މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހުޅުމާލޭގައި އިމާރާތް ކުރަމުން އަންނަ ފުލެޓްތަކަށް ފައިސާ ދެއްކުމަށް ލުއި ގޮތްތަކެއް ހަމަޖައްސާފައިވާ ކަމަށް އެ ކުންފުނީގެ ސީއީއޯ ޝާހިދު އަލީ ވިދާޅުވެއްޖެއެވެ.
އެމްޕީއެލްގެ 36 ވަނަ އަހަރީ ދުވަހުގެ ޚާއްސަ ޖަލްސާގައި އެމްޕީއެލް ފްލެޓާއި ގުޅިގެން ވާހަކަ ދައްކަމުން ޝާހިދު ވިދާޅުވީ، އެ ކުންފުނީގެ މުވައްޒަފުންނަށް ފްލެޓް ފައިސާ ދެއްކުމަށް ގިނަ ގޮތްތަކެއް ހަމަޖައްސާފައިވާ ކަމަށެވެ.
އެގޮތުން ކުރިން އެއްފަހަރާ ފައިސާ ދައްކަން އޮތް ނަމަވެސް އެ ގޮތް ބަދަލުކޮށް 20 އަހަރަށް ބަހާލައިގެން ފައިސާ ދެއްކޭނެ އިންތިޒާމު ހަމަޖައްސާފައިވާ ކަމަށް ޝާހިދު ވިދާޅުވިއެވެ. ޝާހިދު ވިދާޅުވީ، ފްލެޓްތަކުގެ ޑައުން ޕޭމަންޓް ދެއްކުމަށްވެސް ލުއި ގޮތްތަކެއް ހަމަޖައްސާފައިވާ ކަމަށެވެ.
"މެއިންޓެނަންސް ފީ ކުޑަކުރުމާއެކު ބުކިން ފީއަކީ ޑައުންޕޭމަންޓްގެ ބައެއްގެ ގޮތުގައި މިހާރު މިވަނީ ހެދިފަ. ކުންފުނީގެ މާލީ ގާބިލުކަމަށް ރިއާޔަތްކޮށް އަދި ކުރިއަށް އޮތްނުގައިވެސް ދެވެން އޮތް ލުއިތަކެއް ދިނުމަށް މަސައްކަތްކުރާނެ ކަމުގެ ވާހަކަދަންނަވަން," ޝާހިދު ވިދާޅުވިއެވެ.
ޝާހިދު ވިދާޅުވީ، އެކުންފުނީގެ ފްލެޓްތައް އަންނަ އަހަރުގެ ކުރީކޮޅު ނިންމާލެވޭނެ ކަމަށް އުންމީދު ކުރައްވާ ކަމަށެވެ.
Advertisement
This content is created and paid for by advertisers and does not involve Voice Journalists
