ޕީޕީއެމްގެ ރައީސް އަދި ކުރިއަށް އޮތް ރިޔާސީ އިންތިޚާބުގައި އެ ޕާޓީގެ ރިޔާސީ ކެންޑިޑޭޓް އަބްދުﷲ ޔާމީން އަބްދުލްގައްޔޫމުގެ މައްޗަށް ނުހައްގުން ހުކުން ކޮށްފި ނަމަ، މި ސަރުކާރަށް 5 އަހަރުގެ ދައުރެއް ފުރިހަމަ ކުރަން ޕީޕީއެމުން ފުރުސަތު ނުދޭނެކަމަށް އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް އިބްރާހިމް ޝުޖާއު ވިދާޅުވެއްޖެއެވެ. 

ޝުޖާއު މިފަދައިން ވިދާޅުވެފައިވަނީ ޕީޕީއެމް އޮފީހުގައި ބޭއްވި ޖަގަހަ ޖަލްސާގައި ވާހަކަދައްކަވަމުންނެވެ. 

އޭނާ ވިދާޅުވީ ރައީސް ޔާމީންއަށް ޕީޕީއެމްގެ ރިޔާސީ ޓިކެޓު ހަވާލުކުރި ހިސާބުން، ސަރުކާރުން އަނިޔާ ދޭން ފަށާފައިވާކަމަށެވެ. އެގޮތުން އެމަނިކުފާނުގެ މައްޗަށް ވ. އާރަށުގެ މުއާމަލާތާއި ގުޅިގެން އުފުލާފައިވާ ދައުވާތަކާއި ގުޅޭ ޝަރީއަތުގެ ސްޕީޑުވެސް ހަލުވިކޮށްފައިވާކަމަށް ޝުޖާއު ވިދާޅުވިއެވެ. 

އޭގެ އިތުރުން އެ ޝަރީއަތަށް ސަރުކާރުން ބޮޑެތި ނުފޫޒުތަކެއް ފޯރުވަމުންދާކަމަށްވެސް ޝުޖާއު ވަނީ ތުހުމަތުކުރައްވާފައެވެ. 

ވ. އާރަށުގެ މައްސަލައިގެ ޝަރީއަތުގެ އަޑުއެހުމެއް ހޮނިހިރު ދުވަހަށް ތާވަލުކުރުމާއި ގުޅިގެންވެސް ޝުޖާއު ވަނީ ނުރުހުން ފާޅުކުރައްވާފައެވެ. އޭނާ ވިދާޅުވީ، ހަފްތާ ބަންދަށް ރައީސް ޔާމީންގެ ޝަރީއަތުގެ އަޑުއެހުމެއް ތާވަލުކުރުވީ ރައީސް އޮފީހުން ނުފޫޒު ފޯރުވައިގެންކަމަށެވެ. 

ރައީސް އޮފީހުގައި ހިނގާ ކަންކަމާއި ގުޅޭ މައުލޫމާތުތައް ބަރާބަރަށް އޭނާއަށް ލިބިވަޑައިގަންނަވާކަމަށް ޝުޖާއު ވިދާޅުވިއެވެ. 

"އަޅުގަނޑުމެން ރައްޔިތުން މި އުފައްދާ ސުވާލަކީ، ޕްރޮސެކިއުޓަރ ޖެނެރަލް މިއަދު ހުރީ ކޮން ހާލަތެއްގައިތޯ؟ އޭނަ އަސްލައްތޯ ހިނގަނީ ނޫނީ އިބްރާހިމް މުހައްމަދު ސޯލިހު ބަޓަނަށް އޮބީމަ ހިނގާ މީހެއްތޯ؟ އޭނަގެ ކަރަށް އޮތީ ކޮންކަހަލަ ވަލެއްތޯ ލާފަ. އެވަލަށް ދަމަން ތިބީ ކޮން ބައެއްތޯ ރައީސް އޮފީސްތެރޭން؟" ޝުޖާއު ސުވާލު އުފެއްދެވިއެވެ. 

ޝުޖާއު ވިދާޅުވީ ޕީޖީއަށް ސަރުކާރުން ފޯރުވަމުންދާ ނުފޫޒަކީ ރައީސް ޔާމީންގެ ޝަރީއަތަށް ފޯރުވާ ނުފޫޒު ފެށޭ ހިސާބުކަމަށެވެ. 

"ރައީސް ޔާމީން އެ އޮންނެވީ ގޭގައި އާލާސްކަންފުޅާ. މިއަދު ޕީޖީ އަށް ރައީސް އޮފީހުން ބަޓަނުން ފިތާފަ މި ބުނަނީ ރައީސް ޔާމިންގެ ޝަރީއަތް އެޖެންޑާ ކުރަން ޖެހޭނެއޭ ހަފްތާ ބަންދަށް. ބައްލަވާ ހަމަ ބުނުމާއެކު، ޖޭއެސްސީގެ ތެރެއިން ފަނޑިޔާރު މަނިކުފާނަށް އެ ނުފޫޒު އެދަނީ މި ހަފްތާ ބަންދުގެ ތެރޭގައި ޖެހޭނެއޭ ރައީސް ޔާމީންގެ މައްސަލަ ތާވަލްކުރަން" ޝުޖާއު ވިދާޅުވިއެވެ. 

އާލާސްކަންފުޅާއި އުޅުއްވާތީ ރައީސް ޔާމީންގެ ޝަރިއަތުގެ އަޑުއެހުމެއް ބުރާސްފަތި ދުވަހު ބޭއްވުމަށް ތާވަލްކުރުމަށްފަހު ވަނީ ކެންސަލްކޮށްލާފައެވެ. އަދި އެ އަޑުއެހުން އެފަހުން ވަނީ މި މަހުގެ 25 ވަނަ ދުވަހަށް ތާވަލްކުރުމަށްފަހު، ހޮނިހިރު ދުވަހަށް އަވަސްކޮށްފައެވެ. 

މިކަންކަމަށް އިޝާރާތްކުރައްވާ ޝުޖާއު ވިދާޅުވީ، ސަރުކާރުން މިހާރު ކުރަމުންދާކަމަކީ ރައީސް ޔާމީންއަށް އަނިޔާވެރވުންކަމަށެވެ. އެހެން ނަމަވެސް އެމަނިކުފާނަކީ ގިނިކަންޏާއ ހުންނެވި ލީޑަރެއް ނޫންކަމަށް ޝުޖާއު ވިދާޅުވިއެވެ. 

އޭގެ އިތުރުން ޝުޖާއު ވަނީ ރައީސް ޔާމިންގެ މައްޗަށް ނުހައްގުން ހުކުމްކޮށްފިނަމަ މި ސަރުކާރަށް 5 އަހަރުގެ ދައުރެއް ފުރިހަމަ ކުރުމުގެ ފުރުސަތު ޕީޕީއެމުން ނުދޭނެކަމަށް ވިދާޅުވެފައެވެ.