ބަންގަލަދޭޝްގެ ރައްޔިތެއްކަމަށްވާ އަލަމްގިރިއާއެކު އެމްޑީޕީގެ ރައީސް މުހައްމަދު ނަޝީދުގެ ކޮއްކޮ އަދި ގާނޫނީ ވަކީލު ނާޒިމް ސައްތާރު އެއްޖިންސުން ގުޅުހުން ހިނގާތަން ފެނިގެންދާ ވީޑިއޯއެއް އާންމުވެފައިވީނަމަވެސް، އެ މައްސަލަ ނުބެލުމަށް ބާ ކައުންސިލުން ނިންމައިފިއެވެ. 

ނާޒިމް ސައްތާރު އެއްޖިންސުން ގުޅުން ހިންގާތަން ފެނިގެންދާ ވީޑިއޯއެއް އާނމުވުމާއި ގުޅިގެން، އެ މައްސަލައިގެ ތަހުގީގު ފަށައި، ފުލުހުން އޭނާގެ ޕާސްޕޯޓު ހިފެހެއްޓުމާއި ގުޅިގެން ނާޒިމް ސައްތާރުގެ ސުލޫކީ މައްސަލައެއް ވަނީ ބާ ކައުންސިލަށް ހުށައަޅާފައެވެ. 

އެ މައްސަލަ ބާ ކައުންސިލަށް ހުށައެޅުއްވީ ގާނޫނީ ވަކީލު އަހުމަދު ތާލިބެވެ. 

Advertisement

މިދިޔަ ޖުލައި މަހު އެ މައްސަލަ ބާ ކައުންސިލަށް ހުށަހަޅުއްވާ ތާލިބު އެދިވަޑައިގަތީ ދައުރުވަމުންދާ ވީޑިއޯ އާއި ގުޅިގެން ގާނޫނީ ވަކީލުންނާއި ދޭތެރޭ އަދި ބާ ކައުންސިލާއި ދޭތެރޭ އާންމުން ދެކޭ ގޮތް ބަދަލުވަމުންދާތީ އެ މައްސަލަ ބަލާ، ނާޒިމް ސައްތާރުގެ ވަކީލުގެ ކަމުގެ ހުއްދަ ވަގުތީ ގޮތުން ބާތިލުކޮށްދިނުމަށެވެ.

ތާލިބު ރާއްޖޭގެ އޮންލައިން ނޫހެއްކަމަށްވާ "ވަގުތަށް" ދެއްވި އިންޓަރވިއުއެއްގައި ވަނީ އެ މައްސަލަ ހުށައެޅުއްވިތާ ދެ މަސްފަހުން ބާ ކައުންސިލުން މައްސަލަ ނުބަލަން ނިންމާފައިވާކަން އޭނާއަށް އަންގާފައިވާކަމަށް ވިދާޅުވެފައެވެ. 

މައްސަލަ ނުބަލަން ނިންމި ސަބަބާއި ގުޅިގެން ބާ ކައުންސިލުން ބުނީ ވަކީލަކާއި ގުޅޭ ސުލޫކީ މައްސަލައެއް ބާ ކައުންސިލަށް ހުށައެޅޭނީ ގާނޫނީ ވަކީލަކާއި ހަވާ ލުކުރާ މަސައްކަތަކާއި ގުޅިގެން އަމަލުކުރާ ގޮތެއްގެ ސަބަބުން ކަމަށެވެ.

އަދި، އެއްޖިންސުން ގުޅުންހިންގާ ވީޑިއޯތަކަކީ ސުލޫކީ މައްސަލައެއް ބެލިދާނެ ފަދަ ޝަކުވާއެއް ކަމަށް ބާ ކައުންސިލްގެ އެގްޒެކެޓިވް ކޮމެޓީއަށް ނުފެންނަ ކަމަށް ވަނީ ނިންމާފައެވެ.

ނާޒިމް ސައްތާރު އެއްޖިންސުން ގުޅުންހިންގި މައްސަލައިގައި އޭނާގެ މައްޗަށް ދައުވާކުރުމަށްވެސް ވަނީ ނިންމާފައެވެ. 

އެއްޖިންސުން ގުޅުން ހިންގުމަކީ އިސްލާމްދީން ނަހީކުރާ ބޮޑު މުންކަރާތަކަށްވާއިރު، ގާނޫނައި އޮތް ލޫޕް ހޯލެއްގެ ސަބަބުން ނާޒިމް ސައްތާރުގެ ސުލޫކީ މައްސަލަ ނުބެލޭނެކަމަށް ކަނޑައެޅުމަކީ ކަންބޮޑުވުން އޮތް މައްސަލައެއްގެ ގޮތުގައި އެ މައްސަލަ ހުށައެޅުއްވި ފަރާތުން ވަނީ ފާހަގަކޮށްފައެވެ.