ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް، ރައީސް ޔާމީން އަބްދުލްގައްޔޫމް ގެ ވެރިކަމުގައި ނުކުޅެދުންތެރިކަން ހުންނަ ފަރާތްތަކަށް ވަޒީފާ ދިން ނަމަވެސް، އެކަން ކޮށްފައި ވަނީ އެކަން ކުރީމޭ ބުނަން 'ނަމަކަށް'، ހަމަ އެކަނި ފޮޓޯއެއް ނަގާލަން ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
މިއުވާން މިފަދައިން ވިދާޅުވީ، މިއަދު އޮތް ނޫސްވެރިންގެ ބައްދަލުވުމުގައި، ރައީސް ޔާމީންގެ ސަރުކާރުން ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތުތައް ފަހިކޮށްދިނުމަށް ވަރަށް ކާމިޔާބު ޕްރޮގްރާމެއް ހިންގި ކަމަށާ، އެހެންނަމަވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މިސަރުކާރުން އެ ޕްރޮގްރާމް ނުވަތަ އެފަދަ އެހެންވެސް ޕްރޮގްރާމެއް ހިންގާތަން ނުފެންނަ ކަމަށް ބުނެ، މި ސަރުކާރުން ނުކުޅެދުންތެރިކަން ހުންނަ ފަރާތްތަކަށް ވަޒީފާ ފުރުސަތުތައް ހޯދައިދިނުމަށް އެއްވެސް މަސައްކަތެއް ކުރަމުންދޭތޯ ނޫސް ވެރިއެއް ކުރި ސުވާލަށް ޖަވާބު ދެއްވަމުންނެވެ.
ނޫސްވެރިޔާގެ ސުވާލަށް ޖަވާބު ދެއްވަމުން މިއުވާން ވިދާޅުވީ، ރައީސް ޔާމީންގެ ސަރުކާރުން ކާމިޔާބު ކަމާއިއެކު ނުކުޅެދުންތެރިކަން ހުންނަ ފަރާތްތަކަށް ވަޒީފާ ފުރުސަތުތައް ފަހިކޮށްދިނުމަށް މަސައްކަތް ކުރި ކަމަށް ނޫސްވެރިޔާ ބުނި ވާހަކައަކީ އޭނާ އަށް ގަބޫލުކުރައްވަން އުނދަގޫ ވާހަކައެއް ކަމަށެވެ.
"ތެދުފުޅެއް! މިޕްރޮގްރާމް އެ ބޭފުޅުން ފެއްޓެވި. އެހެން ނަމަވެސް އަޅުގަނޑުމެންނަށް ވަރަށް ބޮޑަށް ފެނިގެން ދިޔައީ ނަމަކަށް ކަމެއް ފެށިތަން. ނުކުޅެދުންތެރިކަން ހުންނަ ފަރާތްތަކަށް ވަޒީފާ ދިނުމުގައި އެބޭފުޅުންގެ ސްކިލްސް އަކީ ކޮބައިތޯ؟ ނުވަތަ އެބޭފުޅުންނަށް ކުރެވެނީ ކޮންކަހަލަ ކަންތައްތަކެއްތޯ؟ އެބޭފުޅުންގެ ސްކިލްސް ބޮޑަށް ހުރީ ކޮށް ދާއިރާ އަކުންތޯ؟ އެބޭފުޅުންގެ އެ ސްކިލްސް އާ ގުޅެނީ ވަޒީފާދޭ ކޮން ދިމާލަކުންތޯ؟ މިކަހަލަ މާބޮޑު ބެއްލެވުމެއްނެތި ދެން ހަމަ، ނުކުޅެދުންތެރިކަން ހުންނަ ފަރާތްތަކަށް ވަޒީފާ ދިނީމޭ ބުނަން ފޮޓޯއެއް ނަގާލަން އެކަން ކުރި ގޮތަށް އަޅުގަނޑުމެންނަށް ފެނިގެން ދިޔައީ." ކުރީ ސަރުކާރުން ނުކުޅެދުންތެރިކަން ހުންނަ ފަރާތްތަކަށް ވަޒީފާ ދިން ގޮތަށް ފާޑުވިދާޅުވެ މިއުވާން ވިދާޅުވިއެވެ.
މިއުވާން ވިދާޅުވީ، ނުކުޅެދުންތެރިކަން ހުންނަ ފަރާތްތަކަށް ވަޒީފާ ދިނުމުގެ މަސައްކަތް މި ސަރުކާރުން ވެސް ކުރަމުންދާ ކަމަށާ، އެއީ ރައީސް ޞާލިހު ވަރަށް ބޮޑު އިސްކަމެއް ދެއްވާ ކަމެއް ކަމަށެވެ. އެގޮތުން، ޖެންޑާރ މިނިސްޓްރީ އާއި ސަރުކާރުގެ ކުންފުނިތަކާއި ގުޅިގެން އެކަން ކުރުމުގެ މަސައްކަތް ކުރަމުންދާ ކަމަށާ، މިސަރުކާރުން އެފަދަ ފަރާތްތަކަށް ވަޒީފާ ދޭ އިރު، އެފަރާތްތަކުގެ ހުނަރު ހުރީ ކޮން ދިމާއަކުންތޯ ބަލައި، އެ ފަރާތްތަކުގެ ހުނަރުގެ ބޭނުން ހިފޭނެ ތަންތަނުން ވަޒީފާ ދިނުމުގެ މަސައްކަތް ކުރަމުންދާ ކަމަށްވެސް މިއުވާން ވިދާޅުވިއެވެ.
ރައީސް ޔާމީންގެ ސަރުކާރުން، އެއްވެސް ފަރާތެއް ބާކީ ނުކޮށް، ހުރިހާ އެންމެނަށް ހަމަހަމަ އުސޫލެއްގެ ދަށުން ވަޒީފާގެ ފުރުސަތު ތައް ފަހިކޮށްދިނުމަށްޓަކައި، ސަރުކާރު ހިއްސާވާ އެކި ކުންފުނިތަކުން ނުކުޅެދުންތެރިކަން ހުންނަ ފަރާތްތަކަށް ވަނީ ވަޒީފާގެ ފުރުސަތު ފަހިކޮށްދީފައެވެ. އެހެން ނަމަވެސް މިސަރުކާރު އައި ފަހުން އެ މަސައްކަތް މަޑު ޖެހިފައިވާއިރު, ނުކުޅެދުންތެރިކަން ހުންނަ ފަރާތްތަކުގެ އިނާޔަތް ބޮޑު ކުރުމަށް ރައީސް ޞާލިހު ވެވަޑައިގެންނެވި ވައުދު ވެސް އަދި އަދަށްވެސް ފުއްދިފައި ނުވެއެވެ.
Advertisement
This content is created and paid for by advertisers and does not involve Voice Journalists
