އިސްލާމިކް ޔުނިވާސިޓީގެ ފަރާތުން ރާއްޖޭގައި ބޭއްވޭ ބައިނަލްއަގްވާމީ ރިސާޗް ކޮންފަރެންސް މިއަދު ފަށައިފިއެވެ.

މިއަދު މި ކޮންފަރެންސް ފަށާފައިވާއިރު، މި ކޮންފަރެންސް ކުރިއަށްދާނީ މިމަހުގެ 17، 18 މި ދެދުވަހުއެވެ.

"އިންޓަނޭޝަނަލް ކޮންފަރެންސް އޮން އިންޓަލެކްޗުއަލް އެޑްވާންސްމަންޓް" (އައިސީއައިއޭ) ނަމުގައި ބޭއްވޭ މި ކޮންފަރެންސްގައި ރާއްޖެއާއި ބައިނަލްއަގްވާމީ ގިނަ އިލްމުވެރިން ބައިވެރިވެ ރިސާޗް ޕޭޕަރުތައް ހުށަހަޅާ ބަހުސްކުރެވިގެންދާނެއެވެ.

Advertisement

މިއަހަރުގެ މަހާސިންތާގައި ބޭރުގެ 12 ބޭފުޅަކާއި ރާއްޖޭގެ 218 ފަރާތެއް ބައިވެރިވާނެކަމަށް އައިޔޫއެމްއިން މަޢުލޫމާތުދެއްވައެވެ. މިމަހާސިންތާގައި މިއަހަރު 48 ކަރުދާސް ހުށައެޅުމަށްވަނީ ނިންމާފައެވެ.

އައިސީއައިއޭ ގައި ޖުމްލަ ހަތަރު ތީމަކަށް ރިސާޗު ޕޭޕަރުތައް ހުށަހެޅިގެންދާނެއެވެ. އެގޮތުން މި ހަތަރު ތީމުގެ ތެރެއިން ފުރަތަމަ ތީމަކީ ސޯޝަލް ސައިންސް، ހިއުމަނިޓީސް އަދި އެޑިއުކޭޝަންއެވެ. ދެވަނަ ތީމަކީ މެނޭޖްމަންޓް، ވިޔަފާރި، އިގުތިސާދު، އެކައުންޓިން ފައިނޭންސް އަދި ބޭންކިން އެވެ. އައިސީއައިއޭގެ ތިންވަނަ ތީމަކީ ގުރްއާން ސްޓަޑީޒް، ޝަރީއާ އެންޑް ލޯއެވެ. ހަތަރު ވަނަ ތީމަކީ ޓުއަރިޒަމާއި ތިމާވެށި އަދި ޓެކްނޮލޮޖީއެވެ.

މީގެ އިތުރުން ކޮވިޑުގެ ބަލިމަޑުކަމާއި ގުޅޭ ގޮތުންވެސް ރިސާޗް ޕޭޕަރުތަކެއް ހުށަހެޅިގެންދާނެ ކަމަށް އިސްލާމިކް ޔުނިވާސިޓީން މައުލޫމާތު ދެއެވެ.

މިއީ މިހާތަނަށް ރާއްޖޭގައި ބޭއްވޭ އެންމެބޮޑު ބައިނަލްއަގްވާމީ ރިސާޗް ކޮންފަރެންސް ކަމަށް އިސްލާމިކް ޔުނިވަސިޓީއިން މައުލޫމާތު ދެއެވެ.