ބަންގްލަދޭޝްގެ ރައްޔިތެއްކަމަށްވާ އަލަމްގިރިއާއެކު އެއްޖިންސުން ގުޅުން ހިންގި މައްސަލައިގައި އިތުރު ތިން މީހަކު ހައްޔަރުކޮށްފިއެވެ.

އެ މައްސަލައިގައި އިތުރު ތިން މީހުން ހައްޔަރުކޮށްފައިވާކަން ފުލުހުން ވަނީ ކަށަވަރުކޮށްފީދައެވެ. އެގޮތުން ބުނީ ހައްޔަރުކޮށްފައިވަނީ އުމުރުން 45 އަހަރުގެ މީހަކާއި، 47 އަހަރުގެ މީހަކާއި 49 އަހަރުގެ މީހެއްކަމަށެވެ.

ހައްޔަރު ކުރި ތިން މީހުންގެ ތެރެއިން އުމުރުން 45 އަހަރުގެ މީހާގެ ބަންދަށް ކޯޓުން ފަސް ދުވަސް ޖެހިއިރު އުމުރުން 47 އަހަރުގެ މީހާގެ ބަންދަށް 14 ދުވަސް ކޯޓުން ޖަހައިފައިވާ ކަމަށް ފުލުހުން ބުންޏެވެ. އެހެން ނަމަވެސް އެމީހުންގެ ވަނަވަރު ފުލުހުން ހާމަކޮށްފައެއް ނުވެއެވެ.

ހަމައެއާއެކު ހައްޔަރުކުރި މީހުންގެ ތެރެއިން އުމުރުން 49 އަހަރުގެ މީހާގެ ބަންދަށް ވެސް 14 ދުވަސް ޖަހާފައިވާ ކަމަށް ފުލުހުން ވަނީ ބުނެފައެވެ.

އެއްޖިންސުން ގުޅުންހިންގި މައްސަލައާއި ގުޅިގެން އަލަމްގިރި ފުލުހަށް ހާޒިރުކުރުމުން، ދިން ބަޔާނުގައި އޭނާ ވަނީ އެތައް ބަޔަކާއެކު އެއްޖިންސުން ގުޅުން ހިންގާ، އަދި އެ އަމަލު ހިންގަމުން ދިޔައިރު، އޭނާ ގެންގުޅުނު ފޯނަކުން ރިކޯޑުކުރިކަމަށް އެއްބަސްވެފައެވެ.

އެގޮތުން 50އަށް ވުރެ ގިނަ ވީޑިއޯ ރިކޯޑުކޮށްފައިވާނެކަމަށް އަލަމްގިރި ވަނީ އެއްބަސްވެފައެވެ.

އޭނާ ފުލުހަށް ދިން ބަޔާނުގައި ބުނެފައިވާ ގޮތުންނަމަ، އޭނާ ވީޑިއޯކުރަން ގެންގުޅުނު ފޯނު ވަނީ ބަޔަކު ވަގަށް ނަގާފައެވެ. އެ ފޯނުގައި ހުރި ވީޑިއޯތައް ބޭނުންކޮށްގެން މީހުން ބްލެކުމެއިލް ކުރީ ފޯނު ވަގަށް ނެގި މީހާކަމަށް ބެލެވޭކަމަށް އަލަމްގިރި ބުނެފައިވެއެވެ.

ބްލެކްމެއިލް ކުރި މައްސަލައާއި ގުޅިގެން ފުލުހުންގެ ޕްރޮޓެކްޓިވް ޑިޕާރޓުމަންޓުގައި މަސައްކަތްކުރަމުންދިޔަ ސާޖެންޓު އިބްރާހިމް ހަނީފުވަނީ މުސާރައާއެކު ސަސްޕެންޑުކޮށްފައެވެ. ހަނީފަކީ އަލަމްގިރި އޭރު ދިރިއުޅެމުންދިޔަ ގޭގެ ވެރިފަރާތުގެ ކޮއްކޮގެ ފިރިމީހާއެވެ. އަލަމް ގިރި އެގޭގައި އުޅުނުއިރު، ހަނީފު އެގެއަށް ޒިޔާރަތްކޮށްފައިވާކަމަށް އޭނާ ފުލުހުންނަށް ދިން ބަޔާނުގައި ބުނެފައިވެއެވެ.