ބިދޭސީ މަސައްކަތްތެރިންނަށް މިނިމަމް ވޭޖު ނުދިނުމަކ ބައިނަލްއަގުވާމީ މުއާހަދާތަކާއިވެސް ޚިލާހު އަދި ބިދޭސީ މަސައްކަތްތެރިންގެ ހައްގުތައް ގާއިމުކުރުމަށް ގާއިމުކުރުމަށް ކުރާ މަސައްކަތްތަކުގައި ފަހަތަށް އެޅޭ ފިޔަވަޅެއްކަމަށް ކޮރަޕްޝަނާއި ދެކޮޅަށް މަސައްކަތްކުރާ ޖަމުއިއްޔާއެއްކަމަށްވާ ޓްރާންސްޕޭރެންސީ މޯލްޑިވްސްއިން ބުނެފިއެވެ. 

ވަޒީފާއާއި ބެހޭ ގާނޫނުގެ 62 ވަނަ މާއްދާގެ (ކ)އަށް މިހާރު ހުށައަޅާފައިވާ އިސްލާހާއި ގުޅޭގޮތުން މޯލްޑިވްސް ޓްރޭޑް ޔޫނިއަން ކޮންގަރެސްއާއި ޓްރާންސްޕޭރެންސީ މޯލްޑިވްސްއިން ކަންބޮޑުވުން ފާޅުކޮށްވަނީ ނޫސްވަޔާނެއްވެސް ނެރެފައެވެ. 

އެ ނޫސްބަޔާނުގައި ބުނެފައިވަނީ ވަކި މުއްދަތެއް ނެތް ގޮތަށް ބިދޭސީ މަސައްކަތްތެރިންނަށް އެންމެ ކުޑަ އުޖޫރަ ދިނުން ފަސްކުރުމަކީ ރާއްޖެއިން 2013 ވަނަ އަހަރުގެ ޖަނަވަރީ 4 ވަނަ ދުވަހުގައި ސޮއިކޮށް ބައިވެރިވެފައިވާ "އީކުއަލް ރެމިއުނެރޭޝަން ކޮންވެންޝަން"އާ ޚިލާފު ކަމެއް ކަމަށެވެ.

އެ އިސްލާހުގެ ސަބަބުން ބިދޭސީ މަސައްކަތްތެރިން ލައްވައި ކުޑަ އުޖޫރައެއްގައި މަސައްކަތްކުރުން ރާއްޖޭގައި ހުއްދަވާނެ ކަމަށާއި، އެއީ ރާއްޖޭގެ ވަޒީފާއާ ބެހޭ ޤާނޫނުގެ 4 ވަނަ މާއްދާގެ (ހ)ގެ ދަށުން މަސައްކަތްތެރީންގެ މެދުގައި ހަމަހަމަކަން ޤާއިމުކުރަންޖެހޭކަމަށް ބުނެފައިވާ އުސޫލާއިވެސް ޚިލާފު ކަމެއް ކަމަށް އެ ބަޔާނުގައި ވަނީ ނުބެފައެވެ.

އޭގެ އިތުރުން އެ ޖަމުއިއްޔާއިން ބުނީ ބިދޭސީންނަށް އެންމެ ކުޑަ އުޖޫރަ ދޭން ޤާނޫނީ ގޮތުން ނުޖެހޭނަމަ ކުޑަ އުޖޫރައެއް ދީގެން ބިދޭސީން ލައްވައި މަސައްކަތްކުރުވައި ނާޖާއިޒު ފައިދާ ނެގުމަށް އިތުރަށް މަގުފަހިވާނެ ކަމަށެވެ. ދިވެހި މަސައްކަތްތެރިންނަށް ވަޒީފާ ދިނުމަކީ އިތުރު ތަކުލީފެއްގެ ގޮތުގައި ވަޒީފާ ދޭ ފަރާތްތަކަށް ފެންނާނެ ގޮތަށް ޤާނޫނަށް ގެންނަ އިސްލާހަކީ ދިވެހި މަސައްކަތްތެރިން އަގުވަޒަންނުކުރާ ކަމުގެ ހެއްކެއް ކަމަށްވެސް އެ ބަޔާނުގައި ވަނީ ބުނެފައެވެ.

ޓްރާންސްޕޭރެންސީއިން ބުނީ މިފަދަ އިސްލާހެއްގެ ސަބަބުން ދިވެހިންނަށް ވަޒީފާގެ ފުރުސަތު ނުލިބި އިޖުތިމާއީ ދުޅަހެޔޮކަމަށް ނޭދެވޭ އަސަރުކޮށް، ދައުލަތުގެ އިޖުތިމާއީ ރައްކާތެރިކަމުގެ ޕްރޮގުރާމުތަކަށް ބުރަ ބޮޑުވާނެ ކަމަށާއި، އެކަމުގެ ސަބަބުން ވަޒީފާ ނެތް ދިވެހި ޒުވާނުން އިންތިހާއަށް އިތުރުވާނެކަމަށެވެ.

2019 ވަނަ އަހަރުގެ ހިސާބުތަކަށް ބަލާއިރު މަސައްކަތްކުރާ އުމުރުގެ 317،482 މީހުން އެބަތިބިކަން ފާހަގަކޮށް ޓްރާންސްޕޭރެންސީން ބުނީ އެއިން މަސައްކަތުގައި އުޅެނީ 191،270 މީހުން ކަމަށެވެ. އަދި މި ފާސްކުރި އިސްލާހުގެ ސަބަބުން ވަޒީފާ ލިބޭ ދިވެހިންގެ އަދަދު އިތުރަށް މަދުވާނެކަންވެސް ބަޔާނުގައި ފާހަގަކޮށްފައިވެއެވެ. 

މިކަންކަން ފާހަގަކޮށް އެ ޖަމުއިއްޔާއިން ވަނީ ދޭސީ އަދި ބިދޭސީ މަސައްކަތްތެރިންގެ މެދުގައި ނައްތާލައި ބައިނަލްއަގުވާމީ މުއާހަދާތަކާއި އެއްގޮތަށް އަމަލުކޮށް އެ އިސްލާހު އަނބުރާ ގެންދިއުމަށް ސަރުކާރަށް ގޮވާލައިފައެވެ.