A321 މަރުކާގެ އެއާބަސް މަތިންދާބޯޓު އަނބުރާ ފޮނުވާލުމަށްފަހު އާ ބޯޓެއް ގަންނަވަރުގެ މާލީ ގާބިލުކަމެއް މިހާރު ގައުމީ އެއާލައިން މޯލްޑިވިއަންގެ ނެތްކަމަށް އައިލެންޑް އޭވިއޭޝަން ލިމިޓެޑްގެ ކުރީގެ ޑިރެކްޓަރ އަދި 21 އަހަރު އޭވިއޭޝަންގެ ދާއިރާގައި މަސައްކަތް ކުރައްވާފައިވާ ތަޖުރިބާކާރެއްކަމަށްވާ ކެޕްޓައިން މުހައްމަދު އަމީނު ވިދާޅުވެއްޖެއެވެ. 

A321 މަރުކާގެ އެއާބަސް މަތިންދާ ބޯޓަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ޒައާމަތުގައި ލީސް އެއްބަސްވުންތަކެއްގެ ދަށުން ގެނައި ދެ މަތިންދާ ބޯޓުގެ ތެރެއިން އެއް ބޯޓެވެ. 

އެއްބަސްވުމުގައިވާ ގޮތަށް ފައިސާ ނުދެއްކިގެން ގައުމީ އެއަރލައިނުން ވަނީ އެ ބޯޓު އަނބުރާ ފޮނުވާލުމަށް ނިންމާފައެވެ. 

Advertisement

އެހެން ނަމަވެސް ސަރުކާރުން ގެންދަނީ އެ ނިންމުން ދިފާއުކުރައްވަމުންނެވެ. އެގޮތުން މޯލްޑިވިއަންގެ ޑެޕިއުޓީ މެނޭޖިން ޑިރެކްޓަރ އައިޝަތު ޖެނިފާ ވިދާޅުވީ A321 މަރުކާގެ އެއަރބަސް ފޮނުވާލަން ނިންމީ އެ ބޯޓަކީ ގިނަ ދުވަސް ވުމުގެ ސަބަބުން ބާވެފައިވާ ބޯޓެއްކަމަށް ވާތީއެވެ. އަދި އޭގެ ބަދަލުގައި އާ ބޯޓެއް ގެނައުމަށް ނިންމާފައިވާކަމަށްވެސް ޖެނިފާ ވިދާޅުވިއެވެ. 

ޗެނަލް-13 އިން ގެނެސްދިން ނިއުސްޓޯކް ޕްރޮގްރާމުގައި ވާހަކަދައްކަވަމުން ކެޕްޓަން އަމީނުވަނީ އެއަރބަސް ފޮނުވާލަން ނިންމުމާއި ގުޅިގެން ކަންބޮޑުވުން ފާޅުކުރައްވާފައެވެ. އަދި އާ ބޯޓެއް ގެނައުމާއި ގުޅޭގޮތުން ސަރުކާރުން ދައްކަމުންދާ ވާހަކައަށް ރައްދުދެއްވާފައެވެ. 

އެގޮތުން ކެޕްޓަން އަމީނު ވިދާޅުވީ އާ ބޯޓެއް ގަތުމަކީ ހިތަށް އެރީމާ ކުރެވޭ ވަރަށްވުރެ މާ ގިނަ މަސައްކަތްތަކެއްގެ ތެރެއިން، ނުވަތަ ދިގު ޕްރޮސީޖަރެއްގެ ތެރެއިން ގިނަ ޚަރަދުތަކާއެކު ކުރެވޭ ކަމެއްކަމަށެވެ. އަދި އެއަރބަސް ފޮނުވާލުމަށްފަހު އާ ބޯޓެއް ގެންނަ ވާހަކަ ދައްކަނީ ސަރުކާރުގެ ދިފާއުގައި ކަމަށާއި، އެއީ ކުންފުނީގެ ހާލަތު އޮޅުވާލުމަށް ދައްކާ ވާހަކަތަކެއްކަމަށް ކެޕްޓަން އަމީނު ވިދާޅުވިއެވެ. 

އޭގެ އިތުރުން އޭނާ ވިދާޅުވީ، އާ ބޯޓެއް ގަތުމުގެ މާލީ ގާބިލުކަން މޯލްޑިވިއަންގެ ނެތްކަމަށެވެ. އެފަދަ ގާބިލުކަމެއް ހުރި ނަމަ، އާ ބޯޓުތައް ގަތުމުގެ ބަދަލުގައި މިހާރު ހުރި ބޯޓުތައް މަރާމާތުކުރައްވަންވީ ނޫންތޯވެސް ކެޕްޓަން ވަނީ އައްސަވާފައެވެ. 

ކެޕްޓަން އަމީނުގެ ވާހަކައިގައި ވަނީ ގައުމީ އެއަރލައިން ދަރަނިވެރިވި ސަބަބުތަކަށްވެސް އަލިއަޅުވާލައްވާފައެވެ. 

އެގޮތުން ކެޕްޓަން ވިދާޅުވީ، ފައިދާގައި ހިނގަމުން ދިޔަ ކުންފުންޏެއް ބަނގުރޫޓުވުމާއި ގާތަށް ދިޔަ މައިގަނޑު ސަބަބަކީ އޭވިއޭޝަންގެ ތަޖުރިބާ ނެތް، ސިޔާސީ ފަރާތްތަކާއި ކުންފުނީގެ ހިންގުން ހަވާލުކުރުންކަމަށެވެ. އަދި އެތަނުގައި ތިބި ޓެކްނިކަލް ސްޓާފުން އެއްފަރާތްކޮށް، ކުންފުނި ސިޔާސީ ކުރުންކަމަށެވެ. 

މިހާރު އޮތް ހާލަތުން އެ ކުންފުނި ނަގާ އަލުން ކޮޅަށް ޖެހުމަކީ ވަރަށް އުނދަގޫ ކަމެއްކަންވެސް ކެޕްޓަން އަމީނުގެ ވާހަކައިގައި ފާހަގަކުރެއްވިއެވެ.