މާލޭ ސިޓީ ކައުންސިލުން މާލޭގެ ދެކުނު ބަނދަރުން ޚިދުމަތް ހޯދާ އުޅަނދުފަހަރުގެ ސެކިއުރިޓީ ބެލެހެއްޓުމާއި ފެނުގެ ޚިދުމަތް އިފްތިތާހުކޮށްފިއެވެ.
އެކަމަށްޓަކައި ސިޓީ ކައުންސިލުން ވަނީ ޚާއްސަ ހަފްލާއެއްވެސް ބާއްވާފައެވެ.
މާލޭ ސިޓީކައުންސިލުން ފަށާފައިވާ ސީސީޓީވީ ހަރުކުރުމުގެ ޕްރޮގްރާމުގެ ދެވަނަ ފިޔަވަހީގެ ދަށުން އެ ކައުންސިލުން ވަނީ މާލޭގެ ދެކުނު ބަނދަރުގައި، މެރީ ބްރައުން ރެސްޓޯރެންޓުން ފެށިގެން ސްޓެލްކޯ ޕަމްޕު ސްޓޭޝަންތަކާއި ހަމަޔަށް 15 ސީސީޓީވީ ކެމެރާ ހަރުކޮށްފައެވެ. އަދި އެ ކެމެރާތައް މެދުވެރިކޮށް އެ ސަރަހައްދުގެ ސެކިއުރިޓީ ކަންކަން 24 ގަޑިއިރު ސިޓީ ކައުންސިލުން ބަލަހައްޓާގޮތަށް ވަނީ ހަމަޖައްސާފައެވެ.
އެ މަސައްކަތާއި ގުޅޭގޮތުން މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ، ދެކުނު ބަނދަރުގައި އަޅާފައި އޮންނަ އުޅަނދުތަކުން ވައްކަން ކުރާކަމުގެ ގިނަ ޝަކުވާތަކެއް ސިޓީ ކައުންސިލަށް ލިބެމުންދާކަމަށެވެ.
އެހެންކަމުން އެ ސަރަހައްދުގެ ސެކިއުރިޓީ ބެލެހެއްޓުމަށް ގާއިމުކުރެވުނު ސީސީޓީވީ ނިޒާމާއެކު، އުޅަނދުތަށް ތަސައްލީއެއް ލިބިގެންދާނެކަމަށް ގަބޫލުފުޅުކުރައްވާކަމަށް މޭޔަރު ވިދާޅުވިއެވެ.
ސިޓީ ކައުންސިލްގެ ސީސީޓީވީ ހަރުކުރުމުގެ ޕްރޮގްރާމަކީ ފިހަވަހިތަކަށް ބަހާލައިގެން ކުރިއަށްގެންދާ ޕްރޮގްރާމެކެވެ. އެގޮތުން އެ ޕްރޮގްރާމުގެ ފުރަތަމަ ފިޔަވަހީގެ ދަށުން ވަނީ މާލެއާއި ވިލމާލޭގެ ހުރިހާ މިސްކިތްތަކެއްގައި ސީސީޓީވީ ހަރުކޮށްފައެވެ. ދެވަނަ ފިޔަވަހީގެ ދަށުން ދެކުނު ބަނދަރުގައި ސީސީޓީވީ ހަރުކޮށްފައިވާއިރު، ދެން އޮތީ އުތުރު ބަނދަރުގައި ސީސީޓީވީ ހަރުކުރުމުގެ ފިޔަވައްސެވެ.
ސިޓީ ކައުންސިލުންވަނީ ދެކުނު ބަނދަރުގައި ސެކިއުރިޓީ ޚިދުމަތާއެކު ފެނުގެ ޚިދުމަތްވެސް ފަށާފައެވެ. އެ ބަދަރާއި ކައިރި ސަރަހައްދެއްގައި ފެން ލިބެން ނެތުމާއި ގުޅިގެން ފަޅުވެރިން ބޮޑެތި ތަކުލީފުތަކެއް އުފުލަމުންދާއިރު، އަލަށް ތައާރަފްކުރެވުނު ފެނުގެ ޚިދުމަތާއެކު، އެ ތަކުލީފުތައްވެސް ކުޑަވެގެންދާނެއެވެ.
ސިޓީކައުންސިލުން، ދެކުނު ބަނދަރުގައި ފެނުގެ ޚިދުމަތް ތައާރަފްކޮށްފައިވަނީ ސަރުކާރުގެ ފެން ކުންފުނީގެ އެހީތެރިކަމާއި އެކުގައެވެ. އެކަމަށްޓަކައި މޭޔަރު. ޑު މުއިއްޒުވަނީ އެ ކުންފުންޏަށް ޝުކުރު އަދާކުރައްވާފައެވެ.
Advertisement
This content is created and paid for by advertisers and does not involve Voice Journalists
