މަރާމާތަށް ބަންދު ކޮށްފައިވާ އޮލިމްޕަހުގެ މަސައްކަތްތައް މިއަހަރުގެ އޮކްޓޫބަރުމަހުގެ ނިޔަލަށް ނިންމާލެވޭނެކަމަށް ލަފާކުރައްވާ ކަމަށް ހެރިޓޭޖް މިނިސްޓަރު ޔުމްނާ މައުމޫން ވިދާޅުވެއްޖެއެވެ.

އޮލިމްޕަސް މަސައްކަތް ނިމޭނެ ތާރީހާއި އަދި އެ ތަނުގެ މަސައްކަތް މިހާރު ގޮސްފައި އޮތް ހިސާބާ ގުޅޭ ގޮތުން ރައްޔިތުންގެ މަޖިލީހުގެ މަޑަވެލި ދާއިރާގެ މެންބަރު ހުސައިން ފިރުޝާން ލިޔުމުން ޖަވާބު ހޯއްދެއްވުމަށް ކުރެއްވި ސުވާލަށް ދެއްވި ޖަވާބުގައި މިނިސްޓަރު ޔުމްނާ ވިދާޅުވީ އޮލިމްޕަސް އަލުން ޒަމާނީ ގޮތަކަށް ބަދަލުކުރުމަށް މިހާރު ކުރަމުންދާ މަސައްކަތް ނިމޭނެކަމަށް ބެލެވެނީ އަންނަ މަހުގެ ނިޔަލަށް ކަމަށެވެ.

އޮލިމްޕަހުގެ މަސައްކަތްތައް މިހާރު ގޮސްފައިވާ ހިސާބާ ގުޅޭ ގޮތުން ޔުމްނާ ވިދާޅުވީ އެ ތަނުގައި ހިންގާ ހަރަކާތްތައް އިސްތިހާރު ކުރުމަށް އޮލިމްފަސްގެ މައި ގޭޓް މަތީގައި ލެޑް ޕެނެލްއެއް ހަރުކޮށްފައިވާ ކަމަަށެވެ.

Advertisement

މީގެ އިތުރުން ޔުމްނާ ވިދާޅުވީ އޮލިމްޕަހުގެ ހޯލާއި ރިހާސަލް ރޫމުތަކަށް ބޭނުންވާ ބައެއް ސާމާނު ހޯދުމަށް ހަވާލުކުރި ފަރާތުން އެ މަސައްކަތް ކުރެވެން ނެތްކަމަށް އެންގުމުން އެ މަސައްކަތް މިއަހަރުގެ ނޮވެމްބަރު މަހުގެ 16 ވަނަ ދުވަހުގެ ނިޔަލަށް ނިންމުމަށް ސިންގަލް ސޯސް އުސޫލުން އެހެންފަރާތަކާ ހަވާލުކޮށްފައިވާ ކަމަށެވެ.

ހަމައެއާއެކު އޮލިމްޕަސް ހޯލުގައި ފިލްމު ސްކްރީން ކުރުމަށް ޑިޖިޓަލް ސިނަމާ ޕްރޮޖެކްޓަރަކާއި 7.1 ސަރައުންޑް ސައުންްޑް އިންސްޓޯލް ކޮށްދޭނެ ފަރާތެއް ހޯދުމަށް ތިން ފަހަރު އިއުލާނުކޮށް އެއްވެސް ފަރާތަކުން ކުރިމަތިލާފައި ނުވާތީ މި މަސައްކަތްވެސް ސިންގަލް ސޯސްކޮށް ކޮށްދޭނެ ފަރާތެއް ހޯދާ އަންނަ މަހުގެ 16 ވަނަ ދުވަހުގެ ނިޔަލަށް ނިންމުމަށް ހަވާލުކޮށް އެގްރިމަންޓްގައި މިހާރު ސޮއިވެސް ކޮށްފައިވާ ކަމަށް ޔުމްނާ ވިދާޅުވިއެވެ.

މީގެ އިތުރުން، އޮލިމްޕަހުގައި ގާއިމްކުރާ ސްޓޭޖް ލައިޓާއި ސައުންޑް ކޮންޓްރޯލް ގާއިމްކުުރުމަށް ހަދާ ޕްލެޓްފޯމްގެ މަސައްކަތް ހަވާލުކުރެވުނު ފަރާތުން އެއްބަސްވުމާ އެގޮތަށް އެ މަސައްކަތް ފަށާފައިނުވާތީ އެ އެއްބަސްވުން ބާތިލުކޮށް، މި މަހުގެ 17 ވަނަ ދުވަހުގެ ނިޔަލަށް މަސައްކަތް ނިންމުމަށް އެހެން ފަރާތަކާއި ހަވާލުކުރެވިފައިވާ ކަމަށްވެސް ޔުމްނާ ވިދާޅުވިއެވެ. އަދި އޮލިމްޕަހުގައި ނިންމަންޖެހޭ އެހެނިހެން މަސައްކަތްތައްވެސް އެކިފަރާތްތަކާ ޙަވާލުކޮށްގެން ނިންމުމުގެ މަސައްކަތް ކުރިއަށްދާ ކަމަށްވެސް މިނިސްޓަރު ވިދާޅުވި އެވެ.

އޮލިމްޕަސް ތަރައްގީ ކުރުމުގެ މަސައްކަތަކީ އިންޑިއާ ސަރުކާރުގެ އެހީގައި ސަރުކާރުން ކުރިޔަށް ގެންދާ މަޝްރޫއު އެކެވެ.