އެސްޓީއޯއިން ފާހަގަކުރާ 'ވޯކް ޓު ވަރކް ޑޭ' އާއި ގުޅިގެން އެ ކުންފުނީގެ ހުރިހާ މުވައްޒަފުން މިއަދު މަސައްކަތައް ނުކުންނާނީ ހިނގާފައި ކަމަށް އެކުންފުނިން ބުނެފިއެވެ. 

މިއީ އެސްޓީއޯ ގެ މިހަރަކާތް ހިންގާ 3 ވަނަ އަހަރެވެ. މުޅި ދުނިޔެއަށް ކުރިމަތިވި ކޯވިޑް ބަލިމަޑުކަމުން އަރައިގަތުމަށްފަހު މިހަރަކާތް މެދުޖައްސާލުމަށްފަހު އަލުން ވަނީ ފަށާފައެވެ.

އެގޮތުން އެސްޓީއޯ އިން ބުނީ، އެހެން އަހަރުތަކެކޭވެސް އެއްފަދައިން މިއަހަރުވެސް އެ ކުންފުނީގެ 'ވޯކް ޓު ވަރކް ޑޭ' އާއި ގުޅިގެން މުޅި ކުންފުނީގެ އެންމެހާ މުވައްޒަފުން މަސައްކަތަށް ނުކުންނާނީ ފައިމަގުގައި ހިނގާފައިކަމަށެވެ. އަދި އެ ކުންފުނީގެ މުވައްޒަފުން މުޅި ދުވަހުވެސް އުޅޭނީ ފައިމަގުގައި ކަން ވެސް އެސްޓީއޯއިން ވަނީ ފާހަގަކޮށްފައެވެ.

Advertisement

އެސްޓީއޯއިން މިފަދަ ހަރަކާތެއް ފަށައި ކޮންމެ އަހަރަކު ސެޕްޓެމްބަރ މަހުގެ 3 ވަނަ ބުރާސްފަތި ދުވަސް މިފާހަގަކުރަނީ ސިއްހީ ދުޅަހެޔޮކަން ޕްރޮމޯޓްކުރުމުގެ ގޮތުން ކަމަށް އެ ކުންފުނިން ބުނެއެވެ. އަދި މިއީ އެކުންފުނީގެ މުވައްޒަފުން ދުޅަހެޔޮކޮށް ތިބުމަށް ހިތްވަރުދީ އާންމު ފަރުދުންވެސް ހިނގާފައި އުޅުމަށް ލޯބި ޖެއްސުމުގެ ގޮތުން ހިންގާ ހަރަކާތެއް ކަމަށް އެ ބުނެފައިވެއެވެ. 

އެސްޓީއޯއިން އަބަދުވެސް އަންނަނީ މުވައްޒަފުންނަކީ ދުޅަހެޔޮ ހަށިހެޔޮ ބަޔަކަށް ހެދުމަށް މަސައްކަތްކޮށް، ސިއްހަތަށް ފައިދާ ހުރި ގިނަ ކަންކަން މުވައްޒަފުންގެ މެދުގަޔާއި އާންމުންނަށް ހުޅުވާލައިގެން ރާވައި ހިންގަމުން ކަން އެ ކުންފުނިން ފާހަގަކުރެއެވެ. 

އެގޮތުން، އެސްޓީއޯގެ މުވައްޒަފުންގެ މެދުގައި ކުޅިވަރުގެ އެކި ހަރަކާތްތައް ފާއިތުވި ދުވަސްތަކުގައި ރާވައި ހިންގާފައިވާ ކަމަށާ، އަދި އެސްޓީއޯގެ ހައުސްތަކުގެ މެދުގެ ބޭއްވޭ އެކި ގިނަ ކުޅިވަރުގެ ހަރަކާތްތަކުންނާއި ޤައުމީ ފެންވަރުގައި ކުޅެވޭ މުބާރާތްތަކުގައި އެސްޓީއޯއިން މުވައްޒަފުން ބައިވެރިކުރުމަކީ މިކަމުގެ ހެއްކެއް ކަމަށް ވެސް އެ ކުންފުނިން ބުނެއެވެ.

ހަމަމިއާއިއެކު، އެސްޓީއޯއާއި އެސްޓީއޯ ގުރޫޕް ކުންފުނިތަކުގެ މުވައްޒަފުންނަށް ޒަމާނީ ވަސީލަތްތަކާއިއެކު ޖިމެއްވެސް ތައްޔާރުކޮށްފައިވެއެވެ.

އެސްޓީއޯގެ އަމާޒަކީ މުވައްޒަފުންނާއި ރައްޔިތުންނަށް ފައިދާ ހުރި ކަންކަމާއިމެދު ހޭލުންތެރިކުރުވައި، ސިއްހަތަށާއި، ތިމާވެއްޓަށް ފައިދާ ހުރި އާދަތަށް މިމުޖުތަމައުގައި އަށަގެންނެވުމަށް މަސައްކަތް ކުރުން ކަމަށް އެކުންފުނިން ބުނެއެވެ.