އެމްޓީސީސީގެ އައު ޑްރެޖަރ ،“ބޮޑު ޖައްރާފު“ ރަސްމީކޮށް އިފްތިތާޙު ކޮށްފިއެވެ.

މި ޖައްރާފާ އިފްތިތާހްކޮށްފައިވަނީ އެކަމަށްޓަކައި ގއ. ދާންދޫގައި ބޭއްވި ޚާއްސަ ރަސްމިއްޔާތުގައި މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމްއެވެ.

އެމްޓީސީސީގެ އައު ޑްރެޖަރ ބޮޑު ޖައްރާފާ ބޭނުންކޮށްގެން އެންމެ ފުރަތަމަ ކުރިއަށްގެންދާ މަޝްރޫޢުއަކީ ގއ. ދާންދޫ ބިންހިއްކުމުގެ މަސައްކަތެވެ.

Advertisement

މިޖައްރާފާ އިފްތިތާހްކުރުމަށް ބޭއްވި ރަސްމިއްޔާތުގައި އެމް.ޓީ.ސީ.ސީގެ ސީއީއޯ އާދަމް އާޒިމް ވިދާޅުވީ، ބޮޑު ޖައްރާފާގެ އެހީގައި ދާންދޫ ބިން ހިއްކުމުގެ މަސައްކަތް އަވަސްކޮށް އަންނަމަހުގެ ތެރޭގައި މަސައްކަތް ނިންމާލެވޭނެކަމަށެވެ. އަދި މި ޖައްރާފާއާއެކު އެކުންފުނިން ކުރިއަށްގެންދާ މަސައްކަތްތައް ނިންމުމަށް ފަސޭހަވެގެން ދާނެކަމަށެވެ. 

ބޮޑު ޖައްރާފު ބޭނުންކޮށްގެން ހިންގޭ ދާންދޫ ބިން ހިއްކުމުގެ މަޝްރޫޢުގެ ދަށުން، 975,000 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި ބިން ހިއްކުމާއި، 807 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 555 މީޓަރުގެ ސަރަޙައްދެއްގައި ގްރޮއިންސް ޖެހުމުގެ މަސައްކަތް ހިމެނެއެވެ.

މި މަޝްރޫޢަކީ 186.64 މިލިއަން ރުފިޔާގެ މަޝްރޫޢެކެވެ.