ރާއްޖޭގައި ބޭއްވޭ ބައިނަލްއަގްވާމީ ރިސާޗް ކޮންފަރެންސް މި މަހު 17 އިން 18 އަށް އިސްލާމިކް ޔުނިވަސިޓީގައި ބޭއްވުމަށް ނިންމައިފިއެވެ.
"އިންޓަނޭޝަނަލް ކޮންފަރެންސް އޮން އިންޓަލެކްޗުއަލް އެޑްވާންސްމަންޓް" (އައިސީއައިއޭ) ނަމުގައި ބޭއްވޭ މި ކޮންފަރެންސްގައި ރާއްޖެއާއި ބައިނަލްއަގްވާމީ ގިނަ އިލްމުވެރިން ބައިވެރިވެ ރިސާޗް ޕޭޕަރުތައް ހުށަހަޅާ ބަހުސްކުރެވިގެންދާނެއެވެ.
އިސްލާމިކް ޔުނިވަސިޓީއިން މިއަދު ނެރުނު ނޫސް ބަޔާނެއްގައި ބުނެފައިވަނީ މިއީ އިލްމު ހިއްސާކޮށް އުނގެނުމަށް ލޯބިކުރާ މުޖުތަމައުއެއް ބިނާކުރުމުގެ މަގުސަދުގައި 2016 އިން ފެށިގެން ކޮންމެ އަހަރަކުވެސް ސިލްސިލާކޮށް ބޭއްވޭ ކޮންފަރެންސެއް ކަމަށެވެ.
އައިސީއައިއޭ ގައި ޖުމްލަ ހަތަރު ތީމަކަށް ރިސާޗު ޕޭޕަރުތައް ހުށަހެޅިގެންދާނެއެވެ. އެގޮތުން މި ހަތަރު ތީމުގެ ތެރެއިން ފުރަތަމަ ތީމަކީ ސޯޝަލް ސައިންސް، ހިއުމަނިޓީސް އަދި އެޑިއުކޭޝަންއެވެ. ދެވަނަ ތީމަކީ މެނޭޖްމަންޓް، ވިޔަފާރި، އިގުތިސާދު، އެކައުންޓިން ފައިނޭންސް އަދި ބޭންކިން އެވެ. އައިސީއައިއޭގެ ތިންވަނަ ތީމަކީ ގުރްއާން ސްޓަޑީޒް، ޝަރީއާ އެންޑް ލޯއެވެ. ހަތަރު ވަނަ ތީމަކީ ޓުއަރިޒަމާއި ތިމާވެށި އަދި ޓެކްނޮލޮޖީއެވެ.
މި ތީމު ތަކުގެ އިތުރުން ކޮވިޑުގެ ބަލިމަޑުކަމާއި ގުޅޭ ގޮތުންވެސް ރިސާޗް ޕޭޕަރުތަކެއް ހުށަހެޅިގެންދާނެ ކަމަށް އިސްލާމިކް ޔުނިވަސިޓީގެ ބަޔާނުގައި ބުނެފައިވެއެވެ.
މި ކޮންފަރެންސުގައި ހުށަހެޅޭ ޕޭޕަރު ތަކުގެ އަދަދާއި ދާއިރާތަކަށް ބަލާއިރު މިއީ މިހާތަނަށް ރާއްޖޭގައި ބޭއްވޭ އެންމެބޮޑު ބައިނަލްއަގްވާމީ ރިސާޗް ކޮންފަރެންސް ކަމަށް އިސްލާމިކް ޔުނިވަސިޓީއިން މައުލޫމާތު ދެއެވެ.
Advertisement
This content is created and paid for by advertisers and does not involve Voice Journalists
