ސަރުކާރުގެ ރަސްމީ ދަތުރުތަކަށް މިދިޔަ އަހަރަށްވުރެ އިތުރަށް 56 މިލިއަން ޚަރަދުކޮށްފައިވާކަން ފިނޭންސް މިނިސްޓްރީގެ ތަފާސް ހިސާބުތަކުން ހާމަވެއްޖެއެވެ.
ފިނޭންސް މިނިސްޓްރީގެ ތަފާސް ހިސާބުތައް ދައްކާގޮތުގައި ސެޕްޓެމްބަރު އެކެއްގެ ނިޔަލަށް ސަރުކާރުގެ ދަތުރުތަކަށް ވަނީ 137 މިލިއަން ޚަރަދުކޮށްފައެވެ. އަދި އެއީ މިދިޔަ އަހަރުގެ އެ މުއްދަތާއި އަޅާބަލާއިރު 56.4 މިލިއަންގެ އިތުރުވުމެކެވެ.
މިދިޔަ އަހަރު ފެށިގެން، އެ އަހަރުގެ ސެޕްޓެމްބަރު އެކެއްގެ ނިޔަލަށް ސަރުކާރުން ދަތުރުތަކަށް ހަރަދުކޮށްފައިވަނީ 80.9 މިލިއަން ރުފިޔާ އެވެ.
ކޮންމެ އަހަރަކުވެސް ދައުލަތުގެ ދަތުރުތަކަށް އާދަޔާ ޚިލާފު ބޮޑު ބަޖެޓެއް ކަނޑައަޅާކަން ފާހަގަކުރެވެއެވެ. އެގޮތުން މިއަަހަރުގެ ބަޖެޓުގައިވެސް ދަތުރުތަކަށް 203 މިލިއަން ރުފިޔާ ބަޖެޓުކޮށްފައިވެއެވެ.
އެހެން ނަމަވެސް ދަތުރުތަކަށް އެކުލަވާލާފައިވާ ބަޖެޓުގެ 67 އިންސައްތަ މިހާރު ވަނީ ޚަރަދުކުރެވިފައެވެ.
ދިވެހިރާއްޖޭގެ އިގްތިސާދީ ހާލަތު ދަށްވަމުން ދިއުމާއި ގުޅިގެން ސަރުކާރުގެ ޚަރަދުތައް ކުޑަކުރުމަށް ފިނޭންސް މިނިސްޓްރީއިން ވަނީ ސަރކިއުލަރއެއްވެސް ނެރެފައެވެ.
އެފަހުންވެސް ބޭރުގެ އެކި ގައުމުތަކަށް ވަފުދު ހަދައިގެން އެކި ވުޒާރާތަކުން ދަތުރުތައް ކޮށްފައިވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
