމުންނަށް ދައްކާލުމަށް ތައްޔާރުވަމުންދާ ކަމަށް އެ ޕްރޮޖެކްޓުގެ ދިވެހި ކޮންސަލްޓަންޓު ބުނެފިއެވެ.

ރާއްޖޭގައި ފްލޯޓިން ސިޓީ ތަރައްޤީކުރުމުގެ މަސައްކަތް ކުރިއަށްގެންދަނީ ނެދަލެންޑްސްގެ ޑަޗް ޑޮކްލޭންޑު ކުންފުނިންނެވެ.

މިދިޔަ ފެބްރުއަރީމަހުގެތެރޭ ފްލޯޓިންގ ސިޓީގެ ފުރަތަމަ ގެތައް އިމާރާތްކުރުމުގެ މަސައްކަތްވަނީ ބައިސަން މޯލްޑިވްސް އާއި ހަވާލުކޮށްފައެވެ.

އެ މަޝްރޫއުގެ ދިވެހި ކޮންސެލްޓަންޓަކީ އިބްރާހިމް ރިޔާޒެވެ. ދާދިފަހުން ދައުލަތުގެ މީޑިއާއަަށް ރިޔާޒު ދިން އިންޓަރވިއުއެއްގައި ވިދާޅުވީ ވިއްސާރައާއި ގުޅިގެން އާއްމުންނަށް އެތަން ދައްކާލުން ލަސްވެފައިވީ ނަމަވެސް މިމަހު މެދުތެރޭ މޫސުން ރަނގަޅުވާއެކު އެތަނުގެ މޮޑެލްތައް ދައްކާލާނެކަމަށެވެ. 

ރިޔާޒު ވިދާޅުވީ ފްލޯޓިން ސިޓީ ބަލާލަން ބޭނުންވާ ފަރާތްތަކަށް ނަންނޯޓު ކުރުމުގެ ފުތުސަރު ވެބްސައިޓު މެދުވެރިކޮށް ހުޅުވާލާނެކަމަށާއި، އެތަން ބަލާލަން ދާން ބޭނުންވާ ފަރާތްތަކަށް ޓްރާސްޕޯޓުވެސް ހަމަޖައްސާދެވޭނެކަމަށެވެ. 

ނަމޫނާއެއްގެގޮތުގައި ދައްކާލުމަށް ހަމަޖެހިފައިވަނީ ފްލޯޓިންގ ސިޓީގެ މަގެކެވެ. އެ މަގުގެ ދެ ފަރާތުގައި ގެތައް ހުންނާނެ ކަމަށާއި، މަގުގައި ގަސްތައްވެސް ހުންނާނެ ކަމަށް ރިޔާޒް ވިދާޅުވިއެވެ. މިއާއެކު ފްލޯޓިންގ ސިޓީ ނިމިގެންދާއިރު ހުންނާނެ ގޮތް ސިފަވެގެންދާނެއެވެ.

ފްލޯޓިންގ ސިޓީ ތަރައްޤީކުރަމުންދަނީ މާލެ އަތޮޅު އާރަށް ކައިރީ އޮންނަ ފަޅެއްގައެވެ. މާލެއިން ފްލޯޓިންގ ސިޓީއަށް ލޯންޗުގައި 10 މިނެޓުން ދެވޭނެއެވެ.

ފްލޯޓިން ސިޓީ ތަރައްޤީކުރަނީ 20000 މީހުންގެ އާބާދީއަކަށް އަމާޒްކޮށެވެ. ފްލޯޓިން ސިޓީގެ މިމަޝްރޫޢު ނިމިގެންދާއިރު މިސަރަޙައްދަށް ރިސޯޓުތަކާއި ސިޓީ ހޮޓާތަކާއި ބޮޑެތި ފިހާރަތަކުގެ އިތުރުން ސިއްޙީ ޚިދުމަތާއި ސްކޫލްތައް އައުމާއެކު މިއީ އިތުރަށް އުފެދޭ ވަޒީފާތައްކަމަށް މަސައްކަތުގެ ލޯކަލް ކޮންސަލްޓަންޓް ފާހަގަކުރައްވައެވެ.