ވިލިމާލޭ ހޮސްޕިޓަލުން ކުޑަ ކުއްޖެއް ގަޔަށް މުއްދަތު ހަމަވެފައިވާ ވެކްސިނެއް ޖަހައިފިއެވެ. 

ކުއްޖާގެ ގަޔަށް މުއްދަތު ހަމަވެފައިވާ ވެކްސިނެއް ޖަހާފައިވާކަން ވިލިމާލޭ ހޮސްޕިޓަލުން އާއިލާއަށް އަންގާފައިވާކަމަށް އާއިލާއިން ވަނީ "ވޮއިސް" އަށް މައުލޫމާތު ދީފައެވެ. 

އާއިލާއިން މައުލޫމާތުދިން ގޮތުގައި މުއްދަތު ހަމަވެފައިވާ ވެކްސިން ޖަހާފައިވަނީ މިއަހަރުގެ ޖޫން މަހުގެ ކަމަށެވެ. އެއީ ކުއްޖާގެ އުމުރުން 4 މަހުގައި ޖަހާ ވެކްސިނެއްކަމަށް އާއިލާއިން ވަނީ ބުނެފައެވެ. 

Advertisement

އާއިލާއިން ބުނީ ކުއްޖާގެ ގަޔަށް ވެކްސިން ޖެހުމާއި ގުޅިގެން ހުން އައުން ނޫން އިތުރު އަލާމާތެއް ފެނިފައިނުވާކަމަށެވެ. އެހެން ނަމަވެސް ސީދާ އެކަމުގެ ސަބަބުން ކުއްޖާއަށް ލިބުނު ސިއްހީ ގެއްލުން ނޭނގޭކަމަށް އާއިލާއިން ވަނީ ބުނެފައެވެ. 

އެކަން ފާހަގަކުރައްވާ އާއިލާއިން ބުނީ ކުއްޖާ ޑޮކްޓަރަށް ދެއްކުމަށް އަންގާފައިވާކަމަށެވެ. 

މުއްދަތު ހަމަވެފައިވާ ވެކްސިން ކުއްޖާގެ ގަޔަށް ޖަހާފައިވަނީ ވިލިމާލޭ ހޮސްޕިޓަލުގެ ނަރުހެއްކަމަށް އާއިލާއިން ކިޔައިދިނެވެ. އަދި އެ މައްސަލަ މިހާރު އާއިލާގެ ފަރާތުން ވަނީ ވިލިމާލޭ ފުލުހަށް ހުށައަޅާފައެވެ. 

އެ މައްސަލައަކީ "މެޑިކަލް ނެގްލިޖެންސް" ގެ ކޭސްއަކަށް ވުމުން، ސަރުކާރުގެ ކަމާ ގުޅުންހުރި އިދާރާތަކަށް ހުށައެޅުމަށް މަސައްކަތް ކުރަމުންދާކަމަށް އާއިލާއިން ވަނީ ބުނެފައެވެ. 

މި ކަމާއި ގުޅޭގޮތުން ވިލިމާލޭ ހޮސްޕިޓަލުގެ ބަހެއް ހޯދާލުމަށް ކުރި މަސައްކަތުން އަދި އެ ފަރާތުގެ ޖަވާބެއް ލިބިފައެއް ނުވެއެވެ.