ގަސްތައް ނުކަނޑައި މަގުތައް ހަދަން ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ގޮވާލައްވައިފި އެވެ.

ރައީސް ނަޝީދު މިހެން ވިދާޅުވީ، އަމީނީ މަގު އަލުން ހަދަން ތާރު އެޅުމަށް އެ މަގުގައު ހުރި ގަސްތައް ނަގަން ފަށައިފައިވާތީ އެކަމަށް އިޝާރާތް ކުރައްވާ މިއަދު އޮތް ރައްޔިތުންގެ މަޖިލީހުގެ ޖަލްސާ ގައެވެ.

ރައީސް ނަޝީދު ވިދާޅުވީ، ގަސްތައް ނުކަނޑައި މަގުތައް ހެދުމަކީ ބޭނުންތެރި ކަމެއް ކަމަށާއި، ގަސް ހެއްދުމަށް 15 ނުވަތަ 20 ވަރަކަށް އަހަރު ހޭދަވާއިރު، މަގެއް ހެދުމަށް ނަގަނީ ދެމަސް ނުވަތަ ތިން ވަރަކަށް މަސް ކަމަށެވެ.

Advertisement

ރައީސް ނަޝީދު މިހެން ވިދާޅުވެފައިވާއިރު، އާރްޑީސީގެ ބޭނުމަށް މާލޭ ސިޓީ ކައުންސިލުން ވަނީ އަމީނީ މަގުގައި ހުރި ގަސްތައް ކަނޑަން ފަށައިފައެވެ. 

އަމީނީ މަގު ތަރައްގީ ކުރުމުގެ މަސައްކަތް ކުރާ އާރްޑީސީ ބުނީ އަމީނީ މަގުގައިހުރި ގަސްތައް މިހާރު ނެގި ނަމަވެސް އެ މަގު ހަދާ ނިމުން ގަސްއިންދެން ހުރި ތަންތަނުގައި އަލުން ގަސް އިންދާނެ ކަމަށެވެ. މިހާރު އަމީނީ މަގުގައިހުރި ގަސްތައް މަގައިގެން ގެންދަން ނިންމާފައިވަނީ ޕިކްނިކް އައިލެންޑެއް ގޮތުގައި ތަރައްގީކުރާ "ކުޑަގިރި"އަށެވެ.

ސަރުކާރުގެ ބަޖެޓުން 84 މިލިއަން ރުފިޔާ ހަރަދުކޮށްގެން އާރުޑީސީ އާއި އަމީނީ މަގުގެ މަސައްކަތް ހެދުމުގެ މަޝްރޫއު ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށެވެ. މި މަޝްރޫއުގެ ދަށުން އަމީނީ މަގުގައި ތާރު އަޅާ ތަރައްގީ ކުރުމަށް ވަނީ ނިންމާފައެވެ.