ޕާކިސްތާނު ވަނީ މޫސުމަށް އަންނަ ބަދަލުތަކުގެ ޝިކާރައަކަށް ވެފައި ކަމަށް ދިވެހިރާއްޖެއަށް ކަނޑައަޅުއްވާފައިވާ ޕާކިސްތާނުގެ ހައި ކޮމިޝަނަރ އަތޭރު މުޚުތާރު ވިދާޅުވެއްޖެއެވެ. 

ހައިކޮމިޝަނަރ މުޚުތާރު "ވޮއިސް" އަށް ދެއްވި އިންޓަރވިއުގައި ވިދާޅުވީ ޕާކިސްތާނަކީ މޫސުމަށް އަންނަ ބަދަލުތަކުގެ ސަބަބުން ބޮޑެތި ގެއްލުންތަކެއް ލިބެމުންދާ ގައުމުތަކުގެ ތެރޭގައި ހިމެނޭ ގައުމެއްކަމަށެވެ. 

މިފަހުން ޕާކިސްތާނަށް ކުރި ވިއްސާރައިގައިވެސް އެ ގައުމަށް ބޮޑު ގެއްލުންތަކެއް ލިބިފައިވާކަމަށް ހައި ކޮމިޝަނަރު ވިދާޅުވިއެވެ. 

Advertisement

ކަމިޝަނަރުގެ ވާހަކައިގައި ވަނީ މި ފަހުން އެ ގައުމަށް ކުރިމަތިވި ވިއްސާރައިގައި ލިބުނު ގެއްލުންތަކަށް އަލިއަޅުވާލައްވާފައެވެ. އެގޮތުން 

އެގޮތުން ވިއްސާރައިގައި 1500 މީހުން ނިޔާވެފައިވާއިރު ތިން މިލިއަން މީހުން ހާލުގައި ޖެހިފައިވާކަމަށް ކަމިޝަރު ވިދާޅުވިއެވެ. އަދި އެތައް ބައެއްގެ ގެދޮރު ގެއްލި ވަގުތީ ހިޔާތަކުގައި ދަތިހާލުގައި އުޅެންޖެހިފައިވާކަންވެސް ފާހަގަކުރެއްވިއެވެ. 

އެކަންކަން ފާހަގަކުރައްވާ މުޚުތާރު ވިދާޅުވީ ޕާކިސްތާނަށް ދިމާވި މި ހިތާމަވެރި ކާރިސާގައި ދިވެހިންގެ ހެޔޮ ދުއާ ލިބެމުންދާތީ އުފާކުރައްވާކަމަށެވެ. އެއާއެކު މި ވަގުތަކީ ދިވެހިންގެ އެހީތެރިކަން ނިހާޔަތަށް ބޭނުންޖެހިފައިވާ ވަގުތެއްކަމަށް އޭނާ ވިދާޅުވިއެވެ. 

އަދި ޕާކިސްތާނަށް ދިމާވެފައިވާ މި ދަތި ހާލުން އަރައިގަތުމަށް ދިވެހިންނަށް ވެދެވެން އޮތް އެހީތެރިކަމެއް ފޯރުކޮށްދިނުމަށް އެދިވަޑައިގަންނަވާކަމަށް މުޚުތާރު ވިދާޅުވިއެވެ. 

ދިވެހިންނާއި ޕާކިސްތާނާއި ދެމެދުގައި އުފެދިފައިވާ އުޚުވަންތަ ގުޅުމެއްކަމަށާއި، ދިވެހިންގެ އެހީތެރިކަން އަބަދުވެސް އެ ގައުމަށް ލިބޭނެކަމަށް އުންމީދުކުރައްވާކަމަށްވެސް މުޚުތާރު ވަނީ ވިދާޅުވެފައެވެ.