ޖޫރިމަނާ ނުދެއްކިގެން އުވާނުލެވި 14000 ކުންފުނި އެބަ އޮތް ކަމަށް، އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
ފައްޔާޒު މިފަދައިން ވިދާޅުވެފައިވަނީ އެއް ޝެއަރ ހޯލްޑަރަކަށް ކުންފުނި ހެދުމުގެ ހައްގު ދިނުމަށް ކުންފުނީގެ ބިލަށް އިސްލާހު ގެނައުމަށް މިނިސްޓްރީގެ ފަރާތުން ރައްޔިތުންގެ މަޖިލީހުގެ އިގްތިސާދީ ކޮމެޓީއަށް ހުށައަޅުއްވަމުން ދެއްކެވި ވާހަކަފުޅެއްގައެވެ.
ކުންފުންޏާ ބެހޭ ބިލްގެ ނަން، "ކުންފުނީގެ ބިލް" މިގޮތަށް ބަދަލުކުރުމަށް ހުށަހަޅާފައިވާއިރު އިކޮނޮމިކް މިނިސްޓަރު ފައްޔާޒް އިސްމާއިލް ވަނީ މިނިސްޓްރީގެ ފަރާތުން މި ބިލަށް ގެންނަން ހުށަހަޅާފައިވާ ބަދަލުތައް ހިއްސާކުރައްވާފައެވެ.
އިގްތިސާދީ ކޮމެޓީގައި ވާހަކަދައްކަވަމުން މިނިސްޓަރު ވިދާޅުވީ އެކްޓިވް ނޫން ކުންފުނިތައް އުވާލުމުގެ މަސައްކަތް މިހާރުވެސް މިނިސްޓްރީއިން ކުރަމުންދާކަމަށެވެ.
މިނިސްޓަރު ވިދާޅުވީ މިހާރު އޮންނަ ގާނޫނުގެ ދަށުން ކުންފުނީގެ ރިޕޯޓު ހުށަނާޅާ ކުންފުނިތަކާއި، ކުންފުނިތަކުގެ މެނޭޖިން ޑިރެކްޓަރު ޖޫރިމަނާކުރާކަމަށެވެ. އެގޮތުން މެނޭޖިން ޑިރެކްޓަރު 10000 ރުފިޔާއިން ޖޫރިމަނާކުރާކަން މިނިސްޓަރު ފާހަގަކުރެއްވިއެވެ.
އަދި އެ ގަވައިދު އެ ގޮތަށް އޮތުމުގެ ސަބަބުން އެކްޓިވް ނޫން 14000 ކުންފުނި ޖޫރިމަނާ ނުދެއްކިގެން އުވާނުލެވި އޮތްކަމަށް މިނިސްޓަރު ވިދާޅުވިއެވެ.
"އެބަހުރި ބައިވަރު ކުންފުނިތައް ތާށިވެފަ އެ ރިޕޯޓު ހުށަނޭޅިގެން ދިހަ ހާސް ރުފިޔާ އަރަމުން އަރަމުން ގޮސް، އެގޮތަށް 14000 ކުންފުނި އެބައޮތް އެކްޓިވް ނޫން، އެކަމަކު އެއްކަލަ ޖޫރިމަނާ ނުދެއްކިގެންގޮސް ކުންފުނިވެސް އުވާނުލެވިފައި"
އިކޮނޮމިކް މިނިސްޓަރު ފައްޔާޒު
އެކަންކަން ފާހަގަކުރައްވާ މިނިސްޓަރު ވިދާޅުވީ އަހަރީ ރިޕޯޓު ހުށަނާޅާ ކުންފުނިތައް ޖޫރިމަނާ ކުރަމުންދާ އުސޫލަކީ ބޭނުންތެރި އުސޫލެއް ނޫންކަމަށެވެ. އަދި އެ ކަމުގެ ސަބަބުން ކުންފުނިތައް އުވާލަން ޖެހޭ ހާލަތުގައި އެކަން ކުރުމަށް ބޮޑެތި ގޮންޖެހުންތަކެއްވެސް އޮންނަކަމަށެވެ.
ކުންފުނީގެ ބިލު އެކުލަވާލުމަށް ގާނޫނަށް ހުށައަޅާފައިވާ އިސްލާހާއި ގުޅޭގޮތުން މިނިސްޓަރު އިތުރަށް ވިދާޅުވީ ކުންފުނިތަކުގެ އަހަރީ ފީއަކީ ކުރީގެ ވޯލްޑްބޭންކުގެ އީޒް އޮފް ޑުއިން ބިޒްނަސްގެ ވަރަށް ބޮޑަށް އުވާލަންވެސް ރިކޮމެންޑް ކުރާ އެއްޗެއްކަމަށެވެ.
އިކޮނޮމިކް މިނިސްޓްރީގެ ފަރާތުން ކުންފުންޏާ ބެހޭ ގާނޫނަށް މިނޫންވެސް ބަދަލުތައް ގެންނަން ހުށަހަޅާފައިވާއިރު މިނިސްޓަރު ފައްޒާޒް ވިދާޅުވީ ޑިރެކްޓަރުން އެޕޮއިންޓް ކުރުމުގައި ކަންކަން ބެލުމާއި ޑިރެކްޓަރުން ޒިންމާދާރުކުރުމުގެ ބައެއް ވެސް ބިލުގައި ހިމެނޭކަމަށެވެ.
އެގޮތުން ކުންފުނީގެ ސާރވިސް އެޑްރެހެއް ދިނުމަށްވެސް ވަނީ ހުށައަޅާފައެވެ. އަދި ވަކި ވަކި ޝެއަރ ހޯލްޑަރުންގެ ގޮތުގައި ތިބޭ މީހުންނަށް އެމީހުން ތަމްސީލުކުރާނެ އެހެން މީހަކު ކުންފުނީގެ ޑިރެކްޓަރެއްގެ ގޮތުގައި އައްޔަން ކުރެވޭނެ އިސްލާހެއްވެސް މިނިސްޓްރީގެ ފަރާތުން ވަނީ ހުށައަޅާފައެވެ.
Advertisement
This content is created and paid for by advertisers and does not involve Voice Journalists
