ނޭކުރެންދޫ ސުކޫލުގެ ހާލަތާއި ގުޅޭގޮތުން އެ ދާއިރާގެ މެމްބަރު މުހައްމަދު ރާއީ ކަންބޮޑުވުން ފާޅުކޮށްފިއެވެ.
ރައްޔިތުންގެ މަޖިލީހުގެ ތިން ވަނަ ދައުރުގެ 18 ވަނަ ޖަލްސާގައި އެޑިއުކޭޝަން މިނިސްޓަރާއި ސުވާލުކުރައްވަމުން ރާއީ ވިދާޅުވީ ނޭކުރެންދޫ ސުކޫލުގެ ފުރާޅު ވަނީ ބޮލަށް ވެއްޓެން ކައިރިވެފައިކަމަށެވެ. އަދި މިހާރު ދަރިވަރުން ކިޔަވަމުންދަނީ ބިރުވެރި މާހައުލެއްގައިކަމަށެވެ.
އަދި އެ ސުކޫލުގެ ހާލަތު ދައްކުވައިދޭ ފޮޓޯތައް މިނިސްޓަރާއި ހިއްސާކޮށްފައިވާނެކަމަށް ރާއީ ވިދާޅުވިއެވެ.
އެ ސުކޫލުގައި އިތުރު ކުލާސްރޫމުތަކެއް އެޅުމުގެ މަސައްކަތް ސަރުކާރުން ހަވާލުކޮށްފައިވާއިރު، އެ މަސައްކަތް ކުރިއަށް ނުދާކަމަށް ރާއީ ވިދާޅުވިއެވެ. އަދި އެކަންކަން ހައްލުކޮދެއްމުގެ މަސައްކަތް ކުރިއަށްދާ ގޮތް ސާފުކޮށްދެއްވުމަށް ރާއީ ވަނީ އެޑިއުކޭޝަން މިނިސްޓަރު އަރިހުން އައްސަވާފައެވެ.
"ނޭކުރެންދޫ ސުކޫލުގައި 4 ކްލާސްރޫމު އެޅުމަށް ހަވާލުކޮށްފައި ވަނީ. އެކަމަކު މިހާރު ދަރިވަރުން ކިޔަވަމުންދާ މާހައުލަކީ ހަމަ ފުރާޅު ބޮލައް ވެއްޓޭވަރުގެ ވަރަށް ނުރައްކާ މާހައުލެއް. އެކަމަށް އެއްވެސް ހައްލެއް ހޯދިއްޖެތޯ؟"
މަކުނޫ ދާއިރާގެ މެމްބަރު ރާއީ
ނޭކުރެންދޫ ސުކޫލުގެ ހާލަތާއި ގުޅިގެން މެމްބަރު ކުރެއްވި ސުވާލައް ޖަވާބުދެއްވަމުން މިނިސްޓަރު ވިދާޅުވީ ނޭކުރެންދޫގެ ހަތަރު ކްލާސްރޫމު އެޅުމުގެ މަސައްކަތް މިހާރު ކުރިއަށްދާކަމަށެވެ. އެ މަސައްކަތް މި އަހަރުގެ މާޗުމަހުގައި ފެށިފައިވާކަމަށާއި، މި އަހަރުގެ އޮކްޓޫބަރު 14 އަށް މަސައްކަތް ނިމޭނެކަމަށް އެ މަސައްކަތް ހަވާލުކުރި ފަރާތުން ބުނެފައިވާކަމަށް މިނިސްޓަރު ވިދާޅުވިއެވެ.
އެހެން ނަމަވެސް އެ މަސައްކަތް ހިނގަމުންދަނީ ލަސްކޮށްކަން މިނިސްޓަރު ފާހަގަކުރެއްވިއެވެ.
ސުކޫލުގެ ހާލަތު ދައްކުވައިދޭ ފޮޓޯތަކެއް މެމްބަރު ހިއްސާކުރައްވާފައިވާއިރު، މިހާރުން މިހާރަށް ކުރަންޖެހޭ މުހިންމު މަރާމާތުތައް ކުރުމުގެ މަސައްކަތް ކުރިއަށް ގެންދިއުމަށް މިހާރު ފިނޭންސް މިނިސްޓްރީއާއި މަޝްވަރާކުރަމުންދާކަމަށް އެޑިއުކޭޝަން މިނިސްޓަރު ވަނީ ވިދާޅުވެފައެވެ.
ކުރެންދޫ ސުކޫލުގެ އިތުރުން އެ ދާއިރާއަށް ނިސްބަތްވާ ކުމުންދޫ ސުކޫލުގެ މަސައްކަތްވެސް ކުރިއަށްދާ ސްޕީޑާއި މެދު ރާއީ ވަނީ ކަންބޮޑުވުން ފާޅުކުރައްވާފައެވެ. އަދި އަންނަ އަހަރަކީ އެ ސުކޫލަށް 75 އަހަރު ފުރޭ އަހަރުކަމަށް ވުމުން އޭގެ ކުރިން އެ ސުލޫކުގައި އަޅަން ޖެހޭ ކްލާސް ރޫމުތައް ނިންމާނުލެވިދާނެކަމުގެ ކަންބޮޑުވުން ރާއީ ވަނީ ފާޅުކުރައްވާފައެވެ.
Advertisement
This content is created and paid for by advertisers and does not involve Voice Journalists
