އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ ގިން މެމްބަރުން އިސްތިއުފާދެނީ ޕީޕީއެމް ކައުންސިލްތަކުގެ ފުރައްސާރައާއި ގުޅިގެންކަމަށް މަޖިލީހުގެ ދާންދޫ ދާއިރާގެ މެންބަރު ޔައުގޫބު ވިދާޅުވެއްޖެއެވެ. 

ޔައުގޫބު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ތިން ވަނަ ދައުރުގެ 18 ވަނަ ޖަލްސާއަށް ލޯކަލް ކައުންސިލް ތަކުގެ އިންތިޚާބާއި ބެހޭ ގާނޫނަށް ހުށައެޅި އިސްލާހަށް ވާހަކަދައްކަވަމުންނެވެ. 

އެ އިސްލާހަށް ވާހަކަދައްކަވަމުން ޔައުގޫބު ވިދާޅުވީ ޕީޕީއެމްގެ ކައުންސިލްތަކުން އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގައި ތިއްބަވާ އެ ޕާޓީ ނޫން އެެެހެން ޕާޓީތަކުގެ މެމްބަރުންނަށް ފުރައްސާރަކުރަމުންދާކަމުގެ ޝަކުވާތައް ލިބެމުންދާކަމަށެވެ. 

Advertisement

އަދި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ ގިނަ މެމްބަރުން އިސްތިއުފާދެއްވަނީވެސް ޕީޕީއެމް ކައުންސިލްތަކުގެ ފުރައްސާރައާއި ގުޅިގެންކަމަށް ޔައުގޫބު ވިދާޅުވިއެވެ. 

އެއާއެކު އޭނާ ވަނީ ވަކި އަންހެނަކަށް ވީތީ، އަދި ވަކި ޕާޓީއަކަށް ނިސްބަތްވީތީ ފުރައްސާރަކުރުން ހަރުކަށި އިބާރާތުން ކޮށްވެރިކޮށްފައެވެ.

ޔައުގޫބު ވިދާޅުވީ ލޯކަލް ކައުންސިލްތަކުގައި އަންހެނުންނަށް ޚާއްސަ ގޮނޑިތަކެއް ކަނޑައަޅާފައިވަނީ އަންހެނުން ބާރުވެރިކުރުމަށް ކަމަށެވެ. 

އެއާއި ދެކޮޅަށް އެއްވެސް ޕާޓީއަކުން މަސައްކަތް ކުރުމަކީ ބަލައިގަނެވޭނެކަމެއް ނޫންކަމަށް ޔައުގޫބު ވަނީ ވިދާޅުވެފައެވެ. އަދި އޭނާ ވަނީ އެގޮތަށް އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގައި ތިއްބަވާ ފަރާތްތަކަށް ފުރައްސާރަ ނުކުރުމަށް ޕީޕީއެމްއަށް ގޮވާލައްވާފައެވެ. 

އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ ގިނަ މެމްބަރުން އިސްތިއުފާދެނީ ޕީޕީއެމް ކައުންސިލްތަކުގެ ފުރައްސާރައާއި ހުރެކަމަށް ޔައުގޫބު ވިދާޅުވެފައިވާއިރު، މިހާތަނަށް އެފަދަ ދިރާސާއެއް ހެދިފައެއް ނުވެއެވެ. އަދި ވަކި ސިޔާސީ ޕާޓީއަކުން ފުރައްސާރަކޮށް އިސްތިއުފާދޭން މަޖުބޫރުކޮށްފައިވާކަމަށް މިހާތަނަށް އެއްވެސް މައްސަލައެއް ލޯކަލް ގަވަމަންޓު އޮތޯރިޓީއަށްވެސް ހުށައެޅިފައެއް ނުވެއެވެ.