މި ސަރުކާރުން ވިތު ހޯލްޑންގ ޓެކްސް ކަނޑާލީ ދިވެހި ކުންފުނިތައް އިނދަޖައްސާ އިންޑިއާ ކުންފުނިތަކަށް ޖާގަ ދިނުމަށްކަމަށް ރައްޔިތުންގެ މަޖިލީހުގެ ފެލިދޫ ދާއިރާގެ މެމްބަރު ފަޒުލް ރަޝީދު ވިދާޅުވެއްޖެއެވެ.
ވިތު ހޯލްޑިން ޓެކްސްއަކީ ރާއްޖޭގައި ވަޒަންވެރިވެފައި ނުވާ ފަރާތްތަކުން، ރާއްޖޭގައި ކުރާ ވިޔަފާރިތަކުން ނަގާ ޓެކްހެކެވެ. އެއީ ޖުމުލަ ވިޔަފާރީގެ އަދަދުގެ 10 ޕަސެންޓް ދައްކަން ޖެހޭ ޓެކެހެވެ.
އެހެން ނަމަވެސް ސަރުކާރުން ވަނީ ވިތު ހޯލްޑިންގް ޓެކްސް ދައްކަން ނުޖެހޭ ގޮތަށް ޓެކުހާއި ބެހޭ ގާނޫނު އިސްލާހުކޮށްފައެވެ.
އެކަމަށް އިޝާރާތްކުރައްވާ ޕީޕީއެމްގެ ޖަލްސާއެއްގައި ވާހަކަދައްކަވަމުން ފަޒުލް ވިދާޅުވީ ސަރުކާރުން އެކަން ކުރީ ދިވެހި ކުންފުނިތައް އިނދަޖައްސާލުމުގެ ބޭނުމުގައިކަމަށެވެ. އަދި އިންޑިއާ ކުންފުނިތަކަށް ޖާގަ ދިނުމަށްކަމަށެވެ.
"ވިތު ހޯލްޑިން ޓެކްސް ކަނޑާލައިފި. މީގެ ބޭނުމަކީ ކޮބައިތޯ؟ ދިވެހި ކުންފުނިތައް ކޮބާތޯ މިއަދު؟ ދިވެހި ކުންފުނިތައް އިނދަޖެހިގެން ދަނީ. ބޭންކަރަޕްޓު ވެގެން ގޮސްފި. އިންޑިއާގެ ކުންފުނިތަކަށް ޖާގަ ދިނުމަށްޓަކައި ވިތު ހޯލްޑިންގ ޓެކްސް ކަނޑާލައިގެން ދިޔައީ"
މެމްބަރު ފަޒުލް ރަޝީދު
ފަޒުލް އިތުރަށް މިއީ ރޭވިގެން ހިންގާ ބޮޑު ކޮރަޕްޝަނެއް ކަމަށެވެ. ފަޒުލް ވިދާޅުވީ ވިތު ހޯލްޑިން ޓެކްސް ކަނޑާލުމާއި ގުޅިގެން އިންޑިއާ ކުންފުނިތަކުން ރާއްޖޭގައި ފެނާއި ނަރުދަމާގެ މަސައްކަތް ކުރާކަމަށް ސަރުކާރުން ބުނަމުން ދިޔަ ނަމަވެސް، އެކަން ކުރަމުން ނުދާކަމަށެވެ.
އަދި މި ސަރުކާރުން ފަށާފައިވާ ފެނާއި ނަރުދަމާގެ ގިނަ މަޝްރޫއުތަކަކީވެސް ރައީސް ޔާމީންގެ ޒައާމަތުގއި ފަންޑު ހަމަޖެހިފައިވާ މަސައްކަތްތަކެއްކަމަށް ފަޒުލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
