އިނގިރޭސިވިލާތުގެ ރާނީ އެލިޒަބަތު ދެ ވަނަ އަވަހާރަވުމާއި ގުޅިގެން އެ ކަމަނާގެ ހަނދާނުގައި ރައްޔިތުންގެ މަޖިލީހުގައި ސުކޫތެއް ފާހަގަކޮށްފިއެވެ. 

މަޖިލީހުގައި ސުކޫތު ފާހަގަކޮށްފައިވަނީ ރިޔާސަތުން އެޖެންޑާކޮށްގެންނެވެ. 

މި ސުކޫތުގައި މަޖިލީހަށް ހާޒިރުގެވި ހުރިހާ މެމްބަރުންވެސް ވަނީ ބައވެރިވެފައެވެ. 

Advertisement

ރާނީގެ ހަނދާނުގައި ފާހަގަކުރި ސުކޫތަށްފަހު، މަޖިލީހުގައި ތަމްސީލުކުރާ ހުރިހާ ސިޔާސީ ޕާޓީއަކުންވަނީ ތައުޒިޔާގެ މެސެޖު ރައްދުކުރައްވާ ވާހަކަފުޅުދައްކަވާފައެވެ. 

އެގޮތުން އެމްޑީޕީގެ ޕާރަލަމެންޓްރީ ލީޑަރު، މުހައްމަދު އަސްލަމްއާއި، ޖުމްހޫރީ ޕާޓީގެ ޕީޖީ ލީޑަރު ގާސިމް އިބްރާހިމް ވަނީ ވާހަކަފުޅުދައްކަވާފައެވެ. 

ޕީޖީ ލީޑަރުންގެ ވާހަކަފުޅުގައި ވަނީ އިނގިރޭސި ރާނީ އާއި ދިވެހިރާއްޖެއާއި އޮތް ގުޅުމުގެ މައްޗަށް އަލިއަޅުވާލާ ވާހަކަދައްކަވާފައިވެއެވެ. އަދި އެކަމަނާ ރާއްޖެއަށް ކުރެއްވި ތާރީޚީ ދަތުރަށްވެސް އަލިއަޅުވާލައްވާފައިވެއެވެ. 

އިނގިރޭސި ރާނީ އެލިޒަބަތު ދެ ވަނަ އަވަހާރަވެފައިވަނީ ސެޕްޓެމްބަރު މަހުގެ 8 ވަނަ ދުވަހުގައެވެ. އެކަމަނާ އަވަހާރަވުމާއި ގުޅިގެން އެ ހިތާމައިގައި ރާއްޖެއިންވެސް ވަނީ ބައިވެރިވެފައެވެ. 

އެގޮތުން ހިތާމައިގައި ބައިވެރިވުމަށް ތިން ދުވަސް ވަންދެން ގައުމީ ދިދަ ބައި ދަނޑިއަށް ތިރިކޮށްފައި ބެހެއްޓުމަށް ސަރުކާރުން ވަނީ ނިންމާފައެވެ.