ކުރީގެ ރައީސް އަބްދުﷲ ޔާމީން އަބްދުލްގައްޔޫމު ޔޫސުފް ނައީމުގެ އަތްޕުޅުން އެއްމިލިއަން ޑޮލަރު ބައްލަވައިގަތުމަށް ދެއްވި ފައިސާ ޔޫސުފު ނައީމާއި ހަވާލުކުރިކަމަށް އަބްދުﷲ ރަޝީދު ވިދާޅުވެއްޖެއެވެ. 

އެ މައްސަލައިގައި މީގެ ކުރިން ބޭއްވި އަޑުއެހުމުގައި ރައީސް ޔާމީންގެ ފަރާތްޕުޅުން ހެއްކެއްގެ ގޮތުގައި ހުށައެޅުއްވި މާލޭ ސިޓީގެ ޑެޕިއުޓީ މޭޔަރު އަހުމަދު ނަރީޝް ދެއްވި ހެކިބަހުގައި ވިދާޅުވީ ޔޫސުފު ނައީމުގެ އަތުން ޑޮލަރު ބައްލަވައިގަތުމަށް ކުރީގެ ރައީސް ޔާމީން އަބްދުލްގައްޔޫމު ދެއްވި ފައިސާ ގެންގޮސްދީފައިވާނެކަމަށެވެ. 

އަދި އެކަން ކުރީ އޭނާ އާއި އަބްދުﷲ ރަޝީދު ނަމަކަށް ކިޔާ މީހަކާއި ދެމީހުންކަމަށް ނަރީޝް ވިދާޅުވިއެވެ. 

Advertisement

މިއަދުގެ އަޑުއެހުމުގައި އަބްދުﷲ ރަޝީދުގެ ހެކިބަސް ނަގާފައިވާއިރު، އޭނާވެސް ވަނީ ނަރީޝް ވިދާޅުވިގޮތަށް، އެއް މިލިއަން ޑޮލަރަށްވާ ފައިސާ ޔޫސުފު ނައީމާއި ހަވާލުކުރުމުގައި ބައިވެރިވިކަމަށް ވިދާޅުވެފައެވެ. 

އޭނާގެ ހެކިބަހުގައި ވިދާޅުވެފައިވަނީ ރައީސް ޔާމީން ގުޅުއްވައިގެން 2015 ވަނަ އަހރުގެ ސެޕްޓެމްބަރު މަހުގައި އެމަނިކުފާނު އޭރު ދިރިއުޅުއްވަމުން ދިޔަ ގެކޮޅަށް ދިޔަކަމަށް ވިދާޅުވެފައެވެ. އަދި ފައިސާ ގުނުމަށްފަހު، އެއީ އެއްމިލިއަން ޑޮލަރަށްވާ ދިވެހި ފައިސާކަން ޔަގީންކުރުމަށްފަހު، އެ ފައިސާ ޔޫސުފު ނައީމާއި ހަވާލުކުރިކަމަށް އޭނާ ވިދާޅުވިއެވެ. 

ދައުލަތުގެ ފަރާތުން ވަނީ ފައިސާ ގުނި ގޮތާއި މެދު ސުވާލުކުރައްވާފައެވެ. އެ ސުވާލަށް ޖަވާބުދެއްވަމުން އަބްދުﷲ ރަޝީދު ވިދާޅުވީ ރައީސް ޔާމީން ވިދާޅުވެގެން ގ. ދޫވެއްސަށް ދިޔަ ކަމަށާއި، އެއް މިލިއަން ޑޮލަރަށްވާ 15 މިލިއަން 4 ލައްކަ 20 ހާއްސަ ރުފިޔާ އެމަނިކުފާނުގެ ހާޒިރުގައި ގުނި ކަމަށެވެ.

އެފައިސާ ގުނީ ނަރީޝާ ދެމީހުން އަތުން ކަމަށާއި ފައިސާ ހުރީ ގ. ދޫވެހީގެ ސިޓިންރޫމްގައި ދަބަހެއްގައި ކަމަށް ހެކިބަސްދީފައިވެއެވެ. އަބްދުﷲ ބުނީ އެ ފައިސާ އަތުން ގުނީ ވަކިވަކި ނޫޓުން ނޫން ކަމަށާއި، ގުނީ ފައިސާ ބޮނޑީގެ އަދަދު ކަމަށް އަބްދުﷲ ވަނީ ކޯޓަށް ކިޔާދެއްވާފައެވެ. ފައިސާ ގުނުމުން އެއް މިލިއަން ޑޮލަރަށްވީ ފައިސާ ހަވާލުކުރާ ކަމަށް ލިޔެފައިވާ ލިޔުމުގައި ރައީސް ޔާމީން ސޮއި ކުރެއްވިކަމަށްވެސް އޭނާ ވިދާޅުވިއެވެ. 

މިއަދުގެ އަޑުއެހުމުގައިވެސް ދައުަތުން ވަނީ މައުލޫއިން ބޭރު، އަދި ހެކި ހުށައެޅި ސަބަބުތަކާއި ނުގުޅޭ ސުވާލުތައް ކުރުމަށް މަސައްކަތްކޮށްފައެވެ. އެގޮތުން އޭނާ ޔޫސުފު ނައީމުގެ ގެއަށް ދިޔަ ކާރުގެ ޑިޒައިނާއި، ގުޅޭގޮތުން ދައުލަތުގެ ވަކީލުން ވަނީ ސުވާލުކޮށްފައެވެ. އަދި ނަރީޝްއާއި ކާރު ޑްރައިވަރާއި ދެމެދު ދެކެވުނު ވާހަކަތަކާއި ގުޅޭގޮތުންވެސް ސުވާލުކޮށްފައިވެއެވެ. 

ރައީސް ޔާމީންގެ ފަރާތުންވަނީ އެފަދައިން ސުވާލުކުރަމުން ދިއުމާއި ގުޅިގެން އިއުތިރާޒު ކުރައްވާފައެވެ. އަދި އެއީ މީގެކުރިންވެސް ދައުލަތުން އަމަލުކުރި ގޮތަށް ހެކިންނަަށް ފުރައްސާރަކުރުންކަން ފާހަގަކޮށް އެ ފުރުސަތު ނުދިނުމަށްވެސް ރައީސް ޔާމީންގެ ވަކީލުން ވަނީ އެދިފައެވެ. 

އެއާއެކު މައްސަލަ ބައްލަވާ އިސް ގާޒީ ޝަކީލުވެސް ވަނީ އެފަދައިން އެކަން ނުކުރުމަށް މިއަދުވެސް އަންގާފައެވެ. 

ވ. އާރަށުގެ މުއާމަލާތާއި ގުޅިގެން މިއަދު އިތުރު ދެ ހެކިންގެ ހެކިބަސްވެސް ވަނީ ނަގާފައެވެ. އެއީ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލްއާއި، ހުޅުދޫ ދާއިރާގެ ކުރީގެ މެމްބަރު މުހައްމަދު ޝާހިދުގެ ހެކިބަހެވެ. 

ތިން ހެކިންގެ ހެކިބަހަށްފަހު މިއަދުގެ އަޑުއެހުން ވަނީ ނިންމާލާފައެވެ. އެހެން ނަމަވެސް މި މައްސަލައިގައި އަދި ދިފާއުގެ ފަރާތުން ހުށައަޅާފައިވާ އިތުރު ތިން ހެކިންގެ ހެކިބަސް ނެގުން އޮންނާނެއެވެ.