ރ. އިނގުރައިދޫ ދާއިރާގެ ތަރައްގީއާއި، ކުރިއެރުމަށްޓަކައި މި ސަރުކާރުން ކޮށްދެއްވަމުންދާ މަސައްކަތްތައް ފާހަގަކުރައްވާ އިނގުރައިދޫ ދާއިރާގެ މެމްބަރު ހަސަން އަހްމަދު (ހަސަންޓޭ) ސަރުކާރަށް ވަރަށް ބޮޑަށް ތައުރީފު ކުރައްވައިފިއެވެ. 

ހަސަންޓޭ ދާއިރާއަށް ކުރައްވާ ދަތުރުފުޅުގައި ވަނީ ރަށްރަށުގައި ސަރުކާރުން ހިންގަމުންދާ މަޝްރޫއުތަކާއި ގުޅޭ މައުލޫމާތު ހިއްސާކުރައްވާފައެވެ. 

އެގޮތުން ހަސަންޓޭ ވިދާޅުވީ މިހާތަނަށް އެއްވެސް ސަރުކާރަކުން ކޮށްދެއްވާފައި ނުވާވަރަށް މި ސަރުކާރުން އިނގުރައިދޫ ދާއިގާގައި މަޝްރޫއުތައް ހިންގާފައިވާކަމަށެވެ. 

ދާއިރާގެ ބައެއް ރަަށްރަށުގައި މިހާރު ކުރިއަށްދާ މަޝްރޫއުތަކަށްވެސް އޭނާ ވަނީ އަލިއަޅުވާލައްވާފައެވެ. 

އޭނާ ވިދާޅުވިގޮތުގައި ރ އިންނަމޫދާ ފެނުގެ ނިޒާމު ގާއިމުކޮށް، ލެބޯޓްރީއެއް ތަރައްގީކުރުމުގެ އިތުރުން ޖިމެއް އަޅާ، ފުޓްސެލް ދަނޑެއްވެސް ސަރުކާރުން އަޅާދީފައިވާކަމަށް ހަސަންޓޭ ވިދާޅުވިއެވެ. 

ރަސްމާދޫއަށް ބަލާއިރު، ބަނދަރު އަޕްގްރޭޑް ކުރުމުގެ މަސައްކަތާއި، ގޮނޑުދޮށް ހިމާޔަތް ކުރުމުގެ މަސައްކަތުގެ އިތުރުން އިންޖީނުގޭގެ އިތުރުން ޕާކެއް ތަރައްގީކޮށް ނިންމާފައިވާކަމަށް ހަސަންޓޭ ވިދާޅުވިއެވެ. އަދި ސުކޫލު އިމާރާތުގެ މަސައްކަތް މިހާރުވެސް ކުރިއަށްދާކަން އޭނާ ފާހަގަކުރެއްވިއެވެ. 

ދާއިރާގައި ހިމެނޭ އިނގުރައިދޫގައި މި ސަރުކާރުން ހިންގާފައިވާ މަޝްރޫއުތަކަށް އަލިއަޅުވާލައްވާ ހަސަންޓޭ ވިދާޅުވީ އެރަށުގެ ފެނާއި ނަރުދަމާގެ މަސައްކަތް މި ސަރުކާރުން ނިންމާފައިވާކަމަށެވެ. ސުކޫލު ތަރައްގީކުރުމުގެ މަސައްކަތް ކުރިއަށް ދާއިރު، ސިއްހީ މަރުކަޒުގެ އާ އިމާރާތުގެ މަސައްކަތް ޓެންޑަރ ކުރެވިފައިވާކަމަށާއި، ޕޮލިސް ސްޓޭޝަނާއި ކޯޓުގެ އިމާރާތް ހެދުމުގެ މަސައްކަތްވެސް ކުރިއަށްދާކަމަށް ހަސަންޓޭ ވަނީ ވިދާޅުވެފައެވެ. 

ފައިނަށް ބަލާލާއިރު، އެ ރަށުގެ ފެނާއި ނަރުދަމާގެ މަސައްކަތް ނިނުމަކާއި ގާތަށް ގޮސްފައިވާކަމަށާއި، އިނޖީނު ގޭގެ މަސައްކަތް ނިމިފައިވާަކަން އޭނާ ފާހަގަކުރެއްވިއެވެ. އޭގެ އިތުރުން ގޮނޑުދޮށް ތަރައްގީކުރުމުގެ މަސައްކަތް ނިމިފައިވާކަމަށާއި، އައުޓް ޑޯ ޖިމްއެއް އަޅާފައިވާކަމަށް އޭނާ ވިދާޅުވިއެވެ. 

ހަސަންޓޭ އިތުރަށް ވިދާޅުވީ މި ސަރުކާރުން އިނގުރައިދޫ ދާއިރާގައި ހިންގަމުންދާ މަޝްރޫއުތައް ގާތްގަނޑަކަށް ނިމުމަކަށް އައިސްފައިވާކަމަށެވެ. 

މި ސަރުކާރުން ރައްޔިތުންނަށް ކޮށްދޭ ޚިދުމަތްތަކާއެކު ކުރިއަށް އޮތް ރިޔާސީ އިންތިޚާބު އެމްޑީޕީއަށް ކާމިޔާބުކުރަން ފަސޭހަވާނެކަމަށް ހަސަންޓޭ ވަނީ ވިދާޅުވެފައެވެ.

އިނގުރައިދޫ ދާއިރާގައި މި ސަރުކާރުން ވަރަށް ގިނަ މަޝްރޫއުތައް ހިންގަމުންދާކަން ފާހަގަކުރައްވާ ހަސަންޓޭ ވަނީ ސަރުކާރަށް ޝުކުރުއަދާކުރައްވާފައެވެ. 

ދާއިރާ ތަރައްގީ ކުރުމަށް ކުރިއަށް އޮތް އިންތިޚާބުގައި އެމްޑީޕީއަށް ވޯޓު ދިނުމަށް އޭނާ ވަނީ އެދިވަޑައިގެންފައެވެ.