އެތައް ދުވަހަކަށްފަހު ބޮޑު ޚަރަދެއްކޮށްގެން ހުޅުމާލޭ ދެވަނަ ފިޔަވަހީގައި މި ސަރުކާރުން އަޅާދިނީ ވަރަށް ފެންވަރު ދަށް ސުކޫލެއްކަމަށް ކުރީގެ ނައިބުރައީސް ޑރ. މުހައްމަދު ޖަމީލު އަހުމަދު ވިދާޅުވެއްޖެއެވެ.
ޑރ. ޖަމީލު މިފަދައިން ވިދާޅުވެފައިވަނީ ހުޅުމާލޭގެ ދެވަނަ ފިޔަވަހީގައި ހުޅުވާދިން ސުކޫލަށް ފާޑުވިދާޅުވެ ކުރެއްވި ޓްވީޓެއްގައެވެ.
ޑރ. ޖަމީލު ވިދާޅުވީ އެ ސުކޫލު ދައްކުވައިދެނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާއި ސަރުކާރު ހިންގާ މައި ޕާޓީ އެމްޑީޕީގެ ވިސްނުމުގެ ފެންވަރުކަމަށެވެ. އެތައް ޚަރަދުތަކެއްކޮށް ގިނަ ދުވަސްތަކަށްފަހު ސަރުކާރުން ރައްޔިތުންނަށް ހަދިޔާކުރީ "ޓިނު ސުކޫލެއް" ކަމަށް އޭނާ ވިދާޅުވިއެވެ.
"މި ފެންނަނީ ރައީސް ސޯލިހުއާއި އެމްޑީޕީގެ ވިސްނުން، އެތައް ޚަރަދެއްކޮށް އެތައް ދުވަހެއް ފަހުން ހަދިޔާ މިކުރީ އެޓިނު ސްކޫލެއް" ޑރ ޖަމީލު ވިދާޅުވިއެވެ.
އެކަން ފާހަގަކުރައްވާ އޭނާ އިތުރަށް ވިދާޅުވީ ހުޅުމާލޭގައި މީހުން އާބާދުވާން ފަށާ، މިހާ ދުވަސްވެގެންދާއިރު މިހާރުވެސް އެތަނުގައި ކުރީގެ ރައީސް އަބްދުﷲ ޔާމީން އަބްދުްގައްޔޫމުގެ ޒައާމަތުގައި އަޅުއްވާދެއްވި ހިޔާ ފްލެޓުތައް ފެންނަނީ ވަރަށް ޒަމާނީ ރީތި އިމާރާތްތަކުގެ ގޮތުގައިކަމަށެވެ.
އެފަދަ ތަރައްގީއަށް ރައްޔިތުން ލޯބިކުރާނަމަ، މި ހާލަތު ބަދަލުކުރަން ޖެހޭކަމަށާއި، އެކަން ކުރެވެން އޮތީ 2023 ގެ ރިޔާސީ އިންތިޚާބުން ރައީސް ސޯލިހުގެ ސަރުކާރު ބަދަލުކޮށްގެންކަންވެސް ޑރ. ޖަމީލުގެ ޓްވީޓުގައި ވަނީ ވިދާޅުވެފައެވެ.
ހުޅުމާލޭގެ ދެވަނަ ފިޔަވަހީގައި ހުޅުވި ޕްރައިމަރީ ސުކޫލަކީ މިހާތަނަށް ހުޅުމާލޭ ދެވަނަ ފިޔަވަހީގައި ހުޅުވި ފުރަތަމަ ސުކޫލެވެ.
އެ ސުކޫލު އިމާރާތްކޮށްފައިވަނީ އެންމެ ޒަމާނީ ފެންވަރަށް ނޫންކަމަށް ގިނަ ފަރާތްތައް ފާހަގަކުރަމުންދާއިރު، އަސާސީ ގިނަ ޚިދުމަތްތަކެއް ހުޅުމާލޭގެ ދެވަނަ ފިޔަވަހީގައި ދިރިއުޅޭ ރައްޔިތުންނަށް ލިބެން ނެތްކަން އެތަނުގައި ދިރިއުޅޭ ގިނަ ބަޔަކު ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
