މިދިޔަ މާޗް މަހުގެ ތެރޭގައި އައްޑޫސީޓީގައި ހަ އަހަރުގެ ކުއްޖަކަށް ޖިންސީ ގޯނާކުރި މައްސަލައިގައި، އެކަމުގެ ޝިކާރައަކަށް ވި ކުއްޖާއަށް އިންސާފު ލިބިފައިވޭތޯ ބެލުމަށް، ކަމާބެހޭ ފަރާތްތައް ހާޒިރުކޮށްގެން މިއަދު ބޭއްވި ރައްޔިތުންގެ މަޖިލީހުގެ ހިއުމަންރައިޓްސް އެންޑް ޖެންޑާ ކޮމިޓީގެ ބައްދަލުވުން ސިއްރު ކޮށްފިއެވެ.

އުމުރުން 6 އަހަރުގެ ކުއްޖަކަށް ޖިންސީ ގޯނާ ކޮށްފައިވާކަމަށް ތުހުމަތުކުރެވޭ މައްސަލަ އާއި ގުޅިގެން 59 އަހަރުގެ އާމިންދައްތަ 24 މާރިޗު ވަނަ ދުވަހުގެ ވަގުތެއްގައި ކޯޓު އަމުރެއްގެ ދަށުން ހައްޔަރުކޮށް ބަންދާއިމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތުން ގޮތެއް ނިމެންދެން ބަންދު ކުރުމަށް ކޯޓުން ވަނީ އަމުރުކޮށްފައެވެ.

ކޯޓުން ނެރުނު އެ އަމުރުގެ މައްސަލަ ހައިކޯޓުގައި އާމިންދައްތަގެ ފަރާތުން އިސްތިއުނާފުކުރުމުން އެ އަމުރު ނެރެފައިވަނީ ރަނގަޅަށް ކަމަށް އެ ކޯޓުންވެސް ވަނީ ކަނޑައެޅާފައެވެ. ހައިކޯޓުގެ އެ ނިންމުން ސުޕްރީމް ކޯޓުގައި އޭނާގެ ފަރާތުން އިސްތިއުނާފުކޮށްފައިވާއިރު މިއަދު ސްޕްރީމްކޯޓުގައި އޮތް އެ މައްސަލައިގެ އަޑުއެހުމުގައި ސްޕްރީމް ކޯޓުންވެސް ވަނީ ހައިކޯޓުގެ އެ ނިންމުން ދަމަހައްޓާފައެވެ.

Advertisement

އެ މައްސަލަ ބެލުމަށް ކޮމިޓީން މިއަދު ބޭއްވި ބައްދަލުވުމަށް، ޖެންޑާ މިނިސްޓްރީ އާއި އެޑިއުކޭޝަން މިނިސްޓްރީ އާއި މޯލްޑިވްސް ޕޮލިސް ސާވިސް އާއި ޕްރޮސިކިއުޓާޖެނެރަލް އޮފީހާއި ސިވިލްސާވިސް ކޮމިޝަންގެ ބޭފުޅުން ހާޒިރު ކުރިއެވެ.

މިއަދުގެ ކޮމިޓީ ބައްދަލުވުން ފައްޓަވަމުން އެ ކޮމިޓީގެ މުގައްރިރު ހިންނަވަރު ދާއިރާގެ މެންބަރު ޖީހާން މަހްމޫދު ވިދާޅުވީ، އެ މައްސަލައިގައި ކަމާބެހޭ މުއައްސަސާތަކަށް ކޮމިޓީ މެންބަރުންގެ ސުވާލުތަކެއް އެބަހުރި ކަމަށެވެ.

އެޑިއުކެޝަން މިނިސްޓްރީގެ ފަރާތުން މި މައްސަލައަކީ ކުޑަކުއްޖެއްގެ ކަރާމާތާ ގުޅުންހުރި މައްސަލައަކަށްވާތީ ކޮމިޓީ ބައްދަލުވުން ސިއްރުކޮށްދިނުމަށް އެދި ވަނީ ހުށަހަޅާފައެވެ.