އަމީނީ މަގު ޒަމާނީ ފެންވަރަކަށް ހެދުމަށްޓަކައި އެ މަގުގައި ހުރި ގަސްތައް ކަނޑަމުން ދާ މައްސަލަ ކޯޓަށް ވެއްދި ގޮތަށް މީގެ ދުވަސްކޮޅެއް ކުރިން އިންޑިއާގެ އެފްކޯންސް ކުންފުނީގެ އިހުމާލުން ވިލިމާލޭ ފަރަށް ޕްލެޓްފޯމެއް އުރި، އެ ފަރަށް ލިބުނު ގެއްލުމުގެ މައްސަލަ ކޯޓަށް ހުށައަޅާފައި ނުވާތީ މާލޭ ސިޓީގެ ޑެޕިއުޓީ މޭޔަރު އަހުމަދު ނަރީޝް ފާޑުވިދާޅުވެއްޖެއެވެ. 

އަމީނީ މަގުން ގަސްކަނޑާ މައްސަލަ މަޖިލީހުގެ ރައީސް، އަދި ސަރުކާރު ހިންގާ މައި ޕާޓީ އެމްޑީޕީގެ ރައީސް މުހައްމަދު ނަޝީދު ވަނީ ކޯޓަށް ހުށައަޅުއްވާފައެވެ. 

އަދި އެމްޑީޕިގެ "ނަޝީދު ފެކްޝަން" ގެ މެމްބަރުން ގެންދަވަނީ އެކަމާއި ނުރުހުން ފާޅުކުރަމުންނެވެ. 

މި ދަނޑިވަޅުގައި ނަރީޝް ކުރެއްވި ޓްވީޓެއްގައި ވަނީ ތިމާވެއްޓަށް ލިބޭ ގެއްލުންތަކާއި ދެކޮޅަށް އަޑުއުފުލުމުގައި ތަފާތުކުރުންތައް ގެންގުޅޭކަން ފާހަގަކުރައްވާފައެވެ. 

އެގޮތުން އޭނާ ވަނީ އިންޑިއާގެ އެފްކޯންސް ކުންފުނީގެ މައްސަލަ ކޯޓަށް ނާޅާ އަމީނީ މަގުން ގަސް ކަނޑާ މައްސަލަ ކޯޓަށް ހުށައަޅަން ޖެހުނީ ކޮން ސަބަބަކާ ހުރެތޯ ސުވާލުކުރައްވާފައެވެ. 

ނަރީޝް ވިދާޅުވީ އަމީނީ މަގުގެ ގަސްތަކުގެ މައްސަލަ ވަރަށް ބޮޑުވެ ނޫސްވެރިންވެސް އެކަމުގެ ޝައުގުގައި ވަރަށް ބޮޑަށް އުޅޭތަން ފެންނަމުންދާ ކަމަށެވެ. އެ މައްސަލަ ކޯޓަށް ވެއްދުމަށް ލޯޔަރުންވެސް އަވަދިނެތި އުޅެމުންދާކަމަށެވެ. 

އެހެން ނަމަވެސް އެހާ ފޯރީގައި ވިލިމާލޭ ފަރަށް އެފްކޯންސް ކުންފުނިން ދިން ގެއްލުމުގެ މައްސަލަ ކޯޓަށް ހުށައަޅަން މަސައްކަތް ނުކުރަނީ ކޮން ސަބަބަކާހުރެތޯ ސުވާލު އުފެދޭކަމަށް ނަރީޝް ވިދާޅުވިއެވެ. 

އަދި އެހާ ޝައުގުވެރިކަމާއެކު އެ މައްސަަލަ ނުބަލަކީ އީޕީއޭގެ އިސްވެރިން އިންޑިއާއަށް ހާޒިރުކޮށް "ސައިޒު" ކުރުމުންތޯ ނަރީޝް ވަނީ ސުވާލު އުފައްދަވާފައެވެ. 

އެފްކޯންސްއަކީ އިންޑިއާގެ ކުންފުންޏަކަށް ވުމުން އެ ކުންފުނިން ވިލިމާލޭ ފަރަށް ބޮޑު ގެއްލުމެއް ދިން ނަމަވެސް، ތިމާވެށީގެ ޗެމްޕިއަނުންނަށް ހަނު ތިއްބަވަން މަޖުބޫރުވީތޯވެސް ނަރީޝް ވަނީ ސުވާލުކުރައްވާފައެވެ. ތިމާވެއްޓަނަށް ގެއްލުން ދިން ކަމަށްވަނީ ވަކީ ބައެއްގެ ފުށުން ހިންގާ ކަންކަން އެކަނިކަމަށް ގަބޫލުކުރެވުމަކީވެސް ތިމާވެށި ހިމާޔަތްކުރުމަށް އަޑުއުފުލުމުގައި ތަފާތުކުރުން ގެންގުޅޭ ސަބަބަކަށް ވެދާނެކަމަށް ނަރީޝް ވަނީ ވިދާޅުވެފައެވެ. 

އަމީނީ މަގުން ގަސް ކަނޑާ މައްސަލަ ނަޝީދު ކޯޓަށް ހުށައަޅުއްވާފައިވާއިރު، އޭނާ ވަނީ އެ މަސައްކަތް ފެށުމުގެ ކުރިންވެސް އެ މަގުގައި ހެދިފައި ހުރި ގަސްތައް ނުކެނޑުމަށް އިލްތިމާސްކޮށްފައެވެ. އަދި ގަސްތައް ނުކަނޑާ އެ މަގު ތަރައްގީކުރެވޭ ގޮތްތައް ހޯދުމަށް މަގުހަދާ ކުންފުންޏަށް އިލްތިމާސްކޮށްފައެވެ.