ބޯކޮށް ވާރޭވެހި ފެންބޮޑުވުމުގެ ސަބަބުން ހާލަތުގައި ޖެހިފައިވާ އަވައްޓެރި ޕާކިސްތާނުގެ ރައްޔިތުންނަށް ދިވެހިންގެ ދީލަތި އެހީތެރިކަން ފޯރުކޮށްދިނުމަށް އިސްލާމިކް އޮގަނައިޒޭޝަން ފޯ ކަލްޗާ އެންޑް ސިވިލައިޒޭޝަން (އައިއޯސީސީ)ން އިލްތިމާސްކޮށްފިއެވެ.
އެ ޖަމުއިއްޔާއިން މިފަދައިން އިލްތިމާސްކޮށްފައިވަނީ އެ ޖަމުއިއްޔާއިން ބޭއްވި ނޫސްވެރިންގެ ބައްދަލުވުމެއްގައެވެ.
އެ ޕްރެސްކޮންފަރެންސްގައި ވާހަކަދައްކަވަމުން އައިއޯސީސީގެ ރައީސް ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ ޕާކިސްތާނަށް އެހީތެރިވުމަށް ޕާކިސްތާނުގެ އެމްބަސީއާއި މޯލްޑިވްސް ޕާކިސްތާނު ފްރެންޑްޝިޕް ޖަމިއްޔާއިން ބާއްވާ ޓެލެތޯންގައި ވީހާވެސް ގިނަ ދިވެހިން ބައިވެރިވުމަށް އެދިލައްވާކަމަށެވެ.
މި ވަގުތަކީ ދިވެހިރާއްޖެއާއި ޕާކިސްތާނާއި ދެމެދު އޮތް ގުޅުން ރަމްޒުކޮށްދޭ ވަރުގަދަ މަސައްކަތެއް ދިވެހިން ކުރަންޖެހޭ ވަގުތެއްކަމަށް ޑރ ޝަހީމު ވިދާޅުވިއެވެ.
އެއާއެކު ޑރ ޝަހީމު ވިދާޅުވީ ދިވެހިރާއްޖޭގެ އިގްތިސާދީ ހާލަތު އޮތް ގޮތް އިހުސާސުކުރެވޭކަމަށެވެ. އެހެން ނަމަވެސް ދިވެހިންނަކީ އިޚުލާސްތެރި ހިތްހެޔޮ އަދި ޚުލްގު ހެޔޮ ބައެއްކަމަށްވުމުން މި ހާލަތުގައި ދިވެހިންގެ އެހީތެރިކަން ނިހާޔަތަށް ބޭނުން ވެފައިވާ ޕާކިސްތާނުގެ ރައްޔިތުންނަށް ވެދެއްވެން އޮތް އެހީތެރިކަމެއް ފޯރުކޮށްދިނުމަށް އެދޭކަމަށް ޑރ. ޝަހީމު ވިދާޅުވިއެވެ.
އިސްލާމީ އުންމަތުގެ މިސާލަކީ އެއް ހަށިގަނޑެއްގެ މިސާލުކަން ފާހަގަކުރައްވަމުން ޑރ ޝަހީމު އިތުރަށް ވިދާޅުވީ ދިވެހިރާއްޖެއާއި ޕާކިސްތާނާއި ދެމެދު އޮންނަ ގުޅުމަކީ ޒަމާންވީ އިސްލާމީ ގުޅުމެއްކަމަށެވެ.
މިހާރުވެސް ރާއްޖޭގެ ވަރަށް ގިނަ ދަރިވަރުން ޕާކިސްތާނުގައި ތައުލީމު ހާސިލްކުރަމުންދާކަންވެސް ޑރ. ޝަހީމް ފާހަގަކުރެއްވިއެވެ.
އެ ޕްރެސް ކޮންފަރެންސްގައި ވާހަކަދައްކަވަމުން އައޯސީސީގެ ނައިބު ރައީސް އަލީ އަހުސަން ވިދާޅުވީ ޕާކިސްތާނުގެ ރައްޔިތުން އެގައުމުގައި އުޅޭ ދިވެހި ދަރިވަރުންނާމެދު ކަންތައް ކުރަނީ އަމިއްލަ ގައުމުގެ މީހުންނާ މެދު ކަންތައްކުރާ ފަދައިން އެއްވެސް ތަފާތުކުރުމެއް ނެތިކަން ހަނދާން ކޮށްދެއްވާފައެވެ.
މި ދަނޑިވަޅަކީ ދިވެހިންގެ ދީލަތި އެހީތެރިކަން ޕާކީސްތަނުގެ ހާލުގައި ޖެހިފައިވާ ރައްޔިތުންނަށް ނިހާޔަތަށް ބޭނުންވެފައިވާ ވަގުތެއްކަން ފާހަގަކުރައްވާ އޭނާ ވަނީ ޕާކިސްތާނަށް އެހީތެރިކަން ފޯރުކޮށްދިނުމަށް ދިވެހި ރައްޔިތުންނަށް އިލްތިމާސްކުރައްވާފައެވެ.
މޫސުން ގޯސްވެ ޕާކިސްތާނަށް ކުރި ވިއްސާރައިގައި ފެންބޮޑުވެ 1500 އަށް ވުރެ ގިނަ މީހުން ދުނިޔެ ދޫކޮށްފައިވާއިރު، ހާލުގައި ޖެހުނު މީހުންގެ އަދަދު 33 މިލިއަނަށް އަރާކަމަށް ރިޕޯޓުތަކުން ދައްކައެވެ. އަދި އެ ވިއްސާރައިގައި ޕާކިސްތާނަށް ލިބުނު ގެއްލުން 3 ބިލިއަން ޑޮލަރަށް އަރާކަމަށް މީޑިއާތަކުން ރިޕޯޓުކުރެއެވެ.
Advertisement
This content is created and paid for by advertisers and does not involve Voice Journalists
