ގދ. މަޑަވެލި އަދި ހޯޑެއްދޫ ބްރިޖަކުން ގުޅާލުމަށް ހިންގާ މަޝްރޫއަކީ ތާރީހީ މަޝްރޫއެއްކަމަށާއި، އެ މަޝްރޫއާއެކު އެ ސަރަހައްދަށް އާ ދިރުމެއް ލިބިގެންދާނެ ކަމަށް، އެ މަޝްރޫއުގެ ކޮންޓްރެކްޓަރު އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ. 

އާޒިމް އެފަދައިން ވިދާޅުވެފައިވަނީ ގދ މަޑަވެލި- ހޯޑެއްދޫ ކޯޒްވޭގެ މަސައްކަތް ފެށުމުގެ ރަސްމިއްޔާތުގައި ވާހަކަދައްކަވަމުންނެވެ. 

އާޒިމްގެ ވާހަކަ ފައްޓަވަމުން ވަނީ މަޑަވެއްޔާއި ހޯޑެއްދޫގެ ތާރީހަށް އަލިއަޅުވާލައްވާފައެވެ. އެގޮތުން އޭނާ ވިދާޅުވީ މަޑަވެލި، ހޯނޑެއްދޫއަކީ ހުވަދުއަތޮޅުގެ މުހިއްމު ދެ ރަށެއްކަމަށާއި، މިއީ ތާރީޚީގޮތުންވެސް ވަރަށް ބޮޑަށް ގުޅިފައިވާ ދެ ރަށް ކަމަށެވެ. 

Advertisement

މަޑަވެލި ހޯޑެއްދޫ ބްރިޖު މަޝްރޫއު އާޒިމް ސިފަކުރައްވަނީ އެ ސަރަހައްދުގެ އިގްތިސާދަށް އާ ދިރުމެއް ލިބިގެންދާނެ މަޝްރޫއެއްގެ ގޮތަށެވެ. އެ މަޝްރޫއާއެކު ތިމާވެށީގެ ގޮތުން މިހާރު އެ ރަށްތަކަށް ދިމާވެފައިވާ މައްސަލަތަކަށްވެސް ހައްލު ލިބިގެންދާނެކަން އޭނާ ފާހަގަކުރެއްވިއެވެ. 

މަޝްރޫއިން ސަރަހައްދަށް ލިބިގެންދާނެ ކުރިއެރުންތަކަށް އަލިއަޅުވާލައްވާ އާޒިމްގެ ވާހަކައިގައި ވިދާޅުވީ ބުރިޖާއެކު ގުޅިގެންދާނީ ހަމައެކަނި މަޑަވެއްޔާއި ހޯޑެއްދޫ އެކަނި ނޫންކަމަށެވެ. އޭގެ އިތުރުން އެ ދެރަށާއި އެއްފަޅެއްގައި އޮންނަ ކަންނިގިލާއާއި ހާދޫވެސް ގުޅާލެވިގެންދާނެކަމަށް އޭނާ ވިދާޅުވިއެވެ. އަދި އެއާއެކު އިގުތިސާދީ މަސައްކަތްތައް ފުޅާކުރުމަށް އެތައް ފަސޭހަތަކެއް ލިބިގެންދާނެކަމަށް އޭނާ ވިދާޅުވިއެވެ. 

އެކަންކަން ފާހަގަކުރައްވާ އާޒިމް ވިދާޅުވީ އެ ބްރިޖު ވެގެންދާނީ ފަތުރުވެރިކަމަށްވެސް ދެ ރަށް ހުޅުވާލެވި އިޤްތިޞާދީ އަދި ވިޔަފާރީގެ ދާއިރާއިން ގިނަ ފައިދާތަކެއް ލިބިގެންދާނެ މަޝްރޫއެއްގެ ގޮތުގައި ކަމަށެވެ.

މަޑަވެލި-ހޯޑެއްދޫ ބްރިޖު މަޝްރޫއުގެ ދަށުން 260 މީޓަރުގެ ސަރަޙައްދެއްގެ ގޮނޑުދޮށް ޙިމާޔަތްކުރުމާއި، ބްރިޖުގެ 2544 ކިއުބިކް މީޓަރުގެ ސެގްމަންޓް ކޮންކްރީޓް މަސައްކަތް ކުރުން ހިމެނެއެވެ. އަދި 285 ސްޕަން ޕައިލް ހަރުކުރުމާއި، 4596 އަކަ މީޓަރުގެ ސަރަޙައްދުގައި ތާރު އަޅާ، 1378 އަކަ މީޓަރުގެ ސަރަޙައްދެއްގައި ޕޭވިންގ ހެދުމުގެ މަސައްކަތް ހިމެނެއެވެ.

ހަމައެހެންމެ ބްރިޖަށް ދެވެން އޮންނަ މަގުތައް ނުވަތަ އެޕްރޯޗް ރޯޑުގެ 3144 އަކަ މީޓަރުގެ ސަރަޙައްދެއްގައި ސަބްބޭސް ހެދުމާއި، ތާރު އެޅުމުގެ މަސައްކަތް މި މަޝްރޫޢުގެ ތެރެއިން ކުރެވިގެންދާނެއެވެ. މީގެ އިތުރުން ރެއިލިންގ އަދި މަގުބައްތި ހަރުކުރުމާއި، މަގުމަތީ ނިޝާން ކުރެހުންވެސް މަޝްރޫޢުގެ ތެރޭގައި ހިމެނެއެވެ. މުޅި މި މަޝްރޫޢަށް 84.17 މިލިއަން ރުފިޔާ ޚަރަދުވެގެންދާނެއެވެ.