ކުރީގެ ރައީސް ޔާމީން އަބްދުލްގައްޔޫމު ވެރިކަމުގައި ހުންނަވާ ރާއްޖެއިން ބޭރަށް ކުރެއްވި ދަތުރުފުޅުތައް ރައްޔިތުންނަށް އޮޅޭގޮތަށް ރައީސް އޮފީހުގެ ތަރުޖަމާނު ވާހަކަދެއްކެވުމާއި ގުޅިގެން ރައީސް ޔާމީންގެ ޒައާމަތުގައި ޗީފް އޮފް ސްޓާފް އަހުމަދު މުސްތަފާ ރައްދުއްވާ އެ ދަތުރުފުޅުތަކުގެ ތަފްސީލު ހާމަކުރައްވައިފިއެވެ. 

އެންމެ ފަހުން ރައީސް އޮފީހުން ބޭއްވި ޕްރެސް ކޮންފަރެންސްގައި ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ރައީސް އިބްރާހިމް މުހައްމަދު ސޯލިހްގެ ބޭރު ދަތުރުފުޅުތައް އިތުރު ކަމަށް ވިދާޅުވާއިރު ރައީސް ޔާމީންގެ ވެރިކަމުގެ ފަސް އަހަރުގައި ވެސް 30 އަށް ވުރެ ގިނަ ދަތުުރުފުޅު ކުރައްވާފައިވާކަމަށެވެ.

އެ ގޮތުން ސިންގަޕޫރަށް ނުވަ ދަތުރުފުޅު އަދި ސައުދީ އަރަބިއްޔާއަށް ހަ ދަތުރުފުޅު ކުރައްވާފައިވާ ކަމަށް އޭނާ ވިދާޅުވިއެވެ. 

Advertisement

މިއުވާނު މިފަދައިން ވިދާޅުވުމާއި ގުޅިގެން ރައީސް ޔާމީން ކުރެއްވި ބައެއް ދަތުރުފުޅުތަކުގެ ސީދާ ތަފްސީލު ކުރީގެ ޗީފް އޮފް ސްޓާފް މުސްތަފާ ވަނީ ހާމަކުރައްވާފައެވެ. 

އެގޮތުން މުސްތަދާ ވިދާޅުވީ ރައީސް ޔާމީން ސައުދީއަށް 6 ދަތުރުފުޅު ކުރައްވާފައިވާކަމަށް ތަރުޖަމާނު ވިދާޅުވެފައިވާއިރު، އޭގެ ތެރެއިން 3 ފަހަރު ވަޑައިގަތީ ހައްޖު އުމުރާގެ އަޅުކަން އަދާކުރެއްވުމަށެވެ. ޓިކެޓު ނެންގެވީ އަމިއްލަފުޅަށް ކަމަށާއި، އެދަތުރުފުޅުގައި އެމަނިކުފާނުގެ އަރިހުގައި ވަޑައިގެން ސަރުކާރުގެ ވެރިންވެސް ވަޑައިގަތީ އަމިއްލަފުޅަށް ޓިކެޓު ބައްލަވައިގެންކަމަށެވެ.

މުސްތަފާ ވިދާޅުވީ ސައުދީއަށް އެމނިކުފާނު ކުރެއްވި ދަތުރުފުޅާއެކު ރައްޔިތުންނަށް ލިބުނު ފައިދާ މާލޭގެ އިރުމަތީ ފަރާތުގައި ފެންނަން ހުރި މިސްކިތުން ހާމަވާކަމަށެވެ. އޭނާ އިޝާރާތްކުރެއްވީ ސައުދީގެ އެހީގައި އަޅުއްވާދެއްވާފައިވާ ކިންގް ސަލްމާނު މިސްކިތަށެވެ. 

އޭގެ އިތުރުން މުސްތަފާ ވިދާޅުވީ ރައީސް ޔާމީން ސިންގަޕޫރަށް ވަޑައިގެންނެވީ މުޅީން ވެސް ބޭސްފަރުވާ އަށެވެ. އެ ދަތުރުތަކަށް ހަރަދު ކުރެއްވީ އިންޝްއަރެންސްގެ ތެރެއިންނެވެ. މެލޭޝިޔާއަށް ކުރެއްވި ދަތުރުފުޅަކީ ދަރިކަލުންގެ ޕްރޮސީޖާ އަކަށް ކުރެއްވި ދަތުރުފުޅެއް ކަމަށް މުސްތޮފާ ވިދާޅުވެފައި ވެއެވެ. އެ ދަތުރުފުޅަށް ރައީސް ޔާމީނާއި އާއިލާގެ ބޭފުޅުން އަދި ސެކިއުރިޓީގެ ޓިކެޓް ވެސް ނެންގެވީ އެމަނިކުފާނު އަމިއްލަފުޅަށެވެ. 

އެ ދަތުރުފުޅާއެކު ދިވެހީންނަށް 90 ދުވަހުގެ އޮން އެރައިވަލްސް ވިސާ އެ ގައުމުން ހަމަޖައްސައި ދެއްވީ ސީދާ ރަައީސް ޔާމީން އެކަމަށް އެދިވަޑައިގެން މެލޭޝިޔާގެ ސަރުކާރުގައި ދަންނަވައިގެންކަމަށް މުސްތަފާ ވިދާޅުވިއެވެ. 
ރައީސް ޔާމީން ޗައިނާއަށް ކުރެއްވި ދަތުރުފުޅުތަކާއެކު ގައުމާއި ރައްޔިތުންނަށް ލިބުނު ފައިދާތަކަށްވެސް މުސްތަފާގެ ޓްވީޓުގައި ވަނީ އަލިއަޅުވާލައްވާފައެވެ. އެގޮތުން ހުޅުމާލޭ ދެވަނަ ފިޔަވަހީގައި ހިޔާ މަޝްރޫއުގެ ދަށުން ހަދާފައިވާ ފްލެޓުތަކަކީ ރައީސް ޔާމީންގެ ޗައިނާ ދަތުރުފުޅުތަކާއެކު ރައްޔިތުންނަށް ލިބިގެން ދިޔަ ގެދޮރުވެރިކަމުގެ ފްލެޓުތަކެއްކަމަށް އޭނާ އިޝާރާތްކުރެއްވިއެވެ. އެ ނޫންވެސް އުމްރާނީ މުހިންމު މަޝްރޫއުތަކެއް، އޭގެ ތެރޭގައި މާލެއާއި ހުޅުމާލެ ގުޅާލި ބްރިޖު ދިވެހިންނަށް ލިބިގެން ދިޔައީވެސް ޗައިނާއަށް ރައީސް ޔާމީން ކުރެއްވި ދަތުރުފުޅާއެކުގައިކަން ފާހަގަކުރެވެއެވެ. 
މުސްތަފާ ވިދާޅުވިގޮތުގައި ރައީސް ޔާމީން ޔޫއޭއީއަށް ކުރެއްވި ދަތުރުފުޅާއެކު މާފަރު އެއަރޕޯޓު ދިވެހިންނަށް ވަނީ ލިބިގެން ގޮސްފައެވެ. އަދި ދިވެހިންނަށް އެ ގައުމުން އޮން އެރައިވަލް ވިސާ ލިބޭނެ އިންތިޒާމުތައް ވަނީ ހަމަޖެހިގެން ގޮސްފައެވެ. އަދި ތައިލެންޑަށް ކުރެއްވި ދަތުރުފުޅަކީ ދިވެހި ޓޫރިޒަމްގެ ކޮންސެޕްޓް ބަދަލުކޮށްލި ކްރޮސްރޯޑްގެ ޕްރޮޖެކްޓަށް ކުރެއްވި ދަތުރުފުޅެއް ކަމަށް މުސްތަފާ ވިދާޅުވިއެވެ. 

ރައީސް ޔާމީން ވެރިކަމުގައި ހުންނަވާ ކުރެއްވި ދަތުރުތަކަށް ރައީސް އޮފީހުގެ ތަރުޖަމާނު ފާޑުވިދާޅުވެފައިވާއިރު، އެ ދަތުރުފުޅުތަކުން ރާއްޖެއަށް ވަރަށް ގިނަ މަޝްރޫއުތައް ހޯދާފައިވާކަން ފާހަގަކޮށްލެވެއެވެ. 

އެއާއެކު ރައީސް ސޯލިހުގެ ސަރުކާރުން ރިކޯޑު އަދަދަކަށް ދަތުރުތަކަށް ޚަރަދުކުރަމުންދާކަން ތަފާސް ހިސާބުތަކުން ހާމަވެއެވެ. އެގޮތުން މިއަހަރުގެ މިހާތަނަށް ދަތުރުތަކަށް ކަނޑައަޅާފައިވާ ބަޖެޓުގެ 60 އިންސައްތަ ޚަރަދުކުރެވިފައިވާކަން ފިނޭންސް މިނިސްޓްރީގެ ތަފާސް ހިސާބުތަކުން ވަނީ ހާމަވެފައެވެ. އަދި މިހާރު ސަރުކާރުން ކުރަމުންދާ ދަތުރުތަކަކީ ޚަރަދު ކުޑަކުރުމުގެ ގޮތުން ދަތުރުތައް ނުކުރުމަށް އަންގާފައިވާ ވަނިކޮށް ކުރަމުންދާ ދަތުރުތަކެއްކަންވެސް ފާހަގަކޮށްލެވެއެވެ.