ބޯޓު ފަހަރު ބަނދަރުކުރުމަށް ދިޔަނެރުފަޅާއި ޖެހިގެން އޮންނަ ފަޅު ތަރައްގީކުރުމަށް ސަރުކާރުން ނިންމައިފިއެވެ. 

އެކަން ހާމަކުރައްވާފައިވަނީ ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މިއުވާން މުހައްމަދުއެވެ. 

އެ މަސައްކަތާއި ގުޅޭގޮތުން މިއުވާން ވިދާޅުވީ ނިމިދިޔަ ހަފްތާގައި ބޯޓިން އެސޯސިއޭޝަންގެ އެގްސެކްޓިވް ބޯޑާއެކު ބޭއްވި ބައްދަލުވުމަށްފަހުގައިކަމަށެވެ. 

Advertisement

އެ ބައްދަލުވުމުގައި ރައީސުލް ޖުމްހޫރިއްޔާ ވަނީ ރާއްޖޭގައި ބޯޓިންގެ ޚިދުމަތަށް ފުޅާކުރުމަށް ހުރި ގޮންޖެހުންތަކާއި ގުޅިގެން މަޝްވަރާކުރައްވާފައިކަމަށް މިއުވާން ވިދާޅުވިއެވެ. 

އެފަހުން ޔޮޓް އެސޯސިއޭޝަނާއިވެސް ބައްދަލުކުރެއްވިކަމަށާއި، އެ ބޭފުޅުންހުރި ކަންބޮޑުވުންތަކާއި ގުޅިގެންވެސް މަޝްވަރާކޮށްފައިވާކަމަށް އޭނާ ވިދާޅުވިއެވެ. 

އެ މަޝްވަރާތަކަށްފަހު ރައީސް ސޯލިހު ބޯޓުތައް ބަނދަރުކުރުމަށް ދިޔަނެރުފަޅާއި ޖެހިގެން އޮތްފަޅު ތަރައްގީކުރުމަށް ނިންމަވާފައިވާކަން ހާމަކުރައްވާފައިވާކަމަށް ތަރުޖަމާނު ވިދާޅުވިއެވެ. 

"ރައީސް ވަނީ ބޯޓުތައް، އަދި ސަފާރީތައް ބަނދަރުކުރުމަށް ބަނދަރެއް ދިޔަނެރުފަޅާއި ޖެހިގެން އޮންނަ ފަޅުގައި ތަރައްގީކުރުމަށް ސަރުކާރުން ނިންމާފައިވާކަން ހާމަކުރައްވާފަ" މިއުވާން ވިދާޅުވިއެވެ. 

އެފަޅު ތަރައްގީ ކުރުމުގެ ޕްލޭނާއި ގުޅޭގޮތުން މައުލޫމާތު ދެއްވަމުން މިއުވާން ވިދާޅުވީ، ބަނދަރު ތަރައްގީކުރުމަށް ބިންހިއްކުމުގެ މަސައްކަތް މިއަހަރުގެ ނޮވެމްބަރު މަހު ފަށާނެކަމަށެވެ. އެއާއެކު އަންނަ އަހަރުގެ މެދުތެރޭގައި އެ މަސައްކަތް މުޅިން ނިންމާލެވި އެ ބަނދަރު ބޭނުންކުރަން ފެށޭނެކަމަށް އުންމީދުކުރައްވާކަމަށް އޭނާ ވިދާޅުވިއެވެ. 

މިއުވާން ވިދާޅުވީ، ދިޔަނެރުފަޅާއި ޖެހިގެން އޮތް ފަޅުގައި ތަރައްގީކުރާ ބަނދަރުގައި ޖަނަރޭޓަރާއި ނުލައި ކަރަންޓުގެ ޚިދުމަތް ލިބޭނެ އިންތިޒާމުތައް ގާއިމުކުރާނެކަމަށެވެ. އޭގެ އިތުރުން ފެނާއި ނަރުދަމާގެ ޚިދުމަތްތެވެސް ގާއިމްކުރާނެކަމަށެވެ. 

އެ ބަނދަރު ތަރައްގީވުމާއެކު، ބޯޓު ފަހަރާއި ޔޮޓުފަހަރު ގެންގުޅޭ ފަރާތްތަކަށް ވަރަށް ބޮޑު ލުއިފަސޭހަތަަކެއް ލިބިގެންދާނެކަންވެސް އޭނާ ފާހަގަކުރެއްވިއެވެ.