ލަންކާގައި ހިނގި އަލިފާނުގެ ހާދިސާއެއްގައި 80އެއްހާ އާއިލާއަށް އަސަރުކޮށް, ފަގީރުން ދިރިއުޅޭ ސަރަހައްދުން 60 އަަށް ވުރެ ގިނަ ގެ އަނދާ ހުލިވެއްޖެއެވެ.

އަލިފާން ރޯވީ ތޮޓަލަންގަ ގްރޭންޑްޕާސްގައި ހުންނަ ކަޖީމަވައްތަ ފްލެޓުތަކުގަ އެވެ. އަސަރު ކުރި އާއިލާތަކުގެ 220 މީހުން މިހާރު ތިބީ ވަގުތީ ހިޔާތަކުގަ އެވެ.

މިހާދިސާ ހިނގާފައިވަނީ މިދިޔަ އަންގާރަ ދުވަހުގެ ރޭގެ ވަގުތެއްގައި ކަމަށް މީޑިއާ ރިޕޯޓުތައް ބުނެއެވެ. ފުލުހުންނާއި ހަވާލާދީ އެގައުމުގެ ނޫސްތަކުން ރިޕޯޓުކޮށްފައިވާގޮތުގައި 220 މީހުން ވަގުތީ ހިޔާތަކަށް ބަދަލުކުރެވިފައިވާއިރު ބައެއް މީހުން ކޮމިއުނިޓީ ހޯލްތަކަށް ވެސް ވަނީ ބަދަލުކޮށްފަ އެވެ.

މި ހާދިސާއާއި ގުޅިގެން ހާލުގައި ޖެހުނު މީހުންނަށް އަވަސް އެހީތެރިކަން ފޯރުކޮށްދިނުމަށް ލަންކާގެ ރައީސް ރަނިލް ވިކްރަމަސިންހަ މިހާރު ވަނީ އޮތޯރިޓީތަކަށް އަންގަވާފައެވެ. މި ހާދިސާގައި އެއްވެސް މީހަކު މަރުވެފައިވާ ކަމެއް މިހާތަނަށް އެގައުމުގެ މީޑިއާތަކުން ރިޕޯޓުކޮށްފައެއް ނުވެއެވެ.