މިއަދު ބޭއްވި ހަތަރު ބައި އިލެކްޝަންގެ ތެރެއިން ދެ ބައި-އިލެކްޝަން ކާމިޔާބުކޮށް އެކު ޖުމްލަ އެންމެ ގިނަ ވޯޓު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ހޯދައިފިއެވެ.
މިއަދު ކުރިއަށް ދިޔައީ ށ. މާއުނގޫދޫ ކައުންސިލަށް މެމްބަރަކު އިންތިހާބު ކުރުމާއި، ރ. ރަސްމާދޫ، ތ. ގުރައިދޫ އަދި ލ. ދަނބިދޫގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީ މެމްބަރުން އައްޔަންކުރުމަށް ބޭއްވި އިންތިޚާބުތަކެވެ.
މި އިންތިޚާބުތަކުގެ ތެރެއިން ދެ ބައި-އިލެކްޝަން ޕީޕީއެމުން ވަނީ ކާމިޔާބުކޮށްފައެވެ. އެގޮތުން ތ. ގުރައިދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ގޮނޑިއާއި ރ. ރަސްމާދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ގޮނޑި ޕީޕީއެމުން ވަނީ ކާމިޔާބުކޮށްފައެވެ.
މިއަދު ކުރިއަށް ދިޔަ ބައި-އިލެކްޝަންގެ ދެ އިންތިޚާބެއް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އިންވެސް ވަނީ ކާމިޔާބުކޮށްފައެވެ. އެގޮތުން ށ.މާއުނގޫދޫ ކައުންސިލް ބައި އިލެކްޝަނުގެ ގޮނޑިއާއި ލ. ދަނބުދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ގޮނޑި އެމްޑީޕީއިން ވަނީ ކާމިޔާބުކޮށްފައެވެ.
މިއަދު ކުރިއަށް ދިޔަ ބައި އިލެކްޝަންތަކުގެ އެކު ޖުމްލަ ވޯޓަށް ބަލާލާއިރު އެންމެ ގިނަ ވޯޓު ލިބިފައިވަނީވެސް ޕީޕީއެމްއަށެވެ. އެގޮތުން ޕީޕީއެމްއަށް 1112 ވޯޓު ލިބިފައިވެއެވެ. ޕީޕީއެމްއާއި ގާތުން ވާދަކުރި ސަރުކާރު ހިންގާ މައި ޕާޓީ އެމްޑީޕީއަށް ލިބިފައިވަނީ 713 ވޯޓެވެ.
މި އިންތިޚާބުގައި ބައިވެރިވި އެމްއެންޕީއަށް 201 ވޯޓު ލިބިފައިވާއިރު އަމިއްލަގޮތުން ބައިވެރިވި ކެންޑިޑޭޓުންނަށް ލިބުނީ 50 ވޯޓެވެ.
Advertisement
This content is created and paid for by advertisers and does not involve Voice Journalists
